ভাৰতবর্ষত নতুন প্ৰজাতিৰ ‘এপ’ৰ সন্ধান লাভ কৰিছে পুৰাতত্ত্ববিদসকলে ।প্ৰায় এক কোটি ৩০লাখ বছৰ পুৰণি এপৰ জীৱাশ্ম জম্মু-কাশ্মীৰত উদ্ধাৰ হৈছে । ‘ৰয়েল ছ’চাইটি বি’ৰ জাৰ্ণেলত এই দাবী কৰিছে পুৰাতত্ত্ববিদসকলে। জাৰ্ণেলখনত উল্লেখ কৰা অনুসৰি উধমপুৰ জিলাৰ ৰামনগৰ অঞ্চলত কিছু পুৰণি সামগ্ৰী লাভ কৰাৰ খবৰ পাইছিল বিজ্ঞানীসকলে ।
এই খবৰৰ ভিত্তিতে জম্মু-কাশ্মীৰলৈ গৈছিল পুৰাতত্ত্ববিদৰ এটি দল । দলটোত আমেৰিকাৰ এৰিজোনা বিশ্ববিদ্যালয় আৰু পাঞ্জাব বিশ্ববিদ্যালয়ৰ পুৰাতত্ত বিভাগৰ গৱেষক আছিল । চলিত বৰ্ষৰ আৰম্ভণিৰ সময়ত এই দলটো স্থানীয় এখন পাহাৰলৈ গৈছিল ।
তাতেই আৱৰ্জনাৰ মাজত এটি উজ্জ্বল সামগ্ৰী চকুত পৰে দলটোৰ । ওচৰলৈ যোৱাৰ পাছত দেখা গ’ল যে উজ্জ্বল সামগ্ৰীটো প্ৰকৃততে এটি দাঁত । লগে লগে দাঁতটো সংগ্ৰহ কৰি লৈ আহে গৱেষকসকলে । ইয়াৰ পূৰ্বেও জাপ মৰা সন্ধান লাভ কৰিছে গৱেষকসকলে ।
অৱশ্যে গৱেষকসকলে দাবী কৰা অনুসৰি সংগ্ৰহ কৰা দাঁতটো পূৰ্বতকৈ সম্পূৰ্ণ পৃথক । অনুমান কৰা মতে, সুদূৰ আফ্ৰিকা অথবা এছিয়াৰ কোনো স্থানৰ পৰা দীৰ্ঘ দূৰত্ব অতিক্ৰম কৰি প্ৰাণীটো জম্মু-কাশ্মীৰলৈ আহিছিল ।প্ৰাথমিক পৰীক্ষাৰ অন্তত গৱেষকসকলৰ একাংশই ধাৰণা কৰা অনুসৰি দাঁতটো কোনো বান্দৰৰ হ’ব পাৰে ।
দাঁতটো উল্লুখ প্ৰজাতিৰ পূৰ্বপুৰুষৰো হ’ব পাৰে । ৰামনগৰৰ বৃহত্তৰ অঞ্চলটোত ইয়াৰ পূৰ্বে এনে ধৰণৰ সামগ্ৰীৰ সন্ধান লাভ কৰা হোৱা নাছিল।নতুন প্ৰাপ্তিত উৎসাহিত হৈ পৰিছে গৱেষকসকল । ইমান পুৰণি প্ৰজাতিৰ এপ গৱেষকৰ দলটোৱে ইয়াৰ পূৰ্বে দেখা নাছিল । জীৱাশ্মটো অধিক সূক্ষ্মভাৱে পৰীক্ষা কৰিবলৈ স্থিৰ কৰা হৈছে । যাৰ দ্বাৰা জানিবলৈ চেষ্টা কৰা হ’ব কোটি বছৰ পূৰ্বৰ কাহিনীৰ ।
