ভাৰতৰ দ্বিতীয় বৃহৎ ৰাষ্ট্ৰীয় নৱৰত্ন অন্বেষণ আৰু উৎপাদন কোম্পানী অইল ইণ্ডিয়া লিমিটেডে ইয়াৰ OALP–III ব্লক, AN-OSHP-2018/1 আৰু AN-OSHP-2018/2ত 8400 LK 2D ভূ-কম্পীয় তথ্য আহৰণ কৰিবৰ বাবে অত্যাধুনিক বহুমুখী ভূ-কম্পীয় তথ্য আহৰণৰ ভেচেল “SW Vespucci” ৰ সহায়ত আজি আন্দামান অগভীৰ পানীত অফশ্বৰ অপাৰেচন আৰম্ভ কৰাৰ বিষয়ে অইলে এক প্ৰেছ বিবৃতি যোগে সদৰী কৰিছে । সৰ্বমুঠ প্ৰমাণিত আৰু সম্ভাৱ্য তেল আৰু প্ৰাকৃতিক গেছ ভাণ্ডাৰৰ ক্ষেত্ৰত ই এক উল্লেখযোগ্য পদক্ষেপ বুলি অইলে উল্লেখ কৰিছে ।
দীৰ্ঘদিনৰ পাছত আন্দামান অফশ্বৰত অন্বেষণৰ প্ৰচেষ্টা পুনৰ আৰম্ভ কৰিছে অইলে । অইল হৈছে অনশ্বৰ ব্লকত 2D আৰু 3D ভূ-কম্পীয় তথ্য আহৰণ কাৰ্যৰ সূচনা কৰা দেশৰ প্ৰথমটো কোম্পানী আৰু লগতে অনশ্বৰ OALP ব্লকত ভূ-কম্পীয় কাৰ্য সম্পূৰ্ণ কৰা প্ৰথমটো কোম্পানী । ঘৰুৱা অন্বেষণ আৰু উৎপাদন বৃদ্ধি কৰাৰ লগতে আমদানি হ্ৰাস কৰি আত্মনিৰ্ভৰ ভাৰত গঢ়াৰ প্ৰধানমন্ত্ৰীৰ যি সপোন সেই ক্ষেত্ৰত ই এক বৰঙণি আগবঢ়াইছে । এই উপলক্ষে অইলৰ অধ্যক্ষ আৰু পৰিচালন সঞ্চালক সুশীল চন্দ্ৰ মিশ্ৰই অৱগত কৰে যে, অনাগত বৰ্ষসমূহত দেশত অন্বেষণৰ প্ৰচেষ্টা প্ৰৱল কৰিবৰ বাবে আৰু অন্বেষণৰ পুঁজি ব্যয় (CAPEX) বৃদ্ধি কৰিবৰ বাবে কোম্পানীয়ে ইতিমধ্যে পৰিকল্পনা তৈয়াৰ কৰিছে ।
লগতে তেওঁ জানিবলৈ দিয়ে যে, উৰিষ্যা ৰাজ্যৰ মহানদী অনলেণ্ড ব্লকত তথ্য আহৰণৰ কাম অতি সোনকালে আৰম্ভ কৰা হ’ব আৰু ইয়াৰ OALP ব্লকসমূহত অন্বেষণ খনন অভিযান ২০২১-২২ ৰ ভিতৰত আৰম্ভ কৰা হ’ব । অহা তিনি-চাৰি বছৰত অইলে 15000 LKM 2D API, 4000 বৰ্গ কি.মি. 3D API আৰু OALP ব্লকসমূহত ৬৬ টা কূপ খননৰ পৰিকল্পনা কৰিছে । অইলে অসম আৰু অসম আৰাকান অৱবাহিকা, ৰাজস্থান, মহানদী অনলেণ্ড, আন্দামান আৰু কেৰেলা-কংকান অফশ্বৰ অৱবাহিকাত সৰ্বমুঠ ২১ টা ব্লক অৰ্জন কৰিছে ।
ইয়াৰ জৰিয়তে অইলে মুঠ ১৭০০ বৰ্গ কি.মি. প্ৰসাৰেৰে উত্তৰ-পূৰ্বাঞ্চলত এক শক্তিশালী মুখ্য অপাৰেটৰৰ স্থান দখল কৰে । অন্বেষণ বৃদ্ধি কৰাৰ প্ৰচেষ্টা স্বৰূপে কোম্পানীটোৱে OALPৰ নিবিদাসমূহত সক্ৰিয়ভাৱে অংশগ্ৰহণ কৰি আহিছে আৰু OALP V ৰ অধীনত অসম ৰাজ্যত আৰু দুটা ব্লক অৰ্জন কৰাৰ আশা কৰিছে । ইয়াৰ জৰিয়তে অইলে উত্তৰ-পূৰ্বাঞ্চলত প্ৰায় ২০০০০ বৰ্গ কি.মি. পৰিসৰ প্ৰসাৰ কৰিবলৈ সক্ষম হ’ব ।
উত্তৰ-পূৱ আৰু ৰাজস্থানত ইয়াৰ স্থান শক্তিশালী কৰাৰ উপৰিও অইলে ভাৰত চৰকাৰৰ thrust for explorationৰ প্ৰতি সমৰ্থন জনাই দ্বিতীয় আৰু তৃতীয় বৰ্গৰ গেদীয় অৱবাহিকাত অন্বেষণ কাৰ্য সম্পন্ন কৰাৰ বাবে সচেতনভাৱে প্ৰচেষ্টা চলায় বুলি বিবৃতিত অইলে জানিবলৈ দিয়ে ।