১৭০বছৰীয়া এক বিশ্বাস আৰু পৰম্পৰাৰ জলন্ত নিদৰ্শন নগাঁও চহৰৰ বেলতলাৰ প্ৰয়াত জানকী নাথ সেন উকীলৰ ঘৰৰ দুৰ্গা মন্দিৰ । বিগত ১৮৫০ৰ পৰাই এই দুৰ্গা মন্দিৰত প্ৰতিবছৰেই অনুষ্ঠিত হৈ আহিছে দুৰ্গা পূজা । এই পূজাত নাই কোনো কাৰুকাৰ্যৰ চমৎকাৰিতা, নাই কোনো প্ৰতিযোগিতা মূলক ভাৱনা আৰু আলোকসজ্জাৰ বাহাৰ । সীমিত বাজেটেৰে অতি অনাড়ম্বৰপূৰ্ণ ভাৱে বেলতলাৰ প্ৰয়াত জানকী নাথ সেন উকীলৰ ঘৰৰ দুৰ্গা মন্দিৰত আধ্যাত্মিকতাক প্ৰাধান্য দি অনুষ্ঠিত কৰি অহা হৈছে এইখন দুৰ্গাপূজাত ।
এইখন পূজাৰ অন্যতম বৈশিষ্ট্য হ’ল প্ৰচলিত বলি দিয়াৰ পৰম্পৰা । জাকজমকতা পৰিহাৰ কৰি আধ্যাত্মিকতা আৰু ধৰ্মীয় পৰম্পৰাক গুৰুত্ব দি এই পূজা অনুষ্ঠিত কৰি অহা হৈছে যদিও প্ৰতি বছৰেই বেলতলাৰ দুৰ্গা পূজা ৰাইজৰ অন্যতম আকৰ্ষণ হৈ পৰে ।
জানকী নাথ সেন উকীলৰ আজো নাতি শৰৎ বৰুৱাই আজি “দৈনিক অগ্ৰদূত”ৰ আগত কয়,”এইবাৰ আমাৰ ইয়াত ১৭১সংখ্যক দুৰ্গা পূজা অনুষ্ঠিত হ’ব । এইবাৰ অতিমাৰী কৰ’নাৰ ভয়াৱহতা, ক’ভিড প্ৰট’কল মানি কেৱল ধৰ্মীয় পৰম্পৰাহে ৰক্ষা কৰা হ’ব।ষষ্ঠীৰ পৰা দশমী পৰ্যন্ত মন্দিৰত পূজাভাগ অনুষ্ঠিত কৰা হ’ব । আমাৰ পূজাত চাৰিও দিনা বলি দিয়া হ’ব । এইবাৰ বলি হিচাপে ছাগলী, কোমোৰা আৰু কুঁহিয়াৰ আগবঢ়োৱা হ’ব।আমাৰ বাজেট তেনেই সীমিত।”
লগতে বৰুৱাই কয়, “ক’ভিড সম্পৰ্কীয় নিয়ম মানি চলি আমাৰ পূজাভাগ অনুষ্ঠিত কৰা হ’ব । প্ৰশাসনৰ নিৰ্দেশ মৰ্মে ইতিমধ্যে মোৰ লগতে পূজাৰী, এগৰাকী মহিলা আৰু এজন যুৱকে ইতিমধ্যে ক’ডিড পৰীক্ষা কৰাইছো ।”
