বিটিচি নিৰ্বাচনক লৈ মিত্ৰদল বিজেপি-বিপিএফৰ মাজত আক্ৰমণাত্মক প্ৰচাৰ অভিযানৰ মাজতে আজি সতীৰ্থ মন্ত্ৰী চন্দন ব্ৰহ্মক অতি চোকা ভাষাৰে সমালোচনা কৰে মন্ত্ৰী ড° হিমন্ত বিশ্ব শৰ্মাই । মন্ত্ৰী ড° শৰ্মাৰ ঘনিষ্ঠৰূপে পৰিচিত মন্ত্ৰী ব্ৰহ্মৰ বিৰুদ্ধে ৰাজহুৱাভাৱে উত্থাপন কৰা এই অভিযোগে চাঞ্চল্যৰ সৃষ্টি কৰিছে । চিৰাং জিলাৰ বিজনীৰ বিদ্যাপীঠ খেলপথাৰত এক জনসভাত অংশ লৈ ড° শৰ্মাই কয় যে দৈজিং উৎসৱৰ নামত ১৫ কোটি লৈ মদ আৰু জুৱাৰ আড্ডা পাতিছিল মন্ত্ৰী ব্ৰহ্মই ।
তেওঁ কয়, ‘চন্দন ব্ৰহ্মই দৈজিং উৎসৱ পাতিলে । মই দিনত আহিলো, হেলিকপ্টাৰ দেখিলো, নাচ দেখিলো, ৰাতি ঘৰত গৈ চাওঁ মদ আৰু জুৱাৰ আড্ডা পাতিছে চন্দনে ।’ ড° শৰ্মাই কয় যে দৈজিং উৎসৱ পাতিবলৈ অসম চৰকাৰে ১৫ কোটি টকা দিছিল আৰু এই ১৫ কোটি টকাৰে ব্ৰহ্মই দৈজিং পতা নাই মদ আৰু জুৱাৰ আড্ডা পাতিছিল । ‘আমাৰ ডেকাচামৰ জীৱন এটা এটাকৈ ধ্বংস কৰি আছে । পঢ়ি-শুনি বিটিচিত কি হ’ব ? বিটিচিত ল’ৰা ছোৱালীয়ে মেধাৰ ভিত্তিত চাকৰি নাপায় । হাগ্ৰামাৰ পকেটৰ তালিকাৰ পৰা নচলিব এতিয়াৰ পৰা । বিজেপিয়ে সকলো ঠিক কৰিব ।’
এইদৰে মন্তব্য কৰি ড° শৰ্মাই কয় যে হাগ্ৰামাৰ পকেটত থকা তালিকা মতেহে চাকৰি হয় বুলি ৰাজ্যপালে তেওঁক জনাইছে । সভাত মন্ত্ৰীজনে ভাষণ দি কয় যে আজি নিৰ্বাচন আয়োগে বিটিচি পৰিষদীয় নিৰ্বাচনৰ দিনত ঘোষণা কৰিলে । মিত্ৰদল বিপিএফক আক্ৰমণ কৰি তেওঁ প্ৰশ্ন কৰে, ‘আমি বিগত সময়ছোৱাত বিটিচিৰ উন্নয়নৰ বাবে সকলো প্ৰকাৰে সহায়-সহযোগিতা কৰিলো । প্ৰতি বছৰে কোটি কোটি টকা দিয়া হ’ল বিটিচিলৈ; কিন্তু সেয়া অনুসৰি ক’ত কি উন্নয়ন হ’ল ?
যোৱা তিনিটা বছৰৰ পৰা ৰাজ্যিক বিজেপিৰ সভাপতি ৰঞ্জিত দাসে বিটিচিৰ লোকে কিদৰে বসবাস কৰি আছে সেয়া জনাৰ বাবে অসম চৰকাৰ আৰু কেন্দ্ৰীয় চৰকাৰক কৈ আছিল । গতিকে এতিয়া আমি বিটিচিত সোমাই সকলো জানিব পাৰিলো । বিপিএফে কেন্দ্ৰীয় চৰকাৰৰ পৰা বছৰি কোটি টকা লৈ কি কৰে তিৰ কোনো হিচাপ নাই । বাট-পথৰ কামকে ধৰি সকলো আঁচনিৰ ধন আমি দিবলগীয়া হৈছে; কিন্তু বিটিচিলৈ অহা ধনেৰে কি কৰিলে ?
সকলো ক্ষেত্ৰতে বিপিএফক টকা দিব লাগে, টকা নিদিলে কোনো কামেই নহয় । কেন্দ্ৰীয় তথা ৰাজ্য চৰকাৰৰ আঁচনিৰ নামতো ঘোচ দিব লাগে । সেয়ে মই বিপিএফক মেকুৰী পাৰ্টি নাম দিছো ।’ তেওঁ পুনৰ কয় যে দিল্লীৰ পৰা পিঠা পঠিয়াইছে, দিছপুৰৰ পৰা পিঠা পঠিয়াইছে, হাগ্ৰামা মহিলাৰীৰ মেকুৰী ভিচিডিয়ে এই ইিঠা খাই পেলাইছে । ‘হাগ্ৰামা দুৰ্নীতিৰ ভিচিডিক দাণ্ডা মাৰি খেদিব লাগিব। অহা ২১ বা ২২ত বিটিচিলৈ অহা টকাৰ ঘিচাপ দিম । ৰাইজক সকলো টকাৰ হিচাপ দিব লাগিব ।
হাগ্ৰামাই কয় যে হিমন্ত আৰু ৰঞ্জিত দাসক বিটিচিত সোমাব দিব নালাগে । এই বিটিচি তেওঁৰ বাবাৰ বিটিচি নেকি ? বিটিচি ভাৰতৰ, অসমৰ । ইয়াত সকলোৰে অধিকাৰ আছে আৰু থাকিব ।’ এইদৰে মন্তব্য কৰি ড° শৰ্মাই কয় যে সদ্য সম্পন্ন বিটিআৰ চুক্তিৰ দ্বাৰা ৰাইজে বিচাৰিলে গাঁও কৰ্তন আৰু অন্তৰ্ভুক্তি হ’ব । তেওঁ কয় যে অসমত কোনো বিভাজন নহ’ব । একেখন অসমত এই চুক্তি মতে সকলোৱে থাকিব লাগিব । পুনৰ মন্ত্ৰী ব্ৰহ্মক আক্ৰমণ কৰি শৰ্মাই কয়, ‘চন্দন ব্ৰহ্মই বিটিচি চুক্তিৰে জধে-মধে গাঁও সুমুৱাইছিল, সেই কাম আৰু এতিয়া কৰিব নোৱাৰিব ।
১৯৮৫ৰ পৰা হোৱা পৃথক ৰাজ্যৰ দাবী আন্দোলন বিটিআৰ চুক্তিৰ জৰিয়তে শেষ কৰিলো । আজি বিপিএফে আৰক্ষীক ব্যৱহাৰ কৰে । গতিকে পুলিচেও এতিয়া বিপিএফৰ কথা নুশুনিব, মই কৈছো । হাগ্ৰামা আৰু চন্দনেও পুলিচৰ ভয় দেখুৱাব নোৱাৰিব । ৰাইজৰ লগতহে পুলিচ থাকিব লাগিব । বিটিচিত ৰাজনৈতিক হত্যা হয় । ৰাইজে বিইিএফক ন্যায় নিদিলে । বিইিএফ সকলোৰে শত্ৰু । ৰজনৈতিক হত্যা কৰা হ’ল লাফিকুলক । আমি এইবাৰ চি বি আইক অনুৰোধ কৰিছো লাফিকুল হত্যাৰ সকলো তথ্য ৰাজহুৱা কৰাৰ বাবে । হাগ্ৰামাক ভয় কৰাৰ দিন গ’ল ।’ ড° শৰ্মাই কয় যে প্ৰতি বছৰে এহেজাৰৰ পৰা ১৫ শ কোটি টকা তেওঁলোকে বিটিচিক দি আহিছে । বিটিচিত আজিলৈ অন্যান্য জাতি-গোষ্ঠীৰ লৈকে মাটিৰ পাট্টা পোৱা নাই ।
