নেপালত তিনি হেজাৰ মিটাৰ উচ্চতাত এইবাৰ দেখিবলৈ পােৱা গৈছে বাঘ। কৰ’না সংক্রমণক বাধা দিবলৈ চলিত বৰ্ষত দীর্ঘ সময় ধৰি বিশ্বত ঘােষণা কৰা তলাবন্ধৰ ফলত পৰিৱেশৰ উন্নতি হৈছিল বুলি দাবী কৰা হৈছিল যদিও এতিয়া হিমালয়ৰ পাদদেশলৈ বাঘৰ বিচৰণ আৰম্ভ হােৱাত উদ্বেগৰ সৃষ্টি হৈছে। উষ্ণতা বৃদ্ধিৰ ফলত বাঘৰ বিচৰণ ইমান উচ্চতাতাে আৰম্ভ হােৱা বুলি ক’ব বিচাৰিছে পৰিৱেশবিদসকলে।
তলাবন্ধৰ ফলত মুক্ত পৰিৱেশৰ বাবে সমাদৃত নেপালত এতিয়া শীতৰ পৰিৱর্তে উষ্ণতা বৃদ্ধি পােৱা পৰিলক্ষিত হৈছে। নেপালৰ দুটাকৈ মন্ত্রণালয়ে দেশখনৰ উচ্চ অঞ্চলত বাঘৰ উপস্থিতিৰ সন্দৰ্ভত ইতিমধ্যে এক প্ৰেছ বিবৃতিও প্রকাশ কৰিছে।
প্ৰেছ বিবৃতিত উল্লেখ কৰা হৈছে যে নেপালৰ পূব অংশৰ ইলাম জিলাৰ জংঘলত ৩১৬৫ মিটাৰ উচ্চতাত যােৱা ১৩ৰ পৰা ২১ নৱেম্বৰৰ মাজৰ সময়ছােৱাত ৰয়েল বেংগল টাইগাৰ প্ৰজাতিৰ এটা বাঘ দেখিবলৈ পােৱা যায়। শাৰীৰিকভাৱে সমগ্র এছিয়াৰ ভিতৰতে বৃহৎ এই প্রজাতিৰ বাঘক প্রথমবাৰৰ বাবে নেপালৰ উক্ত বন ভূমিত দেখিবলৈ পােৱাৰ কথাও বিবৃতিটোত স্পষ্ট কৰি দিয়া হৈছে।
বিশ্বত উষ্ণতা বৃদ্ধি পােৱাৰ ফলতে বাঘটো ইমান সুউচ্চ স্থানলৈ যােৱা বুলিও অনুমান কৰা হৈছে। নেপালৰ বন আৰু ভূমি সংৰক্ষণ তথা ৰাষ্ট্ৰীয় উদ্যান আৰু বন্যপ্রাণী সংৰক্ষণ মন্ত্রণালয়ৰ তৰফৰ পৰা এই বিবৃতি জাৰি কৰা হৈছিল। ইলাম জিলাৰ উক্ত জংঘলত বন্যপ্রাণীৰ গতিবিধিৰ ওপৰত দৃষ্টি ৰাখিব পৰাকৈ কেমেৰা সংলগ্ন কৰা আছিল।
যােৱা ১৩ৰ পৰা ২১ নৱেম্বৰৰ ভিতৰত এই কেমেৰাত একাধিকবাৰ আবদ্ধ হৈছিল বাঘটোৰ গতিবিধিৰ ছবি। হিমালয়ৰ উক্ত অঞ্চলত বাঘৰ গতিবিধি ধৰা পৰাৰ পৰা প্রশাসন অধিক সতর্ক হৈ পৰিছে। বাঘটোৰ প্রতিটো গতিবিধিৰ ওপৰত দৃষ্টি ৰখাৰাে চেষ্টা কৰা হৈছে।
কাঞ্চনজংঘাৰ পাদদেশৰ পৰা ভাৰতৰ উত্তৰ ছিকিমৰ ছিংগিলা ৰাষ্ট্ৰীয় উদ্যান তথা উত্তৰংগৰ ডুৱাৰ্ছ পর্যন্ত বিস্তৃত উক্ত অঞ্চলত আৰু অধিক টেকীয়াপতীয়া বাঘ থাকিব পাৰে বুলিও অনুমান কৰা হৈছে। অঞ্চলটোৰ স্থানীয় লােকসকলে এই ঘটনাক লৈ আনন্দিত যদিও চিন্তিত হৈ পৰিছে পৰিৱেশবিদসকল। এই ঘটনাই ভয়াৱহ ভৱিষ্যতৰ ইংগিত বহন কৰিছে বুলিও ক’ব বিচাৰিছে পৰিৱেশবিদসকলে।
