Champions League:চেম্পিয়নছ লীগৰ জয়ৰ উদযাপনক কেন্দ্ৰ কৰি যুদ্ধক্ষেত্ৰলৈ পৰিণত হয় পেৰিছ ।এই ঘটনাত কমেও দুজন লোকে প্ৰাণ হেৰুৱালে। আহতসকলৰ সংখ্যা ২০০ অতিক্ৰম কৰিছে।
ফ্ৰান্সৰ ৰাজধানীত গ্ৰেপ্তাৰ হৈছে কমেও ৫৫০ জন লোক। শনিবাৰে মিউনিখত ইণ্টাৰ মিলানক ৫-০ গ’লত পৰাস্ত কৰি পেৰিছ চেণ্ট জাৰ্মেইনে প্ৰথমবাৰৰ বাবে চেম্পিয়নছ লীগ জয় কৰে।
পেৰিছৰ দুখন ষ্টেডিয়ামত পোনপটীয়াকৈ সম্প্ৰচাৰিত হৈছিল খেলখন। খেলখন চাবলৈ কমেও ৫০ হেজাৰ পি এছ জি অনুৰাগী ষ্টেডিয়ামত উপস্থিত হয়।
খেলৰ পাছত হুলস্থলীয়া পৰিস্থিতিৰ আশংকাত ষ্টেডিয়াম দুখনৰ বাহিৰত আগতীয়াকৈ বৃহৎ সংখ্যক আৰক্ষী মোতায়েন কৰা হয়। যদিও মেচ শেষ হোৱাৰ পাছত ৰাইজৰ সন্মুখত আৰক্ষী কাৰ্যত অদৃশ্য হৈ পৰিল।
মেচখনৰ লগে লগে পেৰিছৰ দৰ্শকে ৰাজপথলৈ ওলাই আহি উন্মুক্ত হৈ উদযাপন কৰে। পৰিস্থিতি নিয়ন্ত্ৰণ কৰিবলৈ আৰক্ষীয়ে কেবাটাও ৰাউণ্ড কন্দুৱা গেছ নিক্ষেপ কৰে। যদিও তাৰ কোনো লাভ নহ’ল। উদযাপনৰ নামত কেবাখনো গাড়ীত জুই লগাই দিয়া হয়।
জ্বলাই দিয়া হয় একাধিক বাছ ষ্টেণ্ডৰ লগতে একাধিক চৰকাৰী আন্তঃগাঁথনি।আৰক্ষীৰ ওপৰত মশাল নিক্ষেপ কৰা হয়। গোটেই নিশা এশৰো অধিক ঠাইত অগ্নিকাণ্ড সংঘটিত হয়।
পেৰিছৰ যুদ্ধক্ষেত্ৰত এনে ভয়ানক উদযাপনৰ সময়ত দুজন লোকৰ মৃত্যু হয়।পেৰিছ প্ৰশাসনৰ সূত্ৰ অনুসৰি এজন ১৭ বছৰীয়া কিশোৰক হানি খুচি কৰি হত্যা কৰা হৈছে।
অৱশ্যে চেম্পিয়নছ ট্ৰফী জয় কৰাৰ উদযাপনৰ স’তে এই ঘটনাৰ কোনো সম্পৰ্ক আছে নে নাই সেই বিষয়ে তদন্ত চলি আছে। লগতে উদযাপনৰ সময়ত গাড়ীয়ে খুন্দা মৰাৰ ফলত এজন লোকৰ মৃত্যু হয়।