বিধিয়ে দিলেও বিধাতাই নিদিয়ে

ৰাইজৰ সহায়ৰ আহ্বান দুৰ্ভগীয়া পিতৃ মাতৃৰ

তিনিচুকীয়া জিলাৰ ডুমডুমা বিধানসভা সমষ্টিৰ অন্তৰ্গত ডুমডুমাৰ ৰূপৱন গাৱঁৰ নৰেন কোঁৱৰ আৰু ৰুনু কোঁৱৰৰ একমাত্ৰ কন্যা তথা ডুমডুমা মহাবিদ্যালয়ৰ পৰা কলা শাখাত অসমীয়াত সন্মানসহ স্নাতক ডিগ্ৰীত সুখ্যাতিৰে উৰ্ত্তীণ হোৱা মেধাৱী ছাত্ৰী পল্লবী কোঁৱৰ (২৩) বৰ্তমান ’কিডনী’ জটিল ৰোগত আক্ৰান্ত হৈ চিকিৎসালয়ত ভৰ্তি হ’বলগীয়া হোৱাৰ ঘটনাই ছাত্ৰীগৰাকীৰ গাঁওবাসীৰ লগতে ডুমডুমাৰ ছাত্ৰ সমাজত শোকৰ ছাঁ পেলাইছে ৷

উল্লেখ্য যে যোৱা সাত ডিচেম্বৰ সন্ধিয়া পল্লবী কোঁৱৰে উশাহ লোৱাত কষ্ট অনুভৱ কৰাত জ্যেষ্ঠ ভাতৃ পংকজ কোঁৱৰে ভগ্নী পল্লবীক ডুমডুমা নগৰৰ গান্ধী চ’ক সমীপৰ ডা° বি কে হাজৰিকা ক্লিনিকলৈ লৈ যায় ৷ ডা° বি কে হাজৰিকাই পল্লবীৰ স্বাস্থ্য পৰীক্ষা কৰি সামূহিক সকাহৰ বাবে ঔষধ লিখি দিয়াৰ লগতে তৎকালে দুটা ডাইগ’নাষ্টিক টেষ্ট কৰিবলৈ পৰামৰ্শ দিয়ে ৷

তেনেই দৰিদ্ৰ পৰিয়ালত জন্ম গ্ৰহণ কৰা পল্লবীক যোৱা ন ডিচেম্বৰত এছ আৰ এলত ডাইগ’নাষ্টিক টেষ্ট কৰোৱাই জ্যেষ্ঠ ভাতৃ পংকজ কোঁৱৰে ৷ পিছদিনা ১০ ডিচেম্বৰ বিয়লি পল্লবীৰ ডাইগ’নাষ্টিক টেষ্টৰ ৰিপ’ৰ্ট আহি পোৱাৰ পিচত ১১ ডিচেম্বৰ বিয়লি ডা° বি কে হাজৰিকাই ডাইগ’নাষ্টিক ৰিপ’ৰ্টসমূহ চাই পল্লবীক ‘কিডনী’ ৰোগী বুলি ঘোষণা কৰি সেইদিনাই ডিব্ৰুগড় অসম চিকিৎসা মহাবিদ্যালয় হস্পিতাললৈ যোৱাৰ পৰামৰ্শ দিয়ে ৷

ইয়াৰ পাছতে পল্লবীক ততাতৈয়াকৈ ডিব্ৰুগড়ৰ সৃষ্টি হস্পিতাল এণ্ড ৰিচাৰ্ছ চেন্টাৰলৈ লৈ যোৱা হয় ৷ সৃষ্টি হস্পিতাল এণ্ড ৰিচাৰ্ছ চেন্টাৰৰ চিকিৎসকে পল্লবীক দুটা ডায়’লচিছ কৰি ১৫ ডিচেম্বৰত চুটি দিয়ে ৷ উল্লেখ্য যে সৃষ্টি হস্পিতাল এণ্ড ৰিচাৰ্ছ চেন্টাৰৰ পৰা চুটি পোৱাৰ দিনাই অৰ্থাৎ ১৫ ডিচেম্বৰত পল্লবীক ডিব্ৰুগড় অসম চিকিৎসা মহাবিদ্যালয় হস্পিতালৰ নিউৰ’লজি বিভাগৰ বিশেষজ্ঞ চিকিৎসকৰ ওচৰলৈ লৈ যায় যদিও মহাবিদ্যালয় হস্পিতালখনত ৰোগীৰ আসানৰ অভাৱত পল্লবীক ভৰ্তি কৰোৱাবলৈ সক্ষম নহয় ৷

উপায়ন্তৰ হৈ দুৰ্ভগীয়া পিতৃ মাতৃয়ে পল্লবীক ডিব্ৰুগড়ৰ সম্পৰ্কীয় খুড়ীয়েকৰ বাসগৃহত ৰাখি ‘ডায়’লচিছ’ৰ ব্যৱস্থা কৰিবলগীয়া হৈছে ৷ দুৰ্ভগীয়া পল্লবীৰ ব্যয়বহুল চিকিৎসাৰ খৰচ বহন কৰাটো এতিয়া পিতৃ মাতৃদ্বয়ৰ বাবে পানীত হাঁহ-নচৰা অৱস্থা হৈ পৰিছে ৷ ৰাইজৰ সহায়ৰ অবিহনে পল্লবীৰ ব্যয়বহুল চিকিৎসা অসম্ভৱ হৈ পৰা দুৰ্ভগীয়া পিতৃ মাতৃ আৰু জ্যেষ্ঠ ভাতৃয়ে সদাশয় ৰাইজক পাৰ্যমানে আৰ্থিক সাহায্য আগবঢ়োৱাৰ বিনম্ৰ আহ্বান জনাইছে ৷

উল্লেখ্য পল্লবী কোঁৱৰৰ পিতৃ নৰেন কোঁৱৰে জীৱিকাৰ তাৰণাত অৰুণাচল প্ৰদেশৰ ডায়ুন প্লাইউদ ফেক্টৰীত কাম কৰি লাভ কৰা সামান্য টকাৰে পল্লবী আৰু জ্যেষ্ঠ পুত্ৰ পংকজক পঢ়াৰ খৰচৰ লগতে পৰিয়ালটো পোহপাল দি আহিছিল ৷ পিতৃৰ কষ্ট সহ্য কৰিব নোৱাৰি পুত্ৰ পংকজে ডুমডুমা নগৰত পুৱাৰ পৰা গধূলিলৈ ই-ৰিক্সা চলাই ভগ্নীৰ পঢ়াৰ খৰচ উলিয়াই দিছিল ৷

সেইমতে পল্লবীয়ে বিগত বৰ্ষত ডুমডুমা মহাবিদ্যালয়ৰ পৰা কলা শাখাত অসমীয়াত সন্মানসহ স্নাতক ডিগ্ৰী পৰীক্ষাত সুখ্যাতিৰে উৰ্ত্তীণ হ’বলৈ সক্ষম হৈছিল ৷ পল্লবীয়ে ডিব্ৰুগড় বিশ্ববিদ্যালয়ত অসমীয়া বিভাগত স্নাতকোত্তৰ ডিগ্ৰী লোৱাৰ মন আছিল ৷ সেইবাবেই মাতৃক পল্লবীয়ে প্ৰায়েই কৈছিল, ‘মই এমএ পঢ়িম ৷ মোৰ কাৰণে চিন্তা নকৰিব ৷ মই শ্ৰমদান কৰি হ’লেও এমএ পঢ়িবলৈ খৰচ উলিয়াই ল’ম ৷’

এই লক্ষ্যৰে পল্লবীয়ে ডুমডুমাৰ নাতি দূৰৈত অৱস্থিত ৰূপাই চাইডিঙৰ ‘আৰটিপি’ নামৰ ক্ষুদ্ৰ চাহ ফেক্টৰী এটাৰ কাৰ্যালয়ত কাম কৰিবলৈ লৈছিল ৷ ক্ষুদ্ৰ চাহ ফেক্টৰীটোত কাম কৰি লাভ কৰা টকাৰে পল্লবীয়ে আগন্তুক বৰ্ষত ডিব্ৰুগড় বিশ্ববিদ্যালয়ত এমএ-ত নাম ভৰ্তি কৰাৰ কথা আছিল ৷ কিন্তু বিধিয়ে দিলেও বিধাতাই নিদিয়ে আপ্তবাক্য ফাঁকিয়ে পল্লবীৰ এমএ পঢ়াৰ সপোন নিমিখতে থানবান কৰি দিলে ।