অসমৰ সাজ-পোছাকৰ মাজত নৱ প্ৰজন্মৰ বাবে আছে প্ৰচূৰ সম্ভাৱনীয়তাঃ প্ৰিয়ংকা ডি পাটোৱাৰী
২০২১-এ থলুৱা উদ্যোগ বহল কৰি তোলক
অসমীয়া পৰম্পৰাগত সাজ-পোছাকৰ প্ৰতি তৰুণ প্ৰজন্মৰ আকৰ্ষণ বৃদ্ধি নিঃসন্দেহে আনন্দৰ বিষয় এই পৰম্পৰাগত সাজ-পোছাকে একে সময়তে থলুৱা উদ্যোগীসকলৰ বাবে সংস্থাপনৰ এক বৃহৎ দুৱাৰ মুকলি কৰি দিছে । এনে উদ্যোগৰ স’তে জড়িত হৈছে প্ৰিয়ংকা ডি পাটোৱাৰীৰ দৰে হস্তশিল্প আৰু বস্ত্ৰ ডিজাইনিংত দক্ষতা অৰ্জন কৰা তৰুণ প্ৰজন্মৰ ফেশ্বন ডিজাইনাৰ । এনে তৰুণচাম জড়িত হোৱাৰ বাবে অসমৰ পৰম্পৰাগত সাজ-পোছাক পৰিধানৰ বাবে স্বাভাৱিকতে এক প্ৰজন্ম উৎসাহিত হৈছে । প্ৰিয়ংকাৰ দৰে থলুৱা উদ্যোগীসকলৰ বাবে ২০২১ বৰ্ষটো হ’ব এক পৰম আকাংক্ষাৰ বৰ্ষ । কিয়নো ২০২০ বৰ্ষই বিশ্বলৈ নমাই আনিলে অমানিশা । কৰ’না অতিমাৰীয়ে স্বাৱলম্বী হৈ জীৱন যাত্ৰাত আগবাঢ়িব বিচৰাসকলৰ সন্মুখত তীব্ৰ প্ৰত্যাহ্বানৰ সৃষ্টি কৰিলে । বিশ্ব তথা দেশ তথা ৰাজ্যৰ ৰুগাক্ৰান্ত অৰ্থনীতিয়ে এইসকলৰ বাবেও অভিশাপ হৈ পৰিল । স্বাভাৱিকতে নতুন বছৰত কলা ডাৱৰ আঁতৰি নতুন সপোন ৰচিব পাৰিব বুলি তেওঁলোকে আশা কৰিছিল ।
প্ৰিয়ংকাই কয়, ‘২০২১ত অসমত নতুনত্ব বিচাৰিছো । অতি একান্তভাৱে বিচাৰিছো যে ৰাজ্যৰ থলুৱা ব্যৱসায়ৰ উন্নতি সাধন হয় । মই ভাবো আমাৰ ইয়াৰ কেঁচা সামগ্ৰীসমূহ আন দেশলৈ প্ৰেৰণ কৰাতকৈ নিজে ব্যৱহাৰোপযোগী কৰিব লাগে । তদুপৰি আমি আশা কৰো যে সময়ৰ উপযোগিতাৰ স’তে আগবাঢ়ি গৈ অনলাইন ব্যৱসায়ৰ স’তে যাতে সকলোৱে পৰিচিত হ’ব পাৰে ।’
২০২১ত সাজ-পোছাকৰ লগতে আ-অলংকাৰ, চেণ্ডেল বা অন্যান্য প্ৰয়োজনীয় সামগ্ৰীসমূহ যোগান ধৰাৰ পৰিকল্পনা কৰিছে প্ৰিয়ংকাই । ইয়াৰ দ্বাৰা সকলো যুৱতী-মহিলা উপকৃত হ’ব বুলি তেওঁ আশা প্ৰকাশ কৰে । তদুপৰি ৰাজ্যৰ সকলো জাতি-জনগোষ্ঠীৰ পোছাকৰ আলম লৈ নতুন ৰূপ দিয়াৰ পৰিকল্পনা কৰিছে প্ৰিয়ংকাই । এই সামগ্ৰীসমূহ বিশেষকৈ তৰুণ প্ৰজন্মই যাতে ক্ৰয় কৰিবলৈ আগ্ৰহী হয় তাৰ প্ৰতি তেওঁ বিশেষ লক্ষ্য ৰাখিব । ইয়াৰ দ্বাৰা আমাৰ পৰম্পৰাগত , জাতি-জনগোষ্ঠীৰ সাজ-পোছাক অধিক প্ৰসাৰিত হ’ব বুলি তেওঁ আশা প্ৰকাশ কৰে ।
সন্মুখত আছে বহু কাম আৰু তাৰ বাবে তেওঁ ২০২১ৰ বাবে সাজু হৈছে । ‘এইবাৰ গৃহসজ্জাত গুৰুত্ব দিম বুলি ভাবিছো । চোফা ক’ভাৰ, গাৰুৰ ক’ভাৰ আদি অসমীয়া পাট কাপোৰ, মুগাৰে ন ৰূপত সজোৱাৰ প্ৰয়াস কৰিম । আশাকৰো সকলোৱে ভাল পাব ।’
এগৰাকী থলুৱা উদ্যোগী প্ৰিয়ংকাই নৱ প্ৰজন্ম অধিক ৰূপত এই ব্যৱসায়ৰ স’তে জড়িত হোৱাটো আকাংক্ষিত বুলি কয় । ‘মই যিহেতু অসমৰ থলুৱা ব্যৱসায়ৰ স’তে জড়িত সেই বাবে নৱ প্ৰজন্মক ক’ব বিচাৰো যে আমাৰ অসমত সাজ-পোছাকৰ ক্ষেত্ৰত প্ৰচুৰ সম্ভাৱনীয়তা লুকাই আছে । সেইসমূহক মাথোঁ আধুনিক ৰূপত উপস্থাপন কৰাৰ প্ৰয়োজন আছে । মই ভাবো নৱপ্ৰজন্মই অসমৰ থলুৱা শিল্পক উন্নত মানত সজাই নিজকে প্ৰতিষ্ঠা কৰাৰ লগতে বিশ্ব দৰবাৰত অসমক চিনাকি কৰাওক । ২০২১-এ ইয়াৰ বাট বহল কৰিব বুলি মই আশাবাদী ।’
প্ৰিয়ংকাৰ ‘উঘা এথনিকছ’ নামৰ বুটিকখন অসমীয়া পৰম্পৰাগত সাজ-পোছাকৰ ক্ষেত্ৰত এক জনপ্ৰিয় লেবেলৰূপে ইতিমধ্যে পৰিচিতি লাভ কৰিছে । ফেশ্বন আৰু ডিজাইনিংৰ প্ৰতি থকা প্ৰিয়ংকাৰ আৱেগে তেওঁক সফলতাৰ বাটলৈ আগুৱাই লৈ গৈছে । সৰুৰে পৰা তেওঁৰ এই বিষয়ত আগ্ৰহ আছিল । ফেশ্বন ডিজাইনাৰ হোৱাৰ আশা বান্ধি তেওঁ আগবাঢ়ি গৈছিল । জে ডি ইনষ্টিটিউট অৱ ফেশ্বন টেকন’ল’জীৰ পৰা তেওঁ ডিপ্ল’মা গ্ৰহণ কৰে । একে সময়তে তেওঁ স্নাতক ডিগ্ৰীও লাভ কৰে আৰু পৰৱৰ্তী পৰ্যায়ত স্নাতকোত্তৰ ডিগ্ৰীও অৰ্জন কৰে । হস্ততাঁত আৰু বস্ত্ৰ ডিজাইনিংৰ বিষয়ে তেওঁ পেছাদাৰী জ্ঞান আহৰণ কৰে । বিভিন্ন ধৰণৰ কাপোৰত ৰং কৰাৰ প্ৰক্ৰিয়া আদি সম্পৰ্কেও শিক্ষা গ্ৰহণ কৰে ।
ভাৰত চৰকাৰৰ বস্ত্ৰ উদ্যোগ মন্ত্ৰণালয়ৰ অধীনত তেওঁ এই বিশেষ দক্ষতা অৰ্জন কৰে । মন্ত্ৰণালয়ে তেওঁক গাঁও অঞ্চলত প্ৰশিক্ষণৰ বাবে ব্লক ক্লাষ্টাৰৰ মূল প্ৰশিক্ষকৰূপেও নিৰ্বাচিত কৰিছিল । ২০১৪ত মাত্ৰ দুখন শালেৰে তেওঁ মহানগৰীত আৰম্ভ কৰে উঘা এথনিকছ নামৰ প্ৰতিষ্ঠানটো । সম্প্ৰতি তেওঁৰ আছে ৩০ খন শাল আৰু ৩০ গৰাকী শিপিনীক তেওঁ সংস্থাপন দিবলৈ সক্ষম হৈছে । তেওঁ কয় যে উঘা এথনিকছ মাত্ৰ এটা প্ৰতিষ্ঠান নহয় ই এটা পৰিয়াল যিয়ে এজনে আনজনক মানসিকভাৱে সমৰ্থন কৰে । তেওঁৰ এই প্ৰতিষ্ঠানত পাট, মুগাকে আদি কৰি নানা তৰহৰ বস্ত্ৰ শিল্পৰ চানেকি উপলব্ধ । তেওঁ নানা ধৰণৰ পৰ্দা, কুচন ক’ভাৰ, শাল আদিৰ উপৰি গৃহসজ্জাৰ সামগ্ৰীও প্ৰস্তুত কৰে । পাট-মুগা-টছৰ কাপোৰৰ উপৰি আন বহুতো আকৰ্ষণীয় সামগ্ৰী উপলব্ধ হয় এই প্ৰতিষ্ঠানত । তদুপৰি নানা পুৰস্কাৰেৰেও বিভূষিত হৈছে এইগৰাকী ডিজাইনাৰ আৰু তেওঁৰ প্ৰতিষ্ঠানটো ।