সামাজিক টিকাকৰণ আৰম্ভ হোৱাৰ লগে লগে দেশৰ মানুহৰ মনলৈ আহিছে স্বস্তিৰ ভাব । ইতিমধ্যে প্ৰায় স্বাভাৱিক অৱস্থালৈ ঘূৰি আহিছে সমগ্ৰ দেশ । তলাবন্ধৰ সময়ত দেশে দেখিছিল প্ৰদূষণমুক্ত পৰিৱেশ । কিন্তু ইয়াৰ পৰিৱৰ্তে দেশত হঠাৎ বৃদ্ধি পাইছে চিকিৎসা সামগ্ৰীৰ আবৰ্জনাৰ পৰিমাণ ।
বিগত ১০টা মাহত মানুহৰ মাজত বৃদ্ধি পাইছিল মাস্ক-পিপিই-গ্লাভছ্ আদি চিকিৎসা সৰঞ্জাম ব্যৱহাৰৰ অভ্যাস । সাধাৰণ মানুহেও ব্যাপক হাৰত ব্যৱহাৰ কৰিছিল এইবোৰ চিকিৎসা সৰঞ্জাম । কৰ’নাৰ ব্যাপকতাৰ ফলত যিদৰে বৃদ্ধি পাইছিল চিকিৎসা সেৱাৰ ব্যস্ততা, সেইদৰে ডাঙৰ হ’বলৈ ধৰিছিল চিকিৎসা সৰঞ্জামৰ আবৰ্জনাৰ দ’ম ।
কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ এক প্ৰতিবেদন অনুসৰি, যোৱা বছৰৰ জুনৰ পৰা ডিচেম্বৰ পৰ্যন্ত প্ৰায় ৩৩ হেজাৰ টন বায়’মেডিকেল আবৰ্জনা উৎপাদন কৰিছে ভাৰতে । ইয়াৰ ভিতৰত সবাতোকৈ বেছি আবৰ্জনা উৎপাদন হৈছে যোৱা অক্টোবৰত । সেই মাহত প্ৰায় পাঁচ হেজাৰ পাঁচশ টন আবৰ্জনা উৎপাদন হোৱা বুলি জনোৱা হৈছে উক্ত প্ৰতিবেদনত । সকলো ৰাজ্যৰ প্ৰদূষণ নিয়ন্ত্ৰণ ব’ৰ্ডৰ পৰা লাভ কৰা তথ্যৰ ভিত্তিতে উক্ত প্ৰতিবেদন প্ৰস্তুত কৰা হৈছে ।
ৰাজ্যসমূহৰ ভিতৰত চিকিৎসা আবৰ্জনাৰ শীৰ্ষত আছে মহাৰাষ্ট্ৰ । দেশৰ ভিতৰত মহাৰাষ্ট্ৰতে ক’ভিড আক্ৰান্ত লোকৰ সংখ্যা সৰ্বাধিক । বিগত জুনৰ পৰা মহাৰাষ্ট্ৰই উৎপাদন কৰিছে তিনি হেজাৰ ৫৮৭ টন আবৰ্জনা । সকলো ৰাজ্য মিলাই উৎপাদিত আবৰ্জনাৰ পৰিমাণ হৈছে ৩২ হেজাৰ ৯৯৪ কোটি ।
প্ৰতিবেদনত লগতে উল্লেখ কৰা হৈছে যে দেশৰ মুঠ ১৯৮টা ‘বায়’মেডিকেল ৱাষ্ট ট্ৰিটমেণ্ট ফেচিলিটী’ত এই আবৰ্জনাসমূহ নষ্ট কৰা হৈছে । এই বায়’মেডিকেল আবৰ্জনাৰ ভিতৰত এফালে যিদৰে আছে মাস্ক, পিপিই কিট, গ্লাভছ্ আৰু জোতাৰ ক’ভাৰ, সেইদৰেই আনফালে আছে মানৱ দেহৰ টিছ্যু, তুলা, ড্ৰেছিং কৰা বেণ্ডেজসহ আৰু বিভিন্ন সৰঞ্জাম ।
মহাৰাষ্ট্ৰৰ উপৰি এই তালিকাত ওপৰৰ ফালে আছে পশ্চিমবংগ, কেৰালা, গুজৰাট, তামিলনাডু, উত্তৰপ্ৰদেশ, দিল্লী, কৰ্ণাটক আদিৰ নাম । যোৱা ডিচেম্বৰতেই সমগ্ৰ দেশত প্ৰায় চাৰি হেজাৰ ৫৩০ টন আবৰ্জনা উৎপাদন হোৱা বুলি প্ৰতিবেদনত জনোৱা হৈছে, যিবোৰে পৰিৱেশ প্ৰদূষণ বৃদ্ধি কৰিব বুলিও আশংকা কৰিছে পৰিৱেশবিদসকলে ।
বিগত বৰ্ষৰ মাৰ্চৰ পৰা দেশজুৰি ক’ভিড আক্ৰান্তৰ সংখ্যা বৃদ্ধিৰ সময়তে এই ধৰণৰ বায়’মেডিকেল আবৰ্জনাসমূহৰ সঠিক প্ৰক্ৰিয়াকৰণৰ বাবে কেন্দ্ৰীয় প্ৰদূষণ নিয়ন্ত্ৰণ ব’ৰ্ডে কেতবোৰ নিৰ্দেশনা জাৰি কৰিছে । ইয়াৰ উপৰি ব’ৰ্ডে ক’ভিড১৯বিডব্লিউএম নামৰ এটা ম’বাইল এপ্ বজাৰলৈ আনে । কৰ’না ভাইৰাছ সংক্ৰান্তীয় বায়’মেডিকেল আবৰ্জনাৰ সঠিক প্ৰক্ৰিয়াকৰণ হৈছে নে নাই, সেই ক্ষেত্ৰত উক্ত এপৰ মাধ্যমেৰে দৃষ্টি ৰখাও আৰম্ভ হয় ।