Ranveer Allahbadia:
জনপ্ৰিয় ইউটিউবাৰ পদকাষ্টাৰ ৰণবীৰ এলাহাবাদিয়াৰ বিতৰ্কিত মন্তব্যই দেশত তোলপাৰ লগাইছে। অসমৰ পৰা মহাৰাষ্ট্ৰলৈকে, সমগ্ৰ দেশৰ কেবাখনো আৰক্ষী থানাত এজাহাৰ পঞ্জীয়ন কৰা হৈছে। এই অভিযোগৰ পৰা পৰিত্ৰাণ পাবলৈ উচ্চতম ন্যায়ালয়ৰ কাষ চাপিছে ইউটিউবাৰ ৰণবীৰ।
তথ্য অনুসৰি দেশৰ বিভিন্ন প্ৰান্তত ৰণবীৰৰ বিৰুদ্ধে কেবাটাও অভিযোগ দাখিল কৰা হৈছে। তেওঁ শীৰ্ষ আদালতক তেওঁলোকৰ প্ৰত্যেককে বৰ্খাস্ত কৰিবলৈ আবেদন কৰিছে। তেওঁ মুখ্য ন্যায়াধীশ সঞ্জীৱ খান্নাৰ ওচৰত গোচৰটোৰ জৰুৰী শুনানিৰ বাবে আবেদন কৰে। কিন্তু মুখ্য ন্যায়াধীশে আগতীয়া শুনানিৰ আবেদন নাকচ কৰিছে ।
ইফালে শুক্ৰবাৰে অসম আৰক্ষীয়ে মাতি পঠিয়াইছে ৰণবীৰক। ৰণবীৰৰ উকীল অভিনৱ চন্দ্ৰচূড়ে জৰুৰী শুনানি বিচাৰিছে যদিও অনুৰোধটো গ্ৰহণ কৰা হোৱা নাই। উল্লেখ্য যে কিছুদিনৰ আগতে জনপ্ৰিয় ইউটিউবাৰ ৰণবীৰে ‘ইণ্ডিয়াজ গট লেটেণ্ট’ নামৰ এটা অনুষ্ঠানত যোগদান কৰে। তাত তেওঁ হঠাতে পিতৃ-মাতৃৰ যৌনতা ওপৰত বিতৰ্কিত মন্তব্য কৰে ।এই মন্তব্য পোহৰলৈ অহাৰ লগে লগে সমগ্ৰ দেশতে বিতৰ্কৰ সৃষ্টি হয়।
অসমৰ মুখ্যমন্ত্ৰী হিমন্ত বিশ্ব শৰ্মাই কয় যে, ৰাজ্যখনৰ আৰক্ষীয়ে ৰণবীৰকে ধৰি অনুষ্ঠানটোত উপস্থিত থকা কেইবাজনো লোকৰ বিৰুদ্ধে এজাহাৰ পঞ্জীয়ন কৰিছে। আনহাতে, মহাৰাষ্ট্ৰতটো ৰণবীৰৰ বিৰুদ্ধে এখন এজাহাৰ দাখিল কৰা হৈছে। মহাৰাষ্ট্ৰ মহিলা আৰু শিশু অধিকাৰ সুৰক্ষা আয়োগৰ ওচৰত এটা অভিযোগ দাখিল কৰা হৈছে।
অৱশ্যে, ছ’চিয়েল মিডিয়া তাৰকাগৰাকীয়ে ‘অনিচ্ছাকৃত’ মন্তব্যৰ বাবে ইতিমধ্যে সামাজিক মাধ্যমত ক্ষমা বিচাৰিছে। উল্লেখ্য যে, হঠাৎ হ্ৰাস পাইছে ৰণবীৰৰ অনুসৰণকাৰীৰ সংখ্যা । এই বিষয়টো সংসদতো উত্থাপন কৰা হৈছে। ইয়াৰ মাজতে, বেয়াৰ বাইচেপছে উচ্চতম ন্যায়ালয়ৰ কাষ চাপিছে। গোচৰটোৰ শুনানি অহা দুই-তিনি দিনৰ ভিতৰত হ’ব। আনহাতে, অসম আৰক্ষীৰ এটা বিশেষ দলও মুম্বাইত উপস্থিত হৈছে।
