চৰকাৰী হওক বা বেচৰকাৰী দৰমহাক লৈ কোনো দিনে অভিযোগৰ অন্ত নপৰে কৰ্মচাৰীৰ । কিন্তু এনে এক সংস্থা আছে য’ত নিবিচৰাকৈয়ে কৰ্মীসকলৰ বিপুল দৰমহা বৃদ্ধি কৰা হৈছে ক’ভিড পৰিস্থিতিৰ মাজতেই ।
কৰ্মচাৰীৰ দৰমহা বৃদ্ধি কৰিবৰ বাবে সংস্থাৰ প্ৰতিষ্ঠাতা তথা চিইঅ’ই নিজৰ দৰমহা বহু পৰিমাণে হ্ৰাস কৰি দিয়ে । সংস্থাৰ পৰা প্ৰতি বছৰে কৰ্মচাৰীসকলৰ সমানে দৰমহা গ্ৰহণ কৰে তেঁৱো ।
সংস্থাটোৰ নাম গ্ৰেভিটী পেমেণ্টছ । কাৰ্যালয়ত বন্ধুত্বসুলভ সিদ্ধান্ত গ্ৰহণ কৰি বিশ্বত চৰ্চাৰ বিষয় হৈ পৰিছে সংস্থাৰ চিইঅ’ ডেন প্ৰাইছ ।
ডেন প্ৰাইছে মাত্ৰ ১৯ বছৰ বয়সতে গ্ৰেভিটী পেমেণ্টছ সংস্থা আৰম্ভ কৰে । সেই সময়ত তেওঁ মহাবিদ্যালয়ত শিক্ষা গ্ৰহণ কৰি আছিল । মহাবিদ্যালয়ৰ এটা কোঠাৰ পৰাই আৰম্ভ হৈছিল গ্ৰেভিটী পেমেণ্টৰ যাত্ৰা ।
গ্ৰেভিটী পেমেণ্টছ এটা ক্ৰেডিট কাৰ্ড প্ৰ’ছেছিং সংস্থা । ২০০৪ত ডেন আৰু তেওঁৰ ভাতৃ লুকাছে সংস্থাটো প্ৰতিষ্ঠা কৰে ।
মাত্ৰ চাৰি বছৰৰ ভিতৰতেই ই ৱাশ্বিংটনৰ আটাইতকৈ বৃহৎ ক্ৰেডিট কাৰ্ড সংস্থাত পৰিণত হয় । সম্প্ৰতি সংস্থাটোৰ গ্ৰাহকৰ সংখ্যা ১৫ হেজাৰৰো অধিক ।
সংষ্ঠাটোৰ সদৰ কাৰ্যালয় ৱাশ্বিংটনৰ বালাৰ্ডত অৱস্থিত । দুশজন কৰ্মীচাৰীয়ে কাম কৰে এই সংস্থাত । ২০১৫ত এই সৰু সংস্থাটো সংবাদ মাধ্যমৰ দৃষ্টি আকৰ্ষণ কৰে যেতিয়া সংস্থাটোৰ চিইঅ’ ডেনে প্ৰত্যেক কৰ্মচাৰীৰ দৰমহা ৭০ হেজাৰ ডলাৰ কৰি দিয়াৰ কথা ঘোষণা কৰে ।
২০১৯ত তেওঁ প্ৰত্যেক কৰ্মচাৰীৰ দৰমহা ১০ হেজাৰ ডলাৰলৈ বৃদ্ধি কৰে । প্ৰতি বছৰেই এইদৰে দৰমহা বৃদ্ধি পাইছে কৰ্মচাৰীসকলৰ । ২০২৩ৰ লৈকে প্ৰতিজন কৰ্মচাৰীৰ দৰমহা বছৰে অন্ততঃ ৭০ হেজাৰ ডলাৰ কৰাৰ প্ৰতিশ্ৰুতি দিছে ডেনে ।
কঠিন সময়ত আৰু মূল্য বৃদ্ধি হোৱা পৰিস্থিতিত যাতে কোনো কৰ্মচাৰীয়েই সমস্যাত নপৰে তাৰ বাবেই এই সিদ্ধান্ত গ্ৰহণ কৰিছে ডেনে । ইয়াৰ বাবে তেওঁ নিজৰ বাৰ্ষিক দৰমহাও বহু পৰিমাণে হ্ৰাস কৰিছে ।
ডেনে বিগত বৰ্ষত সংস্থাৰ পৰা মাহে ১০ লাখ ডলাৰ দৰমহা গ্ৰহণ কৰিছিল । সম্প্ৰতি তেওঁ বছৰি ৭০ হেজাৰ ডলাৰ দৰমহা গ্ৰহণ কৰে । অৰ্থাৎ, ডেনে ন লাখ ৩০ হেজাৰ ডলাৰ, ভাৰতীয় মুদ্ৰাত প্ৰায় ছয় কোটি ৮০ লাখ টকা হ্ৰাস কৰিছে ।
কিন্তু ডেনৰ এই সিদ্ধান্তৰ স’তে একমত নহয় সংস্থাৰ সহ প্ৰতিষ্ঠাতা তথা তেওঁৰ ভাতৃ লুকাছ । সেয়ে দুয়োগৰাকীৰ মাজত আইনী যুদ্ধও চলে ।
দুয়ো ভাতৃৰ মাজত মতবিৰোধ থাকিলেও অন্তত এই সিদ্ধান্তত সংস্থাৰেই লাভ হয় । এই ঘোষণাৰ ফলত ২০১৪ত হোৱা লাভৰ তুলনাত দ্বিগুণ বৃদ্ধি হয় । ২০২০ত অতিমাৰীৰ প্ৰভাৱ পৰাৰ পূৰ্বে প্ৰতি মাহে ৪০ লাখ ডলাৰ আয় কৰিছিল সংস্থাটোৱে ।
ডেনৰ বৰ্তমান বয়স ৩৬ বছৰ । ৩১ বছৰ বয়সতে ডেন কোটিপতি হৈ পৰে । তেওঁৰ মতে, যিসকল ধনকুবেৰে নিজৰ আয়ৰ সামান্য অংশ দান কৰে বা নিজৰ নামত কোনো চিকিৎসালয় নিৰ্মাণ কৰে, সৰহ ভাগেই কৰ ফাঁকি দিয়াৰ উদ্দেশ্যে কৰে ।
