পুনৰ এছিয়াৰ ভিতৰতে আঢ্যবন্ত লোকৰ তালিকাত প্ৰথম স্থান দখল কৰিবলৈ সক্ষম হ’ল উদ্যোগপতি মুকেশ অম্বানী ।
বিগত বৰ্ষৰ শেষৰ ফালে চীনৰ উদ্যোগপতি জং ছানছানে এই শীৰ্ষ স্থান দখল কৰিবলৈ সফল হৈছিল । জঙৰ সম্পত্তিৰ মূল্য হঠাৎ ২২০০ কোটি মাৰ্কিন ডলাৰ কমি যোৱাত পুনৰ এছিয়াৰ ভিতৰতে শ্ৰেষ্ঠ আঢ্যবন্ত হ’ল ৰিলায়েন্স গোষ্ঠীৰ মুৰব্বী মুকেশ অম্বানী ।
বিগত দুবছৰ ধৰি এছিয়াৰ শ্ৰেষ্ঠ আঢ্যবন্তৰ তালিকাত শীৰ্ষ স্থানত অম্বানীৰে নাম আছিল । কিন্তু ২০২০ৰ শেষৰ ফালে ফ’ৰ্বছৰ তথ্য অনুসৰি শীৰ্ষ স্থানত থাকে জঙৰ নাম । অম্বানী তৃতীয় স্থানত আহি যায় । কিন্তু দুমাহৰ ভিতৰতেই নিজৰ পূৰ্বৰ স্থান দখল কৰে ৰিলায়েন্সে ।
জং চীনৰ এটা পানীয় সংস্থা নংফু স্প্ৰিঙৰ মুৰব্বী । জেক মাৰ দৰে চীনৰ প্ৰযুক্তি সংস্থাকো পিছ পেলাই শ্ৰেষ্ঠ আঢ্যবন্ত হিচাপে পৰিগণিত হয় তেওঁ । জানুৱাৰীত নংফু স্প্ৰিঙৰ শ্বেয়াৰে শিখৰ চুইছিল । কিন্তু যোৱা এসপ্তাহত হঠাৎ শ্বেয়াৰৰ দৰ ২০ শতাংশ কমি যায় ।
বিশ্বৰ অৰ্বুদপতিসকলৰ সম্পত্তি পৰ্যৱেক্ষণ কৰা সংস্থা, ব্লুম বাৰ্গৰ তথ্য অনুসৰি, অম্বানীৰ সম্পত্তিৰ মূল্য সম্প্ৰতি আঠ হেজাৰ কোটি মাৰ্কিন ডলাৰ । জঙৰ সম্পত্তিৰ মূল্য সাত হেজাৰ ৬৬০ কোটি মাৰ্কিন ডলাৰ ।
