আজি মুখ্যমন্ত্ৰী অৰবিন্দ কেজৰিৱালে জনায় যে, ৰাজধানী দিল্লীৰ কৰ’না পৰিস্থিতি নিয়ন্ত্ৰণ কৰিবৰ বাবে কমনৱেলথ গেমছ ভিলেজক ক’ভিড চিকিৎসালয়ত পৰিণত কৰা হ’ব । তেওঁ মন্তব্য কৰে যে, সংক্ৰমণ বৃদ্ধি পাইছে, সেয়ে ইতিমধ্যে দিল্লীৰ চিকিৎসালয়সমূহৰ ৯০ শতাংশ আইচিইউ ভৰ্তি হৈ পৰিছে আৰু অক্সিজেনৰো নাটনি হৈছে । পৰিস্থিতি সন্দৰ্ভত গভীৰভাৱে চিন্তিত মুখ্যমন্ত্ৰী কেজৰিৱাল ।
আজিৰ এক জৰুৰী বৈঠকৰ অন্তত মুখ্যমন্ত্ৰীগৰাকীয়ে কয়, ‘পৰিস্থিতি খুবেই উদ্বেগজনক । দ্ৰুত হাৰত সংক্ৰমণ বৃদ্ধি পাইছে । বিগত কিছুদিনত পৰিস্থিতি নিয়ন্ত্ৰণত আছিল । যি হাৰত সংক্ৰমণ বৃদ্ধি পাইছে কোনো নাজানে ইয়াৰ শেষ ক’ত হ’ব । প্ৰত্যেক ৰাজ্যতেই স্বাস্থ্য পৰিকাঠামোৰ এটা সীমাবদ্ধতা থাকে । চৰকাৰে চিকিৎসালয়ৰ বিছনা বঢ়োৱাৰ চেষ্টা কৰিছে । পৰৱৰ্তী চাৰি দিনত ছয় হেজাৰ বিছনা বৃদ্ধি কৰা হ’ব ।’
কৰ’না ৰোগীসকলক কেনেদৰে চিকিৎসা পৰিসেৱা প্ৰদান কৰা হ’ব তাকে ভাবি পাৰ পোৱা নাই মুখ্যমন্ত্ৰী কেজৰিৱালে । আজি অনুষ্ঠিত কৰা জৰুৰী বৈঠকত দিল্লীৰ স্বাস্থ্যমন্ত্ৰী সতেন্দ্ৰ জৈনো উপস্থিত থাকে । সম্প্ৰতি চিকিৎসালয়ৰ নাটনি পূৰণ কৰিবৰ বাবে কমনৱেলথ গেমছ ভিলেজ আৰু কিছু সংখ্যক বিদ্যালয়ক জৰুৰীকালীন ক’ভিড চিকিৎসালয়ত পৰিণত কৰাৰ সিদ্ধান্ত গ্ৰহণ কৰা হৈছে ।
সূত্ৰ অনুসৰি, দিল্লীৰ পৰিস্থিতি অতি শোচনীয় । সকলো চিকিৎসালয়ৰে ৯০ শতাংশ আইচিইউ কৰ’না ৰোগীৰে ভৰ্তি । চিকিৎসালৰ জেনেৰেল বিছনাটো স্থান নাই । চিকিৎসালয়ৰ বাহিৰৰ দোকান হওক বা বেচৰকাৰী কোনো অক্সিজেন চীলিণ্ডাৰ সৰবৰাহকাৰী সংস্থা কাৰো তাতে ক’ভিড প্ৰতিষেধক বা অক্সিজেন নাই ।
বিগত ২৪ ঘণ্টাত দিল্লীত ২৪ হেজাৰ জন লোক নতুনকৈ ক’ভিড-১৯ত আক্ৰান্ত হৈছে । ১৬৭ জন কৰ’না ৰোগীৰ মৃত্যু হৈছে ।
