সম্প্ৰতি ব্যক্তিগত বিমানসমূহৰ চাহিদা বৃদ্ধি পাইছে, কাৰণ এই বিমানসমূহৰ ব্যয় বহন কৰিব পৰা ভাৰতীয়সকলে কৰ’না ভাইৰাছৰ দ্বিতীয় ঢৌৰ পৰা পলায়ন কৰিবলৈ চেষ্টা কৰিছে ।
প্ৰতিদিনে ভাৰতত দৈনিক ক’ভিড সংক্ৰমণে বিশ্ব অভিলেখ গঢ়াৰ বাবে ভাৰতৰ পুঁজিপতিসকলে হেজাৰ হেজাৰ ডলাৰ ব্যয় কৰিছে দেশৰ পৰা পলায়ন কৰিবলৈ ।
বিগত সপ্তাহত ভাৰত ভাইৰাছৰ নতুন কেন্দ্ৰস্থল হৈ পৰিছে, যিয়ে দেশৰ স্বাস্থ্য সেৱা আৰু শ্মশানবোৰক সম্পূৰ্ণ গ্ৰাস কৰিছে আৰু অক্সিজেনৰ নাটনিৰ সৃষ্টি কৰিছে ।
স্বাস্থ্য মন্ত্ৰণালয়ে দিয়া তথ্য অনুসৰি, কালি ভাৰতত ৩,৪৯,৬৯১ জন লোক ক’ভিড-১৯ত আক্ৰান্ত হৈছে আৰু ২,৭৬৭ জন লোকে প্ৰাণ হেৰুৱাইছে । দৈনিক সংক্ৰমণৰ হাৰ বৃদ্ধি পোৱাৰ বাবে বিভিন্ন দেশে ভাৰতৰ ভ্ৰমণকাৰীসকলৰ ওপৰত নিষেধাজ্ঞা জাৰি কৰিছে ।
উদ্বেগজনক হাৰত সংক্ৰমণ বৃদ্ধি পোৱাৰ বাবে ভাৰতীয় পুঁজিপতিসকলে শেষ মুহূৰ্তৰ বিমানৰ বাবে হেজাৰ হেজাৰ ডলাৰ ব্যয় কৰিবলৈ মান্তি হৈছে । এনে পৰিস্থিতিত পুঁজিপতিসকলৰ জনপ্ৰিয় গন্তব্যস্থল হৈ পৰিছে সংযুক্ত আৰৱ আমিৰাত । আমিৰাতেই হৈছে এনে এখন দেশ যি ভাৰতৰ পৰা কিছু দূৰতেই অৱস্থিত আৰু প্ৰায়েই শ শ বিমানে তালৈ পৰিবহণ কৰে । সংযুক্ত আৰৱ আমিৰাতে ২৫ এপ্ৰিলৰ পৰা ১০ দিনৰ বাবে ভাৰতীয় ভ্ৰমণকাৰীসকলক দেশত প্ৰৱেশ কৰাত নিষেধাজ্ঞা জাৰি কৰিছে ।
এয়াৰ চাৰ্টাৰৰ এজন মুখপাত্ৰই কয় যে, ব্যক্তিগত বিমানসমূহৰ প্ৰতি উন্মত্ত হাৰত ৰুচি বৃদ্ধি পাইছে । অহা কালি আমাৰ ডুবই লৈ যাবলগীয়া ১২খন বিমানে প্ৰায় ভৰ্তি হৈ পৰিছে ।
আন এক ব্যক্তিগত সংস্থা এনথ্ৰেল এভিয়েছনৰ মুখপাত্ৰই জনায় যে, বিগত কিছুদিন ধৰি বিমানৰ বাবে শতাধিক সোধ-পোছ চলি আছে । আমি চাহিদা পূৰণ কৰিবৰ বাবে বিদেশৰ পৰা আৰু বিমান বিচাৰিছো । মুম্বাইৰ পৰা দিল্লীলৈ ১৩ জনীয়া বিমানৰ বাবে ব্যয় হ’ব ৩৮ হেজাৰ ডলাৰ আৰু ছয়জনীয়া বিমানৰ বাবে ব্যয় হ’ব ৩১ হেজাৰ ডলাৰ ।
তেওঁ লগতে কয় যে, লোক সকলে বিমানৰ ব্যয় বহন কৰিবৰ বাবে দল গঠন কৰিছে । থাইলেণ্ডৰ বাবে কিছু লোকে আগ্ৰহ প্ৰকাশ কৰিছে যদিও অধিক সংখ্যকেই ডুবাইৰ ।
বিদেশ ভ্ৰমণত নিষেধাজ্ঞা জাৰি কৰা ব্ৰিটেইনত বিগত ২৪ ঘণ্টাত ভাৰতৰ আঠখন বিমান ৰাওনা হয় । সূত্ৰ অনুসৰি, এই ন ঘণ্টীয়া বিমানৰ বাবে এক লাখ ৩৮ হেজাৰ ডলাৰৰো অধিক ব্যয় কৰিবলগীয়া হৈছে ।
