ছেলাইনেৰে সহজেই কৰিব পাৰিব ক’ভিড পৰীক্ষণ । বৰ্তমান প্ৰচলিত আৰটি-পিচিআৰ ক’ভিড পৰীক্ষণ পদ্ধতিতকৈ অধিক সহজ এই নতুন পদ্ধতি । কোনো প্ৰশিক্ষিত স্বাস্থ্যকৰ্মীৰ প্ৰয়োজন নাই এই পৰীক্ষণ কৰিবৰ বাবে । প্ৰচলিত পদ্ধতিৰে নাক আৰু ডিঙিৰ পৰা নমুনা সংগ্ৰহ কৰোতে বহুতেই নানান সমস্যাৰ সন্মুখীন হয় । নতুন পদ্ধতিত ইয়াৰ প্ৰয়োজন নাই । গাৰ্গল কৰা ছেলাইনৰ পানীৰে তিনি ঘণ্টাৰ ভিতৰতে ক’ভিড ৰিপ’ৰ্ট লাভ কৰিব ।
নতুন পদ্ধতিৰ উদ্ভাৱক নাগপুৰৰ এনভাইৰ’মেণ্টেল ইঞ্জিনিয়াৰিং ৰিচাৰ্ছ ইনষ্টিটিউটৰ বিজ্ঞানী কৃষ্ণ খৈৰনাৰৰ নেতৃত্বাধীন বিজ্ঞানীসকল । নতুন পদ্ধতিক অনুমোদন দিছে আইচিএমআৰে ।
নতুন পদ্ধতিত কেনেকৈ কৰ’না পৰীক্ষা কৰা হয়, সেই সন্দৰ্ভত টুইটাৰত এটা ভিডিঅ’পোষ্ট কৰে খৈৰনাৰে । তেওঁ জনায় যে, এই পদ্ধতিত সকলোৱে নমুনা সংগ্ৰহ কৰিব পাৰে । এটা টিউবৰ ভিতৰত ছেলাইনৰ পানী থাকিব । এই পানী মুখত ভৰাই ১৫ ছেকেণ্ডৰ বাবে গাৰ্গল কৰিব লাগিব । ইয়াৰ পাছত পানীখিনি টিউবটোতে পেলাব লাগিব । এইটোৱে নমুনা সংগ্ৰহৰ পদ্ধতি ।
এই নমুনা এইবাৰ পৰীক্ষাগাৰত নি আন এটা বাফাৰ ছলিউছনৰ স’তে মিহলি কৰি ঘৰৰ তাপমাত্ৰাত আধা ঘণ্টাৰ বাবে ৰাখি দিব । ইয়াৰ পাছত এই তৰল নমুনাখিনি ৯৮ ডিগ্ৰী চেলচিয়াছ তাপমাত্ৰাত ছয় মিনিট সময় উতলালেই আৰএনএ লাভ কৰিব । ইয়াৰ দ্বাৰা সহজেই গ’ম পোৱা যাব সংশ্লিষ্ট ব্যক্তি কৰ’নাত আক্ৰান্ত হয় নে নহয় ।
#IndiaFightsCorona @CSIR_NEERI 's Saline Gargle #RTPCR Testing Method
Dr. Krishna Khairnar, Senior Scientist, and his team at NEERI hopes this patient-friendly method is implemented at national level to strengthen our battle against the #pandemic pic.twitter.com/NTBneOdG4I
— #IndiaFightsCorona (@COVIDNewsByMIB) May 28, 2021
নতুন পদ্ধতিৰে অতি সহজে আৰু কম সময়তে কৰ’না পৰীক্ষণ কৰিব পাৰি বুলি জনায় খৈৰনাৰে । এই পদ্ধতিৰে গাঁৱত বিশেষকৈ আদিবাসী অধ্যুষিত অঞ্চলত একেলগে বহু মানুহৰ কৰ’না পৰীক্ষণ কৰা সম্ভৱ ।
