Two children infected with HMPV for the first time in India:
পুনৰ কৰ’নাকালৰ তলাবন্ধৰ দিনবোৰলৈ উভতিব নেকি দেশ! ইতিমধ্যে বিশ্বৰ বিভিন্ন স্থানত গভীৰ আতংকৰ সৃষ্টি কৰা হিউমেন মেটানিউম’ ভাইৰাছ (এইছএমপিভি) ভাৰততো তিনিটা শিশুৰ দেহত সংক্রমিত হোৱাৰ পাছত দেশজুৰি গভীৰ উদ্বেগৰ সৃষ্টি হৈছে। বাংগালুৰুৰ হাস্পতালত এনে ভাইৰাছৰ দ্বাৰা সংক্রমিত হোৱা এটি আঠমহীয়া শিশু চিকিৎসাধীন হৈছে আৰু আন এটি তিনিমহীয়া শিশুক ইতিমধ্যে ৰোগমুক্ত হোৱাত হাস্পতালৰ পৰা যাবলৈ দিয়া হৈছে।
আঠমহীয়া শিশুটিও আৰোগ্য হোৱাৰ পথত বুলি চিকিৎসকে জনাইছে। ইয়াৰ উপৰি আন এটি দুমহীয়া শিশু আহমেদাবাদত চিকিৎসাধীন হৈ আছে। ভাৰতত প্ৰথমবাৰৰ বাবে এইছএমপিভি ভাইৰাছত আক্রান্ত বুলি চিনাক্ত হোৱা এই শিশুকেইটি আৰু তেওঁলোকৰ পৰিয়ালৰ লোক শেহতীয়াভাবে আন কোনো দেশলৈ যোৱাৰ তথ্য নাই।
ভাৰতীয় চিকিৎসা গবেষণা পৰিষদ (আইচিএমআৰ) ৰ নিয়মীয়া পর্যবেক্ষণত এই তিনি শিশু চিনাক্ত হোৱা বুলি কেন্দ্ৰটোৱে সদৰী কৰে। এক বিবৃতিত বাংগালুৰুৰ শিশু দুটি সন্দৰ্ভত আইচিএমআৰে কয়, ‘নিয়মীয়া পৰীক্ষাত দুয়োটা ঘটনা ধৰা পৰিছে। দেশজুৰি আইচিএমআৰে শ্বাস-প্রশ্বাসজনিত ৰোগৰ নিৰীক্ষণৰ বাবে চলাই থকা প্ৰচেষ্টাৰ অংশৰূপে ই চিনাক্তকৰণ হয়।
ইতিমধ্যে এইছএমপিভি ভাৰতকে ধৰি বিশ্বতে বিয়পি আছে।’ তথ্য অনুসৰি আহমেদাবাদৰ আক্রান্ত শিশুটিক ভেন্টিলেচনত ৰখা হৈছে যদিও সম্প্রতি পৰিস্থিতি নিয়ন্ত্রণাধীন হৈছে। আহমেদাবাদ পৌৰ নিগমৰ মুখ্য চিকিৎসা বিষয়া ভাভিন ছোলাংকিয়ে কয়, ‘যোৱা ২৬ ডিচেম্বৰত এইছএমপিভিৰ সংক্ৰমণ চিনাক্ত হয় যদিও আমি আজিহে জ্ঞাত হওঁ, কিয়নো শিশুটি চিকিৎসাধীন হৈ থকা ব্যক্তিগত হাস্পতালখনে আমাক পলমকৈ জনাইছে।’
দেশৰ স্বাস্থ্য মন্ত্রণালয়ে ভাৰতত প্ৰথমবাৰৰ বাবে সংক্রমণ চিনাক্ত হোৱাৰ পাছত প্রস্তুতি সম্পর্কেও বৈঠকৰ আয়োজন কৰে। এইছএমপিভি হৈছে শ্বাস-প্রশ্বাসজনিত ৰোগ যাৰ অধিকাংশ লক্ষণেই চর্দি-কাহৰ দৰে যদিও ই আন বিভিন্ন জটিলতাৰ সৃষ্টি কৰিব পাৰে। বিশেষকৈ শিশু, বয়োজ্যেষ্ঠ লোক আৰু আন জটিল ৰোগত আক্রান্তসকলৰ বাবে এই ভাইৰাছৰ সংক্রমণ অধিক বিপজ্জনক হ’ব পাৰে। নিউম’নিয়া অথবা অতি গুৰুতৰ শ্বাস-প্রশ্বাসজনিত জটিলতাৰ সৃষ্টি কৰিব পাৰে এইছএমপিভিয়ে। শীতকাল অথবা বসন্ত কালৰ আগছোৱা এই ভাইৰাছৰ প্ৰসাৰৰ বাবে উক্ত সময়।
কেন্দ্রীয় চৰকাৰে ঘোষণা কৰে যে এইছএমপিভিকে ধৰি অন্যান্য শ্বাস-প্রশ্বাসজনিত ৰোগৰ কাৰক ভাইৰাছসমূহৰ বিষয়ে চৰকাৰে নিৰীক্ষণ কৰি আছে। বিশেষকৈ চীনত এনে ৰোগৰ বৰ্ধিত তথ্যৰ পাছত সতর্ক হৈছে ভাৰত চৰকাৰ। যোৱা চাৰি জানুৱাৰীত দেশত সমগ্ৰ পৰিস্থিতিৰ অধ্যয়নৰ বাবে এক যৌথ নিৰীক্ষণ গোট গঠন কৰা হয়। ইয়াত আছে বিশ্ব স্বাস্থ্য সংস্থা (হু), ৰোগ নিয়ন্ত্ৰণৰ বাবে ৰাষ্ট্ৰীয় কেন্দ্র (এনচিডিচি) আৰু ভাৰতীয় চিকিৎসা গবেষণা পৰিষদ (আইচিএমআৰ) আৰু অন্যান্য স্বাস্থ্য সংস্থাৰ প্ৰতিনিধি। অৱশ্যে এই মুহূৰ্তলৈ ভাৰতত শ্বাস-প্রশ্বাসজনিত ৰোগ বা এনে বীজাণুৰ সংক্ৰমণৰ ঘটনাৰ অস্বাভাবিক বৃদ্ধিৰ তথ্য নাই বুলি কেন্দ্রীয় স্বাস্থ্য আৰু পৰিয়াল কল্যাণ মন্ত্রণালয়ে সদৰী কৰে।
কেন্দ্রীয় মন্ত্রণালয়ে জনোৱা মতে, সাৱধানতা অৱলম্বনৰ বাবে চৰকাৰে এইছএমপিভিৰ ভাইৰাছ চিনাক্তকৰণৰ বাবে পৰীক্ষাগাৰৰ সামৰ্থ্য বৃদ্ধি কৰিছে। ইয়াৰ উপৰি সমগ্ৰ বছৰ ধৰি ইনফ্লৱেঞ্জাৰ সদৃশ ৰোগ, অতি গুৰুতৰ শ্বাস-প্রশ্বাসজনিত সংক্ৰমণৰ লগতে এইছএমপিভিৰ গতিবিধি পুনৰীক্ষণ কৰিব। হাস্পতালসমূহতো সন্দেহজনক ৰোগী চিনাক্ত হ’লে আছুতীয়াকৈ ৰখাৰ ব্যৱস্থা শক্তিশালী কৰাৰ লগতে অত্যাৱশ্যকীয় দৰব মজুতকৰণ নিয়মীয়াকৰণৰ বাবে কোৱা হৈছে।
✅ তলাবন্ধৰ আতংক
কেন্দ্ৰীয় চৰকাৰে সাধাৰণ ৰাইজ আতংকিত হোৱাৰ কোনো প্রয়োজন নাই বুলি ক’লেও দেশজুৰি পুনৰ তলাবন্ধৰ পৰিস্থিতিৰ উদ্ভৱ হ’ব নেকি বুলিও শংকা গা কৰি উঠিছে। চুবুৰীয়া চীনত ইয়াৰ পৰিস্থিতি গুৰুতৰ হোৱা বাবেই ক’ভিড কালৰ দুৰ্দশাগ্রস্ত দিনবোৰৰ স্মৃতিয়ে সাধাৰণ লোকৰ মাজত গভীৰ উদ্বেগৰ সৃষ্টি কৰিছে। আইচিএমআৰে এই পৰিস্থিতি নিৰীক্ষণ কৰি কয়, ‘আতংকিত হোৱাৰ কোনো কাৰণ নাই আৰু ভাৰতকে ধৰি ইতিমধ্যে দেশজুৰি বিয়পিছে এইছএমপিভি। ক’ভিড-১৯ৰ সময়ত ২০১৯-২০ত প্রথমতে চুবুৰীয়া চীনত তলাবন্ধ আৰু পৰৱৰ্তী পর্যায়ত ই বিশ্বতে অতিমাৰীৰ ৰূপ ধাৰণ কৰা দিনবোৰৰ কথা মনত পেলাইছে মানুহে।
মনকৰিবলগীয়া যে চীনৰ উহানত ২০১৯ৰ নৱেম্বৰত ক’ভিড সংক্ৰমণৰ প্ৰথমটো ঘটনা চিনাক্ত হৈছিল আৰু বন-জুইৰ দৰে বিশ্বৰ বিভিন্ন দেশত ই বিয়পি পৰিছিল। ২০২০ৰ জানুৱাৰীত কেৰালাত দেশৰ প্ৰথমটো ক’ভিড সংক্রমণ চিনাক্ত হৈছিল। পৰিসংখ্যা অনুসৰি আমেৰিকাৰ পাছতে বিশ্বৰ ভিতৰতে ক’ভিডত শোচনীয়ভারে আক্রান্ত হোৱা দেশখনেই হৈছে ভাৰত। বাংগালুৰুত এইছএমপিভি চিনাক্ত হোৱাৰ পাছত ৰাজ্যখনৰ স্বাস্থ্যমন্ত্রী দীনেশ গুণ্ডু বারে কয়, ‘মই নাভাবো যে আমি এতিয়াই আতংকিত হোৱাৰ প্ৰয়োজন আছে। কাৰণ এইছএমপিভি নতুন ভাইৰাছ নহয়। ইতিমধ্যে ইয়াৰ অৱস্থিতি আছে। ভাৰতত এইছএমপিভিৰ প্ৰথমটো সংক্ৰমণৰ ঘটনা চিনাক্ত হৈছে যদিও ই সত্য নহয়। কিয়নো ইতিমধ্যে এই ভাইৰাছ আছেই আৰু নির্দিষ্টসংখ্যক লোক ইয়াৰ দ্বাৰা সংক্রমিত হৈ আছে। ই একো নতুন কথা নহয়।’
স্বাস্থ্য সেবা সঞ্চালকালয়ৰ বিষয়া ডাঃ অতুল গোৱেলে ৰাইজক আশ্বস্ত কৰি কয়, ‘চীনত এইছএমপিভিৰ প্রাদুর্ভাব ঘটা বুলি কোৱা হৈছে যদিও মই এই কথা স্পষ্ট কৰি দিব বিচাৰো যে এই ভাইৰাছ আন যিকোনো শ্বাস-প্রশ্বাসৰ ৰোগৰ ভাইৰাছৰ দৰেই, যাৰ লক্ষণসমূহ সাধাৰণ চর্দি-কাহৰ দৰে আৰু ই বয়োজ্যেষ্ঠ তথা শিশুক অধিক সহজে আক্রান্ত কৰিব পাৰে। দিল্লীৰ সৰ্বভাৰতীয় আয়ুবিজ্ঞান প্রতিষ্ঠান (এইমছ)ৰ এগৰাকী অধ্যাপক ডাঃ হৰ্যাল আৰ ছালভেৰ মতে, এই ভাইৰাছ নতুন নহয়। দীর্ঘদিন ধৰি ভাৰতত বিভিন্নজনক আক্রান্ত কৰি থকা ইনফ্লুৱেঞ্জাসদৃশ ৰোগৰ আঁৰত আছে এই ভাইৰাছ। ইয়াৰ ফলত অতি গুৰুতৰভাবে ৰোগাক্রান্ত হোৱাৰ সম্ভাৱনা বিৰল।’ চীনৰ ভাইৰাছৰ স’তে কোনো সম্পর্ক নাই|
বাংগালুৰুত প্রথমতে আঠমহীয়া শিশুটি আৰু পৰৱৰ্তী পৰ্যায়ত আনটো শিশুৰ শৰীৰত উদ্বেগজনক ভাইৰাছটোৰ সন্ধান লাভ কৰে। অৱশ্যে চীনত বিয়পি পৰা ভাইৰাছৰ স’তে বাংগালুৰুৰ এইছএমপিভি ভাইৰাছৰ সংক্ৰমণৰ কোনো যোগসূত্র নাই বুলি কেন্দ্ৰীয় চৰকাৰে তথ্য সদৰী কৰিছে। ইতিমধ্যে আক্রান্ত তিনিমহীয়া শিশুটিক হাস্পতালৰ পৰা যাবলৈ দিয়া হৈছে। সম্প্রতি চীনত এই ভাইৰাছৰ এটা ৰূপৰ সংক্ৰমণ বৃদ্ধি পোৱাত ভাৰতসহ বিভিন্ন দেশত উদ্বেগৰ সৃষ্টি হৈছে। দেশৰ স্বাস্থ্য মন্ত্রণালয়ে পৰিস্থিতিৰ প্রতি দৃষ্টি ৰখাৰ সমান্তৰালভাৱে একে সময়তে দুটা সংক্রমণ চিনাক্ত হোৱাত কণটিকৰ স্বাস্থ্যমন্ত্ৰী ৰাৱে আজি এক জৰুৰীকালীন বৈঠকৰো আয়োজন কবে।
ইপিনে, ৰাজ্যবাসীক অধিক উদ্বিগ্ন নহ’বলৈ পৰামৰ্শ দিয়ে ৰাজ্যখনৰ স্বাস্থ্য সচিব হর্ষ গুপ্তাই। তেওঁ ব্যাখ্যা কৰে যে আক্রান্ত শিশু দুটিৰ পৰিয়ালৰ লোক আন ঠাইলৈ যোৱা নাই আৰু সেয়েহে কোনো দেশ বা অঞ্চললৈ গৈ ভাইৰাছৰ দ্বাৰা সংক্রমিত হোৱাৰ সম্ভাৱনা নাই। গুপ্তাই কয় যে এই ভাইৰাছক লৈ চিন্তা কৰাৰ কোনো প্রয়োজন নাই। এইছএমপিভি ভাৰতত আছেই। অৱশ্যে এই ভাইৰাছৰ কোনো ৰূপান্তৰ হৈছে নেকি সেই তথ্য স্পষ্ট নহয়। চীনত বিয়পি পৰা ভাইৰাছৰ ৰূপৰ গঠন সম্পৰ্কীয় কোনো তথ্য নাই। সেয়েহে ভাৰতৰ ভাইৰাছ চীনৰ স’তে একে হয় নে নহয় সেয়া ক’ব নোৱাৰি। আন চিকিৎসক-বিশেষজ্ঞসকলৰ স’তে তেওঁ দোহাৰে যে ভাৰতত অতীততো এইছএমপিভি ভাইৰাছ বিভিন্ন সময়ত চিনাক্ত হৈছে।
✅ চীনেও ক’লে- উদ্বিগ্ন হ’ব নালাগে
বিশ্বৰ আন দেশসমূহক উদ্দেশি চীনে কয় যে উদ্বিগ্ন হ’ব নালাগে। চীনৰ বক্তব্য অনুসৰি এয়া এক বতৰৰ সংক্ৰমণ। কেৱল শীতকালীন সংক্রমণ বুলিয়ে এই পৰিস্থিতিক চীনে ব্যাখ্যা কৰিছে। ভাৰত চৰকাৰে দেশবাসীক অযথা উদ্বিগ্ন নহ’বলৈ পৰামৰ্শ দিয়াৰ লগতে এই ভাইৰাছ সম্পৰ্কীয় তথ্য সময়ে সময়ে যোগান ধৰিবলৈ হু’ক [WHO) অনুৰোধ জনাইছে। কেন্দ্রীয় চৰকাৰে কয় যে ইতিমধ্যে ভাৰতত যিহেতু এই ভাইৰাছৰ অস্তিত্ব আছে আৰু দেশৰ স্বাস্থ্য সেৱাৰ আন্তঃগাঁথনিৰ বাবে সেয়েহে এই ৰোগৰ স’তে মোকাবিলা কৰাৰ ক্ষেত্ৰত কোনো সমস্যাৰ সৃষ্টি নহয়। দেশবাসীক শান্ত আৰু সতর্ক হৈ থাকিবলৈ আৰু লগতে পৰিচ্ছন্নতা বজাই ৰাখিবলৈ কেন্দ্ৰীয় চৰকাৰে কয়।