আজি বিত্তমন্ত্ৰী অজন্তা নেওগে গোলাঘাটৰ পাঁচ আলিৰ সমীপৰ ১২ নং ৱাৰ্ডৰ বাসিন্দা চয়নিকা সভাপণ্ডিতৰ বাসগৃহত উপস্থিত হৈ মেধাৱী ছাত্ৰীগৰাকীক সৌহাদ্যমূলকভাৱে সাক্ষাৎ কৰে ।
আৰ্থিক সংকটৰ বাবে শাক-পাচলিৰ দোকান দিয়া ছাত্ৰীগৰাকীক কিছু সকাহ দিয়াৰ উদ্দেশ্যে মন্ত্ৰীগৰাকীয়ে মুখ্যমন্ত্ৰী সাহায্য পুঁজিৰ পৰা আগবঢ়োৱা ৫০হেজাৰ টকাৰ চেকো প্ৰদান কৰে ।
চেক প্ৰদান কৰি মন্ত্ৰীগৰাকীয়ে কয় যে, এইয়া সামান্য আশীৰ্বাদহে । ছাত্ৰীগৰাকীৰ অভাৱসমূহ সমূলঞ্চে দূৰ নহ’লেও মুখ্যমন্ত্ৰী ডঃ হিমন্ত বিশ্ব শৰ্মাৰ এই মৰম আৰু আশীৰ্বাদে কিছু হ’লেও সকাহ দিব বুলি তেওঁ আশা প্ৰকাশ কৰে । তেওঁ ছাত্ৰীগৰাকীৰ উজ্জল ভৱিষ্যৎ কামনা কৰাৰ লগতে এনে প্ৰয়াসৰ শলাগ লয় ।
মন্ত্ৰীগৰাকীৰ স’তে উপস্থিত আছিল সৰুপথাৰ সমষ্টিৰ বিধায়ক বিশ্বজিৎ ফুকন । উল্লেখযোগ্য যে কটন বিশ্ববিদ্যালয়ত অধ্যয়নৰত ছাত্ৰীগৰাকী মেধাৱী হোৱাৰ লগতে এগৰাকী সু-গায়িকাও । এখন অপ্ৰাদেশীকৃত মহাবিদ্যালয়ত চাকৰি কৰি কোনোমতে পৰিয়াল পোহপাল দিয়া পিতৃক সহায় কৰাৰ উদ্দেশ্যে ছাত্ৰীগৰাকীয়ে ক’ভিড পৰিস্থিতিৰ মাজতে ঘৰৰ সন্মুখতে শাক-পাচলিৰ দোকান আৰম্ভ কৰে ।
