উত্তৰপ্রদেশৰ মুজফানগৰত কৃষক মহাপঞ্চায়তৰ পৰা পুনৰ তীব্ৰ আন্দোলনৰ আহ্বান দিলে ভাৰতীয় কিষান ইউনিয়ন নেতা ৰাকেশ টিকায়েতে । দেওবাৰে তেওঁ মহাপঞ্চায়তৰ পৰা অহা ২৭ ছেপ্টেম্বৰত ভাৰত বন্ধৰ আহ্বান কৰে । লগতে কয়, ‘‘যেতিয়ালৈকে নতুন কৃষি আইন বাতিল নকৰে, তেতিয়ালৈকে দিল্লী সীমান্ত এৰি নাযাও । আন্দোলন অব্যাহত থাকিব ।’’
কৃষি আইনৰ বিৰোধিতা কৰি আয়োজিত মহাপঞ্চায়তত বিভিন্ন আন্দোলনৰত সংগঠনে অংশগ্ৰহণ কৰিছে । কৃষকসকলৰ তৰফৰ পৰা দাবী কৰা হৈছে, সংগঠনৰ সংখ্যা প্রায় তিনিশ । দক্ষিণৰ ৰাজ্যসমূহৰ বিভিন্ন সংগঠনেও ইয়াত অংশ লৈছে । দেওবাৰে টিকায়তে কয়, ‘‘আমি শপত গ্ৰহণ কৰিছো, আমি দিল্লী সীমান্তৰ প্রতিবাদস্থল নেৰো । যদি তাত আমাৰ শেষকৃত্য হয়, হওক । আমি প্ৰয়োজন হ’লে তাতেই জীৱন ত্যাগ দিম । যেতিয়ালৈ বিজয়ী নহও, আমি আন্দোলনস্থলী নেৰো ।’’
আন্দোলনৰ লগতে আলোচনাৰ পথো মুকলি কৰি ৰাখিব বিচাৰিছে প্রতিবাদী কৃষকসকলে । টিকায়তে কয়, ‘‘ভাৰত চৰকাৰে যদি আমাক আলোচনাৰ বাবে আমন্ত্ৰন জনায়, আমি যাবলৈ প্ৰস্তুত । অৱশ্যে লগতে কৃষকসকলৰ আন্দোলনো চলি থাকিব । যেতিয়ালৈকে আমাৰ দাবী মানি লোৱা নহয়, তেতিয়ালৈকে আমি আন্দোলন চলাই যাম । ভাৰতৰ স্বাধীনতা সংগ্রাম ৯০ বছৰ ধৰি চলিছিল । সেয়ে, আমি নাজানো আৰু কিমান দিন আমাৰ এই আন্দোলন চলিব ।’’
টিকায়তে দেওবাৰে জনায়, সমগ্ৰ দেশতেই এনে মহাপঞ্চায়ত আয়োজন কৰিব কৃষক সংগঠনসমূহৰ যৌথ মঞ্চই । লগতে তেওঁ বেচৰকাৰীকৰণৰ বিষয়েও কয় । তেওঁ কয়, ‘‘দেশ বিক্রী কৰিব বিচাৰিছে প্রধানমন্ত্রী নৰেন্দ্র মোদীয়ে । আমি এইবাৰৰ পৰা তেওঁৰ নাম লৈ প্রচাৰ কৰিম । সাধাৰণ মানুহক বুজাব বিচাৰিছো, কেনেদৰে দেশৰ সম্পদ বিক্রী কৰিব বিচাৰিছে মোদী ।’’
বিগত বৰ্ষৰ নৱেম্বৰৰ পৰা কৃষকসকলৰ আন্দোলন চলি আছে । আৰম্ভণিৰ পৰাই কৃষকসকলে তিনি কৃষি আইন বাতিল কৰাৰ দাবী কৰি আহিছে । চৰকাৰৰ স’তে একাধিক আলোচনাও হৈছে, কিন্তু সমাধান সূত্র পোৱা নাই ।
