গুৱাহাটী প্ৰেছ ক্লাৱত বৃহস্পতিবাৰে নৰ্থ ইষ্ট ডিবেটৰ্ছ এছ’চিয়েচনএ এখনি সম্বৰ্ধনা সভা আয়োজন কৰে । উক্ত সভাত ২০২১ৰ সাহিত্য অকাডেমি অনুবাদ বঁটা বিজয়ী দিগন্ত বিশ্ব শৰ্মাক সম্বৰ্ধনা জনোৱা হয় । লগতে বিশিষ্ট অনুবাদকগৰাকীৰ স’তে এক মত বিনিময় অনুষ্ঠানৰ আয়োজন কৰা হয় ।
অনুষ্ঠানটোত উপস্থিত থাকে অসম জাতীয় বিদ্যালয়ৰ শিক্ষয়িত্ৰী অৰ্পণা দেৱী, গুৱাহাটী বিশ্ববিদ্যালয়ৰ শিক্ষা বিভাগৰ অধ্যাপিকা বিদুলা শৰ্মাৰ লগতে বিতৰ্ক কলা স’তে জড়িত বহু ব্যক্তি তথা ছাত্ৰ-ছাত্ৰী । আৰম্ভণি বক্তব্য আগবঢ়াই অধিবক্তা দীপক শৰ্মাই দিগন্ত বিশ্ব শৰ্মাৰ তৰ্ক জগতৰ প্ৰতি থকা অৱদানৰ ওপৰত আলোকপাত কৰে ।অনুষ্ঠানটি আঁত ধৰে প্ৰাণজিত দাসে । সামৰণি ভাষণ প্ৰদান কৰে বিশালদ্বীপ কাকতীয়ে ।
অনুষ্ঠানটোত উপস্থিত ছাত্ৰ-ছাত্ৰী আৰু সাংবাদিকসকলৰ স’তে মত বিনিময় কৰি দিগন্ত বিশ্ব শৰ্মাই অনুবাদ সাহিত্য স’তে কিদৰে জড়িত হ’ল তথা জীৱনত সফলতা পাবলৈ অকৃত্রিমতা, সৰলতাই যে মূলমন্ত্ৰ বুলি মতপোষণ কৰে । লগতে দিগন্ত বিশ্ব শৰ্মাই মত পোষণ কৰে যে তেওঁ মাথো ঋষি অৰবিন্দৰ বাৰ্তাবাহকহে । ভৱিষ্যতেও অনুবাদৰ ওপৰত কাম কৰি যাব বুলি তেওঁ দোহাৰে ।
