গুৱাহাটী উন্নয়ন বিভাগৰ দায়িত্বত থকা মন্ত্ৰীগৰাকীয়ে পৌৰ নিগমৰ নিৰ্বাচন অনুষ্ঠিত কৰাত গুৰুত্ব আৰোপ নকৰি নিগমৰ সকলো ক্ষমতা কুশীগত কৰি গণতন্ত্ৰৰ বিকেন্দ্ৰিকৰণৰ ব্যৱস্থাক প্ৰহসনত পৰিণত কৰিছে । এই অভিযোগ গুৱাহাটী পৌৰ নিগমৰ প্ৰাক্তন মেয়ৰ কুশল কুমাৰ শৰ্মাৰ । বৃহস্পতিবাৰে গুৱাহাটী ৰাজীৱ ভৱনত অনুষ্ঠিত এক সংবাদমেলত তেওঁ এই অভিযোগ উত্থাপন কৰি পৌৰ নিগমৰ নিৰ্বাচন অনুষ্ঠিত নকৰাৰ বাবে তীব্ৰ অসন্তুষ্টি প্ৰকাশ কৰে । তেওঁ নিগমৰ নিৰ্বাচনৰ বাবে বিভাগীয় মন্ত্ৰী দায়বদ্ধ বুলি উল্লেখ কৰি তেওঁ কি কাৰণত আজি পৰ্যন্ত নিৰ্বাচন অনুষ্ঠিত কৰাৰ ক্ষেত্ৰত অৱহেলা কৰি আহিছে সেই কথা স্পষ্ট কৰাৰ দাবী জনায় ।
লগতে তেওঁ মন্ত্ৰীগৰাকীৰ সাহস আছে যদি নাগৰিক সভা পাতি নাগৰিকৰ মুখামুখি হোৱাৰ প্ৰত্যাহ্বান জনায় । তেওঁ সংবাদমেলত অসম চৰকাৰে সংবিধান উলংঘা কৰি এজন আই এছ বিষয়াক বিগত তিনিটা বছৰে গুৱাহাটী নগৰ উন্নয়নৰ দায়িত্বত নিয়োগ কৰি থৈছে যিজনে গুৱাহাটী বাসীৰ কথা শুনিবই নিবিচাৰে বুলি অভিযোগ তোলে । তেওঁ কয়, “অসম চৰকাৰৰ অতিৰিক্ত মুখ্য সচিবৰ দায়িত্ব পালন কৰি থকা বিষয়াজনে গুৱাহাটী বাসীৰ সমস্যাৰ বিষয়ত অৱগত নহয় । তেওঁ গুৱাহাটী বাসীক সাক্ষাৎ কৰিব নিবিচাৰে । গুৱাহাটীৰ সমস্যা সন্দৰ্ভত আলোচনা কৰিব নিবিচাৰে । তেনে এজন লোকক কি স্বাৰ্থত গুৱাহাটীৰ প্ৰশাসক ৰূপে চকীত বহুৱাই থৈছে ? পৌৰ নিগম স্থানীয় স্বায়ত্ব শাসিত চৰকাৰ । সংবিধানে প্ৰদান কৰা ক্ষমতাৰ আধাৰত নিগমে কাৰ্যনিৰ্বাহ কৰে । পৌৰ নিগম আইন অনুসৰি প্ৰতি পাঁচ বছৰৰ মূৰে মূৰে নিৰ্বাচন অনুষ্ঠিত কৰিব লাগে । কিন্তু এই আইন উলংঘা কৰি তিনিবছৰ উকলি যোৱাৰ পিছতো নিৰ্বাচন অনুষ্ঠিত নহ’ল ? ইয়াৰ কাৰণ কি ? এই সন্দৰ্ভত নিৰ্বাচন আয়ুক্তক সাক্ষাৎ কৰি কংগ্ৰেছ দলৰ তৰফৰ পৰা স্মাৰক পত্ৰ প্ৰেৰণ কৰা হৈছিল । কিন্তু তেওঁ নিৰ্বাচন অনুষ্ঠিত কৰা ব্যৰ্থ হল । ইয়াৰ কাৰণ স্পষ্ট কৰা উচিত ।”
গুৱাহাটী পৌৰ নিগম নিৰ্বাচন নোহোৱাত সকলোতকৈ অধিক ক্ষতিগ্ৰস্থ হৈছে গুৱাহাটীবাসী । নিৰ্বাচনৰ জৰিয়তে নিৰ্বাচিত হোৱা পাৰিষদ সকলক বিশেষকৈ খোৱাপানী, ৰাস্তা তথা বিভিন্ন আঁচনিৰ সন্দৰ্ভত যোগাযোগ কৰে । কিন্তু সেই লোকসকলে এতিয়া যথেষ্ট সমস্যাৰ সন্মুখীন হৈছে । পাৰিষদ নথকাত গুৱাহাটী বাসী আটাইতকৈ বেছি ক্ষতিগ্ৰস্ত হোৱা বুলি তেওঁ উল্লেখ কৰি সংবিধানৰ নামত শপত খাই বিগত বিশ টা বছৰে বিধায়ক-মন্ত্ৰী তথা বৰ্তমান ৰাজ্যৰ মুখ্যমন্ত্ৰীৱেও গুৱাহাটী বাসীৰ সমস্যাক আওকাণ কৰা বুলি দুখ প্ৰকাশ কৰে । মুখ্যমন্ত্ৰীয়ে নিৰ্বাচন অনুষ্ঠিত কৰাৰ ক্ষেত্ৰত যোগাত্মক পদক্ষেপ লোৱাৰ পৰিবৰ্তে বিভিন্ন অজুহাত নিৰ্বাচন পিছুৱাই থকা বুলিহে শৰ্মাই অভিযোগ কৰে ।
লগতে তেওঁ গুৱাহাটীৰ প্ৰতিটো ৱাৰ্ডৰ সমস্যসমূহ সমাধানৰ ক্ষেত্ৰত সহযোগিতা আগবঢ়োৱা পাৰিষদ সকলৰ অবিহনে মুখ্যমন্ত্ৰীয়ে অকলে কেনেকৈ গুৱাহাটীক স্মাৰ্ট চিটিৰ ৰূপ দিব বুলিও তেওঁ প্ৰশ্ন কৰে । গুৱাহাটীৰ বিভিন্ন খোৱাপানীৰ আঁচনিত দুৰ্নীতি সংঘটিত হোৱাৰ সন্দেহ ব্যক্ত কৰি তেওঁ কেগ আৰু অসমৰ ৰাজ্যপালৰ দৃষ্টি আকৰ্ষণ কৰি এই আঁচনিৰ নামত কোটি কোটি টকা অপচয় হোৱা বুলি সন্দেহ ব্যক্ত কৰে । লগতে এই আঁচনিৰ নামত দালাল ৰাজ চলি থকাৰো সন্দেহ প্ৰকাশ কৰে । সংবাদমেলত পৌৰ নিগমৰ দুগৰাকী প্ৰাক্তন পাৰিষদ ক্ৰমে স্বপন দাস আৰু উত্তম চৰকাৰ উপস্থিত থাকি গুৱাহাটীবাসীৰ সমস্যা সমাধানৰ ক্ষেত্ৰত পাৰিষদ সকলে কিদৰে সহযোগ কৰি আহিছে সেই বিষয়ে উল্লেখ কৰে ।