সম্প্ৰতি বহু বতৰ বিজ্ঞানী আৰু বিভিন্ন দেশৰ চৰকাৰী বিষয়াবর্গই প্রশান্ত মহাসাগৰৰ পৰিস্থিতি সূক্ষ্মভাৱে নিৰীক্ষণ কৰি আছে। কাৰণ বতৰ বিজ্ঞানীসকলে ধাৰণা কৰিছে যে চলিত বৰ্ষত অতি এলনিনোৰ প্ৰভাৱত পৃথিৱীৰ সামগ্রিক তাপমাত্রা দুই ডিগ্রী চেলচিয়াছ পর্যন্ত বৃদ্ধিৰ আশংকা আছে। এই তাপমাত্রা বৃদ্ধি ইতিহাসতে সর্বাধিক হ’ব।
অৱশ্যে আন একাংশ বিজ্ঞানীৰ মতে চলিত বৰ্ষত প্ৰাক ঔদ্যোগিক যুগতকৈ সামগ্রিক তাপমাত্রা ১.৫ ডিগ্রী চেলচিয়াছ বৃদ্ধি পাব। এই সংক্রান্তীয় অধিক উদ্বেগজনক কথাটো হ’ল যে এই তাপমাত্রা বৃদ্ধি অস্থায়ী হ’লেও ইয়ে দীর্ঘস্থায়ী তাপমাত্রা বৃদ্ধিৰ ইংগিত বহন কৰিছে।
স্বাভাৱকিতে এই পৰিৱৰ্তন জীৱকুলৰ বাবে সুখকৰ নহ’ব। বেমাৰ-আজাৰ বৃদ্ধিকে ধৰি বিভিন্ন সমস্যাই জীৱকুলক আগুৰি ধৰাৰ আশংকা আছে। এই সম্পৰ্কত ইউনিয়ন অৱ কনচার্ণড ছায়েন্টিষ্টছ শীর্ষক বৈজ্ঞানিক সংস্থাৰ সভ্য মার্ক এলেছিয়ে কয়, ‘বতৰৰ পৰিৱৰ্তনৰ অধিকাংশ অধ্যয়নে তাপমাত্রা দুই ডিগ্রী চেলচিয়াছতকৈ কম বৃদ্ধি পাব বুলিও কৈছে যদিও তাপমাত্রা দুই ডিগ্রী চেলচিয়াছতকৈ অধিক বৃদ্ধি পাব বুলিও আশংকা নুই কৰিব নোৱাৰি।’
উল্লেখ্য যে এলনিনো হৈছে প্রশান্ত মহাসাগৰৰ মধ্য আৰু পূব ক্রান্তীয় অঞ্চলত মহাসাগৰপৃষ্ঠৰ গৰম হোৱাৰ ঘটনা। এনে ধৰণৰ ঘটনা সাধাৰণতে প্রতি দুই বা সাত বছৰৰ মূৰে মূৰে সংঘটিত হয় আৰু নৰ পৰা ১২ মাহ বর্তি থাকে। এলনিনোৰ বছৰত বতাহে মহাসাগৰৰ গৰম পানী পশ্চিমৰ দিশে বোৱাই নিয়ে। ফলত মহাসাগৰৰ উপৰিপৃষ্ঠৰ পানী উষ্ণ হয়।
এলনিনো অধ্যয়নে সংশ্লিষ্ট বছৰৰ বতৰৰ পূৰ্বাভাস পোৱাত বিজ্ঞানীসকলক সহায় কৰে। এই ক্ষেত্রত এলনিনা নামৰ আন এটা পৰিঘটনাও আছে। যেতিয়া সাগৰপৃষ্ঠৰ তাপমাত্রা স্বাভাৱিকতকৈ তললৈ নামে তেতিয়া এলনিনা বা এলনিনো নাথাকে। এনে ঘটনা সাধাৰণতে এপ্ৰিল আৰু জুনৰ মাজত সংঘটিত হয়।
বতৰ বিজ্ঞানীসকলৰ মতে চলিত বর্ষত প্রশান্ত মহাসাগৰৰ পানী অত্যধিক উষ্ণ হোৱাৰ আশংকা আছে। গতিকে ইয়াক অতি এলনিনো বুলি অভিহিত কৰা হৈছে।
এলনিনো আৰু এলনিনা চলি থকাৰ সময়ত সাগৰপৃষ্ঠৰ পানীৰ উষ্ণতা এক ডিগ্রী চেলচিয়াছৰ পৰা তিনি ডিগ্রী চেলচিয়াছৰ মাজত উষ্ম আৰু শীতল হ’ব পাৰে। এনে অৱস্থাই বৰষুণ, খৰাং, তাপ আৰু জলবায়ুগত দুর্যোগ সম্পর্কে ব্যাখ্যা আগবঢ়াব পাৰে। বৰ্তমানে এলনিনা অৱস্থাৰ অৱসান ঘটি এক উদাসীন অৱস্থাৰ সৃষ্টি হৈছে বুলি প্ৰকাশ কৰিছে মার্কিন জলবায়ু পূর্বাভাস কেন্দ্ৰই।
অৱশ্যে বহু বতৰ বিজ্ঞানীৰ মতে প্রশান্ত মহাসাগৰৰ পৰিস্থিতি এলনিনোৰ দিশে ধাৱমান হৈছে। ইয়াৰ পৰিপ্ৰেক্ষিতত এইবাৰ পৃথিৱীৰ সামগ্রিক তাপমাত্রা দুই ডিগ্রী চেলচিয়াছ পর্যন্ত বৃদ্ধিৰ আশংকা কৰা হৈছে। এই সম্পর্কত মার্কিন বতৰ বিজ্ঞান কেন্দ্ৰই এক বিবৃতিত কয়, ‘এইবাৰ এলনিনোৱে ইতিহাস সৃষ্টি কৰিব পাৰে। বিজ্ঞানীসকলে কৈ আহিছে যে এইবাৰ এলনিনো চলিত শতিকাৰ সবাতোকৈ শক্তিশালী এলনিনো হোৱাৰ আশংকা আছে।’
অৱশ্যে মার্কিন বতৰ বিজ্ঞান কেন্দ্ৰকে ধৰি বহু বৈজ্ঞানিক সংস্থাই অতি এলনিনো শব্দটো ব্যৱহাৰ কৰা নাই। তৎসত্ত্বেও অতি শক্তিশালী এলনিনোক বুজাবলৈ অতি এলনিনো শব্দটো সংযোজিত হৈছে। বিজ্ঞানীসকলৰ মতে এনে অৱস্থা ১৯৫০ৰ পাছত এইবাৰ প্ৰথমবাৰৰ বাবে সৃষ্টিৰ আশংকা আছে।
