মুম্বাই মহানগৰীৰ ব্যস্ত ৰাস্তাত এতিয়াৰ পৰা দেখা যাব চালকহীন মেজিক টেক্সী। প্রতিদিনৰ যাত্ৰীসকলৰ যাতায়াত আৰু সহজ কৰিবলৈ তথা যানজটমুক্ত বাণিজ্যিক নগৰী গঢ়ি তোলাৰ লক্ষ্যৰে এক যুগান্তকাৰী পদক্ষেপ গ্রহণ কৰিছে মহাৰাষ্ট্ৰ চৰকাৰে।
সম্প্ৰতি কুৰলা আৰু বিকেচি (বান্দ্ৰা কুৰলা কমপ্লেক্স) ৰ মাজত দেশৰ অন্যতম আধুনিক ‘পড টেক্সী’ প্ৰকল্পৰ ভূমিপূজন বা শিলান্যাস কৰিলে মহাৰাষ্ট্ৰৰ মুখ্যমন্ত্রী দেবেন্দ্র ফাড়নবিশে। চেম্বৰৰ ডায়মণ্ড গার্ডেন মেট্রো ষ্টেচনত আয়োজিত এই অনুষ্ঠানত তেওঁৰ লগত উপস্থিত আছিল উপ-মুখ্যমন্ত্রী একনাথ শিণ্ডে আৰু সুনেত্রা পাৱাৰ।
মুম্বাইৰ প্ৰধান বাণিজ্যিক কেন্দ্র বিকেচিত উপস্থিত হ’বলৈ প্রতিদিনে লোকেল ট্রেইন বা মেট্রোৰ পৰা নমাৰ পাছত শেষ মুহূৰ্তৰ যাতায়াত বা ‘লাষ্ট মাইল কনেক্টিভিটি’ক কেন্দ্রদ্ৰ কৰি চৰম আহুকালৰ সম্মুখীন হয় সাধাৰণ মানুহ। সেই দুর্গতি দূৰ কৰিবলৈকে এমএমআৰডিএৰ তৰফৰ পৰা এই ‘অটোমেটিক ৰেপিড ট্রানজিট ছিষ্টেম’ বা পড টেক্সী প্ৰৱৰ্তনৰ উদ্যোগ গ্রহণ কৰিছে।
মুখ্যমন্ত্ৰীয়ে আশ্বস্ত কৰিছে যে এই প্ৰকল্পৰ বাবে প্রয়োজনীয় সকলো অনুমতিপত্র ইতিমধ্যে পোৱা গৈছে আৰু আগন্তুক ১০ মাহৰ ভিতৰতে প্রথম দফাৰ কাম শেষ হ’ব।
এই পড টেক্সী হৈছে প্রধানকৈ বেটাৰীচালিত তথা কৃত্রিম বুদ্ধিমত্তাৰ দ্বাৰা নিয়ন্ত্রিত এক স্বয়ংক্রিয় ব্যৱস্থা। প্রতিখন পড টেক্সীত ছজন যাত্রীয়ে বহিব পাৰিব। সর্বাধিক ৪০ কিলোমিটাৰ গতিবেগৰ এই যানসমূহ প্রতি ১৫ ছেকেণ্ডৰ অন্তৰালত ষ্টেচনলৈ আহিব। ইয়াৰ বিশেষত্ব হৈছে, যাত্রীসকলে যিটো ষ্টেচন নিৰ্বাচন কৰিব, পড টেক্সীখনে পোনেই তাতেই থমকি ৰ’ব, যি যাতায়াতক অত্যন্ত দ্রুত আৰু দক্ষ কৰি তুলিব।
সম্পূর্ণ প্রকল্পটো ৮.৮৫ কিলোমিটাৰ দীঘল হ’ব আৰু ইয়াত মুঠ ২২টা শীততাপ নিয়ন্ত্রিত ষ্টেচন থাকিব। প্রথম দফাত বান্দ্রা আৰু কুৰলাৰ মাজত ৩.৩৬ কিলোমিটাৰ পথ নিৰ্মাণ কৰা হ’ব। এই ব্যৱস্থাটোৱে এলবিএথ মাৰ্গ আৰু কালানগৰৰ দৰে গুৰুত্বপূৰ্ণ অঞ্চলসমূহক যুক্ত কৰিব। কেৱল সেয়াই নহয়, মেট্রো লাইন তিনি আৰু মেট্রো লাইন দুইৰ স’তেও ইয়াৰ সংযোগ থাকিব, ফলত মেট্রোৰ পৰা নামিয়ে যাত্রীসকলে সহজে গন্তব্যত উপস্থিত হ’ব পাৰিব।
সবাতোকৈ ডাঙৰ বিষয়টো হৈছে, এই প্রকল্পটো চৰকাৰী-বেচৰকাৰী অংশীদাৰিত্বৰ ভিত্তিত বাস্তৱায়িত কৰা হৈছে। ফলত ৰাজ্য চৰকাৰ বা এমএমআৰডিএৰ ওপৰত কোনো আর্থিক বোজা নপৰিব, বিপৰীতে ই কত-‘পক্ষৰ বাবে ৰাজহ সৃষ্টি কৰিব।
২০৩১ৰ ভিতৰত প্ৰতিদিনে ১.০৯ লাখ যাত্রীয়ে এই সেৱা ব্যৱহাৰ কৰিব বুলি আশা কৰা হৈছে। মুখ্যমন্ত্রী ফাড়নবিশে লগতে জনায় যে এই প্রকল্প সফল হ’লে মহানগৰীৰ আন স্থানতো ইয়াক প্রয়োগ কৰাৰ কথা ভবা হৈছে। সমান্তৰালকৈ বিকেচিৰ যোগাযোগ ব্যৱস্থা আৰু উন্নত কৰিবলৈ এলানি সুৰংগ নিৰ্মাণৰ পৰিকল্পনাও আছে চৰকাৰৰ।
এটা সুৰংগ বান্দ্ৰা-উর্লি ছী লিংকৰ পৰা বুলেট ট্রেইন ষ্টেচন পর্যন্ত যাব, যাৰ এটা অংশ বিমানবন্দৰৰ স’তেও যুক্ত হ’ব।
সকলো মিলাই মুম্বাইবাসীৰ যাতায়াতত এক ডাঙৰ বিপ্লৱ আনিবলৈ সাজু হৈছে এই পড টেক্সীয়ে। মুখ্যমন্ত্রীয়ে সতৰ্ক কৰি দিছে যে এই প্ৰকল্পৰ কামত কোনোবাই বাধা দিয়াৰ চেষ্টা কৰিলে কঠোৰ ব্যৱস্থা গ্রহণ কৰা হ’ব। আশা কৰা হৈছে যে আগন্তুক কিছু বছৰৰ ভিতৰতে দেশৰ আন গুৰুত্বপূৰ্ণ চহৰতো এনে চালকবিহীন টেক্সী দেখা পোৱা যাব।