ডিব্ৰুগড়ৰ মদাৰখাত চাহ বাগিচাৰ হেজাৰ হেজাৰ চাহ শ্ৰমিকক আৰু কৰ্মচাৰীক কে’বামাহৰ দৰমহা নিদিয়াত বাগিচাখনৰ শ্ৰমিকৰ মাজত হাহাকাৰ অৱস্থাৰ সৃষ্টি হৈছে ৷ মন কৰিবলগীয়া যে দশক দশক ধৰি মদাৰখাট চাহ বাগিচাৰ শ্ৰমিকক ন্যায্য প্ৰাপ্যৰ পৰা বঞ্চিত কৰি অহাৰ পৰিপেক্ষিতত দুবছৰ পূৰ্বে মদাৰখাট বাগিচাৰ পৰিচালন সঞ্চালক চিত্ৰৰঞ্জন চক্ৰৱৰ্তীক বদলি কৰি চান্তা চক্ৰৱৰ্তীক বাগিচাখনৰ পৰিচালন সঞ্চালকৰ দায়িত্ব দিয়া হৈছিল ৷ কিন্তু, চান্তা চক্ৰৱৰ্তীও চাহ বাগিচাখনৰ হেজাৰ হেজাৰ শ্ৰমিকক ন্যায় দিব নোৱাৰিলে যাৰ বাবে বৰ্তমান পাঁচটা পষেক ধৰি চাহ শ্ৰমিকসকল দৰমহাৰ পৰা বঞ্চিত হৈ থকাৰ লগতে আৰু কৰ্মচাৰীসকলেও কে’বামাহৰ দৰমহা লাভ কৰা নাই ৷
উল্লেখ্য যে বৰ্তমানলৈকে শ্ৰমিকৰ দৰমহাৰ, ৭৩, ০৪, ৬৬২ টকা অনাদায় হৈ থকাৰ লগতে কৰ্মচাৰীৰ দৰমহা ৯৬, ৮৩, ৯১১ টকা অনাদায় হৈ আছে আৰু ভৱিষ্যনিধি বাকেয়া হৈ আছে ৩০, ৬০, ১৭৯ টকা, শ্ৰমিক-কৰ্মচাৰীৰ বোনাচ বাকেয়া হৈ আছে ২৩, ১১, ২১৪ টকা, শ্ৰমিক-কৰ্মচাৰীৰ এৰিয়া বাকেয়া হৈ আছে ৮৪, ৩৫, ২৫২ টকা আৰু এ পি জি এল টি এ, শ্ৰমিকৰ ৰেচন, মেডিকেল আদিত বকেয়া হৈ আছে ২, ৪২, ৩০, ৮৫৫ টকা ৷
ইফালে, মালিকপক্ষৰ অৱহেলা আৰু সোপা ঢিলা নীতিৰ বাবেই মদাৰখাট চাহ বাগিচাত শ্ৰমিকসকল দৰমহাৰ পৰা বঞ্চিত হৈ হাহাকাৰ কৰিবলগীয়া হৈছে বুলি স্পষ্ট কৰি দিছে আটছা ডিব্ৰুগঞ্জ জিলা সমিতিয়ে ৷ ২৮টা শ্বেয়াৰ হ’ল্ডাৰ থকা মদাৰখাট বাগিচাৰ মালিকসকলে ইচ্ছা কৰা হ’লে বাগিচাখন ভাল কৰিব পাৰিলেহেঁতেন কিন্তু মালিকসকলৰ আন্তঃকন্দলৰ বাবেই শ্ৰমিকসকল দুৰ্ভোক্ষ জীৱন কটাইছে বুলি আটছাই উল্লেখ কৰিছে ৷
আনহাতে, আজি আটছা লাহোৱাল শাখাৰ সভাপতি-সম্পাদকৰ নেতৃত্বত মদাৰখাট চাহ বাগিচাৰ শ্ৰমিক-কৰ্মচাৰীয়ে ন্যায্য প্ৰাপ্তিৰ দাবীত বাগিচাখনত বৃহৎ প্ৰতিবাদী কাৰ্যসূচী ৰূপায়ণ কৰে ৷ হাতে হাতে প্লে কাড লৈ শ্ৰমিকসকলে মালিকপক্ষ হায় হায়, শ্ৰমিকৰ দৰমহা মোকলাই দিয়ক, বাকেয়া হৈ থকা ভৱিষ্যনিধি ধন মোকলাই দিয়ক আদি, মদাৰখাট চাহ বাগিচা নীলাম কৰক আদি শ্ল’গানেৰে পৰিৱেশ উত্তাল কৰি তোলে ৷
প্ৰতিবাদী কাৰ্যসূচীত অসম চাহ মজদুৰ সংঘ মদাৰখাট চাহ বাগিচা গোটৰ সভাপতি সম্পাদকৰ লগতে বাগিচাখনৰ শ শ শ্ৰমিক-কৰ্মচাৰীয়ে অংশ গ্ৰহণ কৰি শীঘ্ৰে প্ৰাপ্য আদায় নাপালে ভয়াবহ পৰিস্থিতি সন্মুখীন হ’ব বুলি সকীয়নি দিছে । উল্লেখযোগ্য যে উক্ত চাহ বাগিচাখন পূৰ্বে এনে কাৰণতে কে’বাবাৰো উতপ্ত পৰিস্থিতি সৃষ্টি হৈছে ।