অহা ২০ জানুৱাৰী তাৰিখে অনুষ্ঠিত হ’বলগীয়া ঠেঙাল কছাৰী স্বায়ত্ত শাসিত পৰিষদৰ নিৰ্বাচনৰ বাবে ভাৰতীয় জাতীয় কংগ্ৰেছ দলেও প্ৰথমখন প্ৰাৰ্থী তালিকা প্ৰকাশ কৰিছে।
মঙলবাৰে নিশা বিজেপি দলে প্ৰকাশ কৰা প্ৰাৰ্থী তালিকাৰ পাচতেই উজনি অসমৰ যোৰহাট জিলাৰ দহটা সমষ্টি, গোলাঘাট জিলাৰ পাঁচটা , লক্ষীমপুৰ জিলাৰ পাঁচটা আৰু ধেমাজি জিলাৰ এটা সমষ্টিকে ধৰি মুঠ ২১ টা সমষ্টিৰ বাবে কংগ্ৰেছ দলে আজি প্ৰাৰ্থী তালিকা চূড়ান্ত কৰিছে।
মনোনয়ন দাখিলৰ বাবে মাজত মাত্ৰ এটা দিন থকা অৱস্থাতে আজি কংগ্ৰেছ দলে প্ৰথমখন ২১ জনীয়া তালিকা প্ৰকাশ কৰি নিৰ্বাচনত অৱতীৰ্ণ হোৱাৰ বাবে ৰণকৌশল প্ৰস্তুত কৰিছে। অসম প্ৰদেশ কংগ্ৰেছৰ জেষ্ঠ্য মুখপাত্ৰ মনজিত মহন্তই প্ৰকাশ কৰা প্ৰাৰ্থী তালিকা অনুসৰি ঠেঙাল পৰিষদীয় নিৰ্বাচনৰ অন্তৰ্গত তিতাবৰ বিধান সভা সমষ্টিৰ দহটা সমষ্টি, গোলাঘাট জিলাৰ পাঁচটা সমষ্টি, লক্ষীমপুৰ জিলাৰ পাঁচটা সমষ্টি আৰু ধেমাজি জিলাৰ এটা সমষ্টিৰ প্ৰাৰ্থী তালিকা প্ৰকাশ কৰিছে।
অসম প্ৰদেশ কংগ্ৰেছে ঠেঙাল পৰিষদৰ নিৰ্বাচনৰ বাবে প্ৰকাশ কৰা প্ৰথমখন তালিকা অনুসৰি তিতাবৰ বিধানসভা সমষ্টিৰ অন্তৰ্গত নগাবাট সমষ্টিত সুনীল ৰেগন, মহিলাৰ বাবে সংৰক্ষিত বৰহোলা সমষ্টিত বন্তি বৰা শইকীয়া, মাধপুৰ সমষ্টিত অনিল কছাৰী,ফুলবাৰী সমষ্টিত ৰাতুল শইকীয়া, দিহিঙ্গীয়া সমষ্টিত অচিন্ত শইকীয়া,তিতাবৰ সমষ্টিৰ লক্ষ্যজিত হাজৰিকা, বৰুৱাজান সমষ্টিত কনৰাম কছাৰী,জালুকনিবাৰী সমষ্টিত পূৰ্ণেশ্বৰ শইকীয়া, চামগুৰি সমষ্টিত অক্ষয়মনি শইকীয়া আৰু তামোলবাৰী সমষ্টিত লক্ষেশ্বৰ হাজৰিকাক প্ৰাৰ্থীত্বৰূপে প্ৰক্ষেপ কৰিছে।
গোলাঘাট জিলাৰ পাঁচটা সমষ্টিৰ ভিতৰত ঠেঙাল কমাৰগাঁও সমষ্টিত বিপিন বৰা, গেলাবিল সমষ্টিত হিৰণ্য বৰা,মহিলাৰ বাবে সংৰক্ষিত কাছমাৰী সমষ্টিত জাহ্নৱী শইকীয়া, চাউদাঙ পথাৰ সমষ্টিত ছায়া ঠেঙাল, চাউদাঙ পথাৰ দৈয়াং সমষ্টিত উৎপল ঠেঙালক কংগ্ৰেছ দলে প্ৰাৰ্থীত্বৰূপে প্ৰক্ষেপ কৰিছে।
লক্ষীমপুৰ জিলাৰ পাঁচটা সমষ্টিত কংগ্ৰেছে প্ৰাৰ্থীত্ব প্ৰদান কৰা প্ৰাৰ্থীসকল একাদিক্ৰমে হ’ল বঙালমৰা ( পূব ডিক্ৰং) সমষ্টিত কৃষ্ণ হাজৰিকা, পাভ লালুক সমষ্টিত মহেন্দ্ৰ শইকীয়া, মহিলাৰ বাবে সংৰক্ষিত লক্ষীমপুৰ পূব সমষ্টিত তুলুমণি সোণোৱাল বৰা, বিহপুৰীয়া ( দক্ষিণ) সমষ্টিত ৰাজ কুমাৰ বৰা আৰু জকাইপেলুৱা হাৰমতী সমষ্টিত অপূৰ্ব হাজৰিকাক প্ৰাৰ্থীত্ব প্ৰদান কৰিছে।
ধেমাজি জিলাৰ একমাত্ৰ সমষ্টি ৰূপহী বৰগড়া সমষ্টিত কংগ্ৰেছ দলে প্ৰাৰ্থীত্ব প্ৰদান কৰিছে মৃদুপৱন বৰাক। ডিব্ৰুগড় জিলাত থকা ঠেঙাল পৰিষদীয় সমষ্টিৰ একমাত্ৰ সমষ্টি মেৰবিল নাহৰকটীয়া সমষ্টিৰ বাবে কংগ্ৰেছ দলে এতিয়াও প্ৰাৰ্থীত্ব চূড়ান্ত কৰা নাই।