যুদ্ধ পৰিস্থিতিত ভাৰতীয় শিক্ষাৰ্থীসকলক লৈ ইউক্রেইনৰ (Ukraine) পৰা দেশলৈ ঘূৰি আহিল এয়াৰ ইণ্ডিয়াৰ বিমান । মঙলবাৰে নিশা প্ৰায় ১১.৩০ বজাত কিয়েভৰ পৰা অহা ‘AI1946’ বিমানখন দিল্লীত অৱতৰণ কৰে ।
তথ্য অনুসৰি, কালি সন্ধিয়া প্ৰায় ছয় বজাত ইউক্রেইনৰ ৰাজধানী কিয়েভৰ বৰিছপিল আন্তর্জাতিক বিমানবন্দৰৰ পৰা ২৪২ জন ভাৰতীয় শিক্ষাৰ্থীক লৈ ৰাওনা হয় এয়াৰ ইণ্ডিয়াৰ বিশেষ বিমানখন । কিছু ঘণ্টাৰ যাত্রা শেষ কৰি মঙলবাৰে নিশা দিল্লীৰ ইন্দিৰা গান্ধী আন্তর্জাতিক বিমানবন্দৰত অৱতৰণ কৰে । যুদ্ধ শংকা প্রাক্তন ছোভিয়েত সদস্য দেশখনৰ পৰা ঘূৰি অহা শিক্ষাৰ্থীসকলৰ অধিকাংশই ইউক্রেইনত চিকিৎসা বিভাগত পঢ়ি আছে । দেশখনৰ বর্তমান পৰিস্থিতিক লৈ ছাত্রসকলৰ মন্তব্য, যুদ্ধৰ শংকা থাকিলেও পৰিৱেশ এতিয়াও শান্তিপূর্ণ ।
ভাৰতীয় দূতাবাসৰ পৰামর্শ মানিয়ে তেওঁলোকে দেশত ঘূৰি অহাৰ সিদ্ধান্ত লয় । কিছুদিন পূৰ্বেই কিয়েভৰ ভাৰতীয় দূতাবাসে শিক্ষাৰ্থীসকলক দ্রুত ইউক্রেইন ত্যাগ কৰাৰ পৰামর্শ দিয়ে ।
দিল্লী বিমানবন্দৰত অৱতৰণ কৰাৰ পাছত শিৱম চৌধুৰী নামে চিকিৎসা বিভাগৰ এজন শিক্ষাৰ্থীয়ে কয়, “পৰিস্থিতি এতিয়াও শান্তিপূর্ণ । অৱশ্যে পৰিস্থিতি উত্তেজিত । ঘৰত উভতি আহি ভাল লাগিছে ।” উল্লেখ্য যে, কম খৰচ আৰু উন্নত পৰিকাঠামোৰ বাবে ভাৰতীয় চিকিৎসা বিভাগৰ শিক্ষাৰ্থীসকলৰ ইউক্রেইনলৈ আকর্ষণ প্রৱল । দেশখনত বর্তমান প্রায় ২০ হেজাৰ শিক্ষাৰ্থী আছে । তেওঁলোকৰ নিৰাপত্তাৰ দায়িত্ব ল’বলৈ ৰাষ্ট্রসংঘত উদ্বেগ প্রকাশ কৰিছে ভাৰতৰ স্থায়ী প্রতিনিধি টি এছ তিৰুমূর্তিয়ে । ইউক্রেইনৰ পৰা উভতি অহা আন এজন শিক্ষাৰ্থীয়ে কয়, “ঘৰলৈ উভতি ভালেই লাগিছে । তাত পৰিস্থিতি শান্তিপূর্ণ । কিন্তু মা-দেউতাই চিন্তা কৰিছিল, সেয়ে দেশত উভতাৰ সিদ্ধান্ত লৈছিলো ।”
উল্লেখ্য, সোমবাৰে ৰুছপন্থী বিদ্রোহীৰ দখলত থকা ডোনেৎস্ক আৰু লুহানস্কক ‘স্বাধীন’ ৰাষ্ট্রৰ মর্যাদা দিয়ে ৰাছিয়াই । ফলত ক্রিমিয়াৰ পাছত পুনৰ বিভক্ত হ’ল ইউক্রেইন । এনে চৰম উত্তেজনাপূর্ণ পৰিস্থিতিত জৰুৰী বৈঠকত মিলিত হৈছে ৰাষ্ট্রসংঘ । পৰিস্থিতি নিয়ন্ত্রণ কৰিবলৈ ইতিমধ্যে মার্কিন ৰাষ্ট্ৰপতি জ’ বাইডেনৰ স’তে ফোনত আলোচনা কৰিছে ইউক্রেইনৰ ৰাষ্ট্ৰপতি ভল’দিমিৰ জেলেন্সকিয়ে ।
