Loksabha Election 2024:
লোকসভা নিৰ্বাচনলৈ মাজত মাত্ৰ কেইটামান মাহ থকা অৱস্থাত ৰাজ্যৰ প্ৰধান বিৰোধী দল কংগ্ৰেছে ১৪ টা সংসদীয় সমষ্টিৰ বাবে ৮৪ জনীয়া প্রার্থিত্ব প্ৰত্যাশীৰ প্ৰাৰম্ভিক পেনেল প্ৰকাশ কৰিছে ৷
উল্লেখ্য যে,প্ৰদেশ কংগ্ৰেছৰ উদ্যোগত গঠন কৰা এঘাৰটাদলৰ ঐক্যমঞ্চক কংগ্ৰেছে এক প্ৰকাৰ নস্যাৎ কৰি ১৪ টা সমষ্টিৰ প্রার্থিত্ব প্ৰত্যাশীৰ প্ৰাৰম্ভিক পেনেল প্ৰস্তুত কৰা কাৰ্যই একপ্ৰকাৰ বিৰোধী উমৈহতীয়া মঞ্চৰ মাজত তীব্ৰ জোকাৰণীৰ সৃষ্টি কৰিছে ৷
এঘাৰটাদলৰ ঐক্যমঞ্চৰ অন্যতম আঞ্চলিক দলে এজেপিয়েও ইতিমধ্যে সম্ভাব্য প্ৰাৰ্থী তালিকা প্ৰকাশ কৰিছে ৷
এনে ঘটনা ক্ৰমক লৈ তীব্ৰ প্ৰতিক্ৰিয়া প্ৰকাশ কৰিছে ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে ৷
ইপিনে কংগ্ৰেছৰ সমান্তৰালভাৱে এআই ইউডি এফেও তিনিটা সংসদীয় সমষ্টিৰ বাবে সম্ভাব্য প্ৰাৰ্থী তালিকা প্ৰকাশ কৰিছে ৷
বিজেপি বিৰোধী হিচাপে জনাজাত কংগ্ৰেছ সহ দুই দলৰ সম্ভাব্য প্ৰাৰ্থী তালিকা প্ৰকাশৰ বিপৰীতে কৌশলীস্থিতি লৈ শাসকীয় বিজেপি দল বহি আছে নিৰৱে ৷
উল্লেখ্য যে,কংগ্ৰেছে অতি শীঘ্ৰে ৰাজ্যজুৰি প্রার্থিত্ব প্ৰত্যাশীসকলৰ গণভিত্তি তথা জনপ্রিয়তা সন্দৰ্ভত সমীক্ষা চলাব। এই সমীক্ষাৰ অন্তত প্রার্থিত্ব প্ৰত্যাশীৰ চূড়ান্ত পেনেল প্রস্তুত কৰিব বুলি সদৰি কৰে এআইচিচিৰ সাধাৰণ সম্পাদক তথা এপিচিচিৰ তত্বাবধায়ক জিতেন্দ্র সিঙে।
২০২৪ ৰ লোকসভা নিৰ্বাচনৰ বাবে নিৰ্বাচন আয়োগৰ নিৰ্বাচনী সূচী ঘোষণা নৌহওতেই কংগ্ৰেছে ১৪ টা লোকসভা সমষ্টিত প্ৰাৰ্থীত্বৰ বাবে আৱেদন কৰা প্ৰাৰ্থীসকলৰ নামৰ তালিকা প্ৰকাশ কৰিছে।
বুধবাৰে গুৱাহাটীৰ ৰাজীৱ ভৱনত দলটোৰ ৰাজনৈতিক পৰিক্ৰমা কমিটীৰ এখন গুৰুত্বপূৰ্ণ বৈঠক অনুষ্ঠিত হয়। এআইচিচিৰ ৰ সাধাৰণ সম্পাদক তথা প্রদেশ কংগ্ৰেছৰ তত্ত্বাৱধায়ক জিতেন্দ্ৰ সিঙৰ উপস্থিতিত অনুষ্ঠিত এই বৈঠকত লোকসভা নিৰ্বাচনৰ বাবে সাম্ভাব্য প্ৰাৰ্থীৰ নামৰ বিষয়ে খৰচি মাৰি মাৰাথন
আলোচনা কৰে ৷
বৈঠকৰ পাছতে এআইচিচিৰ ৰ সাধাৰণ সম্পাদকজনে সংবাদ মাধ্যমৰ আগত সদৰি কৰে যে, লোকসভা নিৰ্বাচনৰ বাবে অসমৰ ১৪টা সমষ্টিৰ প্ৰাৰ্থিত্বক লৈ ৰাজীৱ ভৱনত অনুষ্ঠিত সভাত কেতবোৰ আলোচনা কৰা হয় ৷ সেই অনুসৰি ৰাজ্যৰ ১৪ টা লোকসভা সমষ্টিৰ বিপৰীতে ৮৪ জনীয়া প্রার্থিত্ব প্ৰত্যাশীৰ প্ৰাৰম্ভিক পেনেল প্ৰস্তুত কৰা হয় যদিও প্রার্থিত্ব প্ৰত্যাশীৰ সংখ্যা আৰু বৃদ্ধি পোৱাৰ সম্ভাৱনা ব্যক্ত কৰে নেতাজনে ৷
আনহাতে চুড়ান্ত প্ৰাৰ্থীৰ তালিকা প্ৰস্তুত কৰাৰ পূৰ্বে প্ৰাৰ্থীৰ গণভিত্তি আৰু জনপ্ৰিয়তা সন্দৰ্ভত চলোৱা হ’ব সমীক্ষা ৷এই সমীক্ষাৰ ওপৰত ভিত্তি কৰিয়ে দলটোৱে চুড়ান্ত তালিকা জাৰি কৰিব ৷
এপিচিচিয়ে জাৰি কৰা ১৪টা লোকসভা সমষ্টিৰ ৮৪ জনীয়া প্রার্থীৰ তালিকাত অন্তৰ্ভুক্ত হোৱা প্ৰাৰ্থী সকল হ’ল কাজিৰঙা সমষ্টিত কংগ্ৰেছৰ একমাত্ৰ প্ৰাৰ্থী হিচাপে পেনেলত স্থান দিয়া হৈছে কলিয়াবৰৰ বৰ্তমানৰ সাংসদ তথা লোকসভাত বিৰোধী দলৰ উপ- দলপতি গৌৰৱ গগৈক ৷
ধুবুৰী সমষ্টিত কংগ্ৰেছৰ মুঠ ১২ গৰাকী সম্ভাব্য প্ৰাৰ্থীৰ নামৰ প্ৰস্তাৱ দিয়া হৈছে যদিও সমষ্টিৰ বাবে স্থান দিয়া হৈছে বৰপেটাৰ বৰ্তমানৰ সাংসদ আব্দুল খালেক আৰু চামগুৰিৰ বিধায়ক ৰকিবুল হুছেইনক ৷
আনহাতে বৰপেটা সমষ্টিত পাঁচ গৰাকী প্ৰাৰ্থীৰ নাম অন্তভুৰ্ক্ত কৰি স্থান দিয়া হৈছে বৰপেটাৰ বৰ্তমানৰ সাংসদ আব্দুল খালেক আৰু সৰুক্ষেত্ৰীৰ বিধায়ক জাকিৰ হুছেইন শিকদাৰৰ নাম ।
একেদৰে গুৱাহাটী সংসদীয় সমষ্টিত মুঠ ছয় গৰাকী প্ৰাৰ্থীৰ নাম অন্তভুৰ্ক্ত কৰা হয় ৷প্ৰাৰ্থী সকল হ’ল ক্ৰমে ববিতা শৰ্মা, মীৰা বৰঠাকুৰ, ৰমেন বৰঠাকুৰ, প্ৰাক্তন ৰাজ্যসভাৰ সাংসদ দ্বীজেন শৰ্মা আৰু মানস বৰা।
নগাঁও সমষ্টিৰ বাবে বৰ্তমানৰ সাংসদ প্ৰদ্যুৎ বৰদলৈৰ লগতে নাম অন্তভুৰ্ক্ত কৰা হয় চামগুৰিৰ বিধায়ক ৰকিবুল হুছেইনৰ নাম দিয়া। ইফালে,শোণিতপুৰত কংগ্ৰেছৰ ছয় প্ৰাৰ্থীৰ নাম তালিকাভুক্ত কৰি স্থান দিয়া হয় প্ৰাক্তন কেন্দ্ৰীয় মন্ত্ৰী পৱন সিং ঘাটোৱাৰ, তেজপুৰৰ প্ৰাক্তন সাংসদ আৰ পি শৰ্মা আৰু অভিজিৎ হাজৰিকাৰ নাম ।
লখিমপুৰ সমষ্টিৰ বাবে ছয় গৰাকীৰ নামৰ তালিকা প্ৰস্তুত কৰা হয় ৷সেই অনুসৰি তালিকাত স্থান পোৱা প্ৰাৰ্থী সকল হ’ল সমষ্টিটোৰ প্ৰাক্তন সাংসদ ৰাণী নৰহ, ৰামান্না বৰুৱা, পদ্মেশ্বৰ দলে ৷ আনপিনে ডিব্ৰুগড়ত এপিচিচিৰ প্ৰশাসনিক সাধাৰণ সম্পাদক বিপুল গগৈ আৰু প্ৰাক্তন বিধায়ক ৰাজু চাহু আৰু যোৰহাটৰ বাবে প্ৰস্তুত কৰা তিনিজনীয়া প্ৰাৰ্থী তালিকাত স্থান পোৱা প্ৰাৰ্থী সকল হ’ল বনশ্ৰী গগৈ , মামনি গগৈ আৰু মনজিৰ গগৈ।
মনকৰিবলগীয়া যে,কংগ্ৰেছৰ ১৪টা সংসদীয় সমষ্টিৰ বাবে ৮৪ জনীয়া প্রার্থিত্ব প্ৰত্যাশীৰ প্ৰাৰম্ভিক পেনেল প্ৰস্তুত কৰাৰ সমান্তৰালভাৱে অসম জাতীয় পৰিষদে জাৰি কৰিছে প্ৰাৰ্থী তালিকা ৷
গুৱাহাটী লোকসভা সমষ্টিত কমল নয়ন চৌধুৰী, কাজিৰঙা সমষ্টি বাবে দুজনীয়া তালিকাত নাম অন্তভূক্ত হৈছে ৰাজু ফুকন আৰু পুলিন হাজৰিকা ৷
ইপিনে বৰপেটা লোকসভা সমষ্টিৰ দুজনীয়া তালিকাত অসমীয়া চিনেমাৰ মোহময়ী অভিনেত্ৰী জেৰিফা ৱাহিদ আৰু চন্দ্রকান্ত দাসৰ নাম ৷ ধুবুৰীৰ বাবে দলটোৰ উপ- সভাপতি দুলু আহমেদ আৰু ছুৰত আলী শ্বেখৰ নাম ৷
উল্লেখ্য যে,অসম জাতীয় পৰিষদে বিশেষ বুজাবুজি অনুসৰি যোৰহাট সমষ্টি এৰিবলৈ সাজু হৈছে ৰাইজৰ দলৰ বাবে ৷একেদৰে অৱসৰ প্ৰাপ্ত ভাৰতীয় প্ৰশাসনিক বিষয়া জন ইংতি কাথাৰৰ নেতৃত্বাধীন এপিএইচএলচিক দিয়া হয় পাৰ্বত্য সমষ্টি ডিফুক ৷
বিশেষ সূত্ৰে জানিব পৰা মতে মঙলদৈত এজেপিয়ে নিৰ্বাচনত অৱতীৰ্ণ কৰাব শীৰ্ঘেই দলটোত যোগদান কৰিবলগীয়া এজন প্ৰাক্তন সাংসদক ৷
আনহাতে কংগ্ৰেছৰ বিপৰীতে মেৰুত থকা এ আই ইউ ডি এফে ইতিমধ্যে ততাতৈয়াকৈ প্ৰস্তুত কৰিছে তিনিটা সমষ্টিৰ বাবে প্ৰাৰ্থী তালিকা ৷ বদৰুদ্দিন আজমল নেতৃত্বাধীন দলটোৱে আভান্তৰিন সমীক্ষাৰ ভিত্তিতে প্ৰাৰ্থী তালিকা সাজু কৰিছে বুলি উল্লেখ কৰিছে ৷
সেই অনুসৰি দলটোৰ মুৰব্বী বদৰুদ্দিন আজমলক পুনৰ প্ৰাৰ্থীত্ব দিয়া হয় ধুবু্ৰী সমষ্টিত ৷ নগাঁও সমষ্টিৰ বাবে প্ৰস্তুত কৰা দুজনীয়া পেনেল তালিকাত অন্তভুৰ্ক্ত কৰা হয় ধিঙৰ সাংসদ আমিনুল ইজলাম আৰু জেহিৰুল ইছলামক ৷আনহাতে কৰিমগঞ্জৰ তিনিজনীয়া প্ৰাৰ্থী তালিকাত নাম অন্তভুৰ্ক্ত কৰা হৈছে যমুনামখৰ বিধায়ক চিৰাজউদ্দিন আজমল,ড:কে এম বাহাৰুল আৰু চাচুল আহমেদ চৌধুৰীক ৷
কংগ্ৰেছ ,এ জে পি আৰু এ আই ইউ ডি এফে লোকসভা নিৰ্বাচনৰ সূচী ঘোষণা নৌহওঁতেই সম্ভাব্য প্ৰাৰ্থী তালিকা ঘোষণা কৰাৰ বিপৰীতে শাসকীয় বিজেপিয়ে এইক্ষেত্ৰত কৌশলীস্থিতি লৈ ভিতৰুৱাকৈ ক্ষেত্ৰভিত্তিক সমীক্ষা অব্যাহত ৰাখি চুড়ান্ত প্ৰাৰ্থী তালিকা প্ৰকাশ কৰাৰ সম্ভাৱনা ব্যক্ত কৰে নাম প্ৰকাশত অনিচ্ছুক প্ৰদেশ বিজেপিৰ জ্যেষ্ঠ নেতা এজনে ৷