Ramlala was Revived by Prime Minister Narendra Modi:
আজি সূর্যোদয়ৰ পাছতে অযোধ্যাত এক দীর্ঘ বছৰ অপেক্ষাৰ অন্তত নির্মিত ভব্য ৰাম মন্দিৰত প্ৰাণ প্ৰতিষ্ঠা হ’ল ৰামলালাৰ।
প্ৰধানমন্ত্ৰী নৰেন্দ্ৰ মোদীৰ হাতেৰে প্ৰাণ প্ৰতিষ্ঠা হ’ল ৰামলালাৰ। দুপৰীয়া ১২ বাজি ২৯ মিনিট ৩ ছেকেণ্ডত অভিজিৎ মুহূৰ্ত আৰম্ভ হয়। পৱিত্ৰ এই মুহূৰ্ত আছিল ১২ বাজি ৩০ মিনিট ৩৫ ছেকেণ্ডলৈ।
প্ৰধানমন্ত্ৰী মোদী অযোধ্যাৰ বাল্মিকী বিমানবন্দৰত পুৱা ১০.২৫ বজাত উপস্থিত হয় । বিমানবন্দৰৰ পৰা হেলিকপ্টাৰে অযোধ্যাৰ ৰাম মন্দিৰৰ সমীপতে অস্থায়ীভাৱে নিৰ্মিত হেলিপেডত উপস্থিত হয় । প্ৰধানমন্ত্ৰী গৰাকীক হেলিপেডত উস্ম আদৰণি জনায় মুখ্যমন্ত্ৰী যোগী আদিত্যনাথ আৰু ৰাজ্যপালে ৷ পাছত তাৰ পাছত ১০.৫৫ বজাত ৰাম মন্দিৰ প্ৰাংগণত উপস্থিত হৈ দুপৰীয়া ১২ বজাৰ পৰা গর্ভগৃহত প্ৰৱেশ কৰে প্ৰধানমন্ত্ৰী মোদী ৷
নিজৰ ভাষণত মোদীয়ে কয়, অৱশেষত আজি আমাৰ মাজলৈ আহিল ৰাম । সুৰ্দীঘ পাঁচ শতিকাৰ অপেক্ষাৰ আমাৰ ৰাম আকৌ এবাৰ বিদ্যমান হ’ল ৷ শতিকাৰ ত্যাগ আৰু তপস্যাৰ পিছত প্ৰভু ৰাম আহিল। এই শুভ সময়ত মই সকলোকে জনালো বহু বহু শুভেচ্ছা।
এই বৰ্ষৰ আজিৰ এই পবিত্ৰ দিনটোত এই সুৰুযে এই অদ্ভুত আভা লৈ আহিছে। এই দিনটো কেলেণ্ডাৰৰ তাৰিখ নহয়, এয়া এক নতুন কালচক্ৰৰ উদয়। ৰাম মন্দিৰৰ ভূমি পূজনৰ পিছৰে পৰা প্ৰতিদিনে দেশত উৎসাহ বৃদ্ধি পাইছিল। নিৰ্মাণ কাৰ্য দেখি দেশবাসীৰ প্ৰতিদিনে এক নতুন বিশ্বাস সৃষ্টি হৈছিল। আজি আমি শতিকাৰ সেই ধৈৰ্যৰ ফল পাইছো। আজি আমি শ্ৰীৰামৰ মন্দিৰ পাইছো।
আজিৰ পৰা হাজাৰ বছৰ পিছতো মানুহে এই তাৰিখটোৰ চৰ্চা কৰিব। আমি এই সময়খিনিৰ সাক্ষী। এই সময় সাধাৰণ সময় নহয়, এই কালৰ চক্ৰত সৰ্বকালৰ চিয়াহীৰে অংকিত অমিত স্মৃতিৰেখা। য’ত ৰামৰ কাম হয়, তাত পৱন পুত্ৰ হনুমান বিৰাজমান হয়। সেইবাবে মই ৰামভক্ত হনুমানকো প্ৰণাম কৰিছো। মাতা জানকী, লক্ষ্মণ, ভৰত, শত্ৰুঘ্ন সকলোকে প্ৰণাম জনাইছো।
মোদীয়ে কয়, ‘‘মই আজি প্ৰভু শ্ৰীৰামৰ পৰা ক্ষমা বিচাৰিছো, আমাৰ তপস্যাত হয়তো কিছু অভাৱ আছিল যাৰ বাবে ইমান দিনলৈ এই কাম কৰিব পৰা নাছিলো, আজি সেই কাম পূৰণ হৈছে। আজি প্ৰভু ৰামে নিশ্চয় আমাক ক্ষমা কৰিব।’
প্ৰধানমন্ত্ৰী গৰাকীয়ে আৰু কয়, দেশৰ কোণো কোণে পৃথক পৃথক ভাষাত ৰামায়ণ শুনাৰ সৌভাগ্য হৈছে। বিগত ১১ দিনতো ৰামায়ণ শুনাৰ সৌভাগ্য হৈছে। এই ৰামৰস জীৱনৰ প্ৰৱাহৰ দৰে নিৰন্তৰ বৈ থাকে। ৰাম কথা অসীম। ৰামায়ণো অনন্ত। ৰামৰ আদৰ্শ, মূল্য সকলো স্থানত সমান। আজিৰ এই ক্ষণ উৎসৱৰ ক্ষণৰ লগতে ভাৰতীয় সমাজৰ পৰিপক্কতাৰো সময়। আমাৰ বাবে এই সময় কেৱল বিজয়ৰ নহয়, বিনয়ৰো হয়। আমাৰ ভৱিষ্যৎ আমাৰ অতীতকৈ বহু সুন্দৰ হ’বলৈ গৈ আছে।
ৰামলালাৰ এই মন্দিৰৰ নিৰ্মাণ ভাৰতীয় সমাজৰ শান্তি, ধৈৰ্য আৰু সামাজিক সদ্ভাৱ আৰু আন্তৰিকতাৰ প্ৰতীক। ৰাম মন্দিৰে সমাজৰ সকলো বৰ্গৰ উজ্জ্বল ভৱিষ্যতৰ পথৰ প্ৰেৰণা লৈ আহিছে। ৰাম শক্তি। ৰাম বিবাদ নহয়, ৰাম সমাধান। ৰাম কেৱল আমাৰ নহয়, ৰাম সকলোৰে। ৰাম কেৱল বৰ্তমান নহয়, ৰাম অনন্ত
আজি দেশত নিৰাশাৰ স্থান নাই। আহক আমি সংকল্প লওঁ, ৰাষ্ট্ৰ নিৰ্মাণৰ বাবে আমি জীৱনৰ পল পল সমৰ্পণ কৰিম। এয়া ভাৰতৰ বিকাশৰ অমৃত কাল। আজি ভাৰত যুৱশক্তিৰ পুঁজিৰে পৰিপূৰ্ণ, শক্তিৰে পৰিপূৰ্ণ। এনে পৰিস্থিতি নাজানো কিমান সময় পিছত হৈছে। আমি এতিয়া বহি থাকিব নালাগিব। যুৱ প্ৰজন্মই ভাৰতৰ নতুন প্ৰভাত লিখিব লাগিব ৷
মোদীয়ে কয়, আহিবলগীয়া সময় সফলতাৰ হ’ব। এই ৰাম মন্দিৰ সাক্ষী হ’ব ভাৰতৰ উৎকৰ্ষৰ, উদয়ৰ, বিকশিত ভাৰতৰ। এই মন্দিৰে শিকাই, যদিহে লক্ষ্য সত্য প্ৰমাণিত হয় তেতিয়া সেয়া প্ৰাপ্ত কৰা অসম্ভৱ নহয়। এয়া ভাৰতৰ সময়। ভাৰত এতিয়া আগবাঢ়িব। আমি এতিয়া ৰৈ নাথাকো। বিকাশৰ শিখৰলৈ গৈয়ে এৰিম।
উল্লেখ্য যে ,ইতিমধ্যে উলাহে নধৰা অযোধ্যাত বিৰ দি বাট নোপোৱা অৱস্থাৰ সৃষ্টি হৈছে। দেশৰ ভিন্ন প্ৰান্তৰ পৰা অহা হেজাৰ হেজাৰ ভি ভি আই পি, সাধু-সন্তৰে ভৰি পৰিছে অযোধ্যাৰ পবিত্র ভূমি।
মহাতাৰকা অমিতাভ বচ্চন, ক্ৰিকেটৰ ভগৱান শচীন তেণ্ডুলকাৰ, দক্ষিণৰ মহাতাৰকা ৰজনীকান্ত ,উদ্যোগপতি মুকেশ আম্বানি সহ প্রায় আঠ হেজাৰ নিমন্ত্রিত অতিথিয়ে আজি উপস্থিত হয় ৰামলালাৰ প্ৰাণ প্রতিষ্ঠা কাৰ্যসূচীত।
সোমবাৰে প্ৰধানমন্ত্ৰী নৰেন্দ্ৰ মোদীয়ে বেদবিহিত কৰ্মৰে ৰাম মন্দিৰৰ গর্ভগৃহত সংস্থাপিত ৰামচন্দ্ৰৰ প্ৰতিমূৰ্তিৰ প্ৰাণ ও প্ৰতিষ্ঠা কৰাৰ পাছত অহা মঙলবাৰৰ পৰা সৰ্বসাধাৰণ দৰ্শনাৰ্থীৰ বাবে মুকলি হ’ব মন্দিৰৰ দুৱাৰ। সোমবাৰে নিমন্ত্রিত অতিথিসকলে মন্দিৰ দৰ্শন কৰিব পাৰিব যদিও সাধাৰণ জনতাই মঙলবাৰৰ পৰা দিনটোত দুবাৰকৈ মন্দিৰ দৰ্শনৰ সুযোগ পাব।
মঙলবাৰে পুৱা সাত বজাত মন্দিৰৰ মূল দুৱাৰ মুকলি কৰা হ’ব। তেতিয়া সাধাৰণ জনতাই মন্দিৰত প্ৰৱেশ কৰি পূজা-অৰ্চনা কৰিব পাৰিব। দিনৰ ১১-৩০৩ মন্দিৰৰ দুৱাৰ বন্ধ কৰা হ’ব। আঢ়ৈ ঘণ্টাৰ বিৰতিৰ পাছত দিনৰ দুই বজাৰ পৰা সন্ধিয়া সাত বজালৈকে পুনৰ মন্দিৰৰ দুৱাৰ খোলা থাকিব দৰ্শনাৰ্থীৰ বাবে।
উল্লেখ্য যে ৰাম মন্দিৰত প্ৰতিদিনে তিনিবাৰ আৰতি প্ৰদান কৰা হ’ব। পুরা ৬-৩০ বজাত প্ৰদান কৰা হ’ব প্রথম আৰতি। পুৱাৰ এই আৰতিক কোৱা হ’ব ‘জাগৰণ আৰতি’। ইয়াৰ পাছতে দুপৰীয়া ১২ বজাৰ পৰা ৰাম মন্দিৰত হ’ব ‘ভোগ আৰতি’।
আকৌ সন্ধিয়া সাত বজাত কৰা হ’ব ‘সন্ধ্যা আৰতি’। শ্ৰীৰাম জনমভূমি তীর্থক্ষেত্ৰ ন্যাসে সদৰী কৰা মতে, দর্শনার্থীয়ে আৰতি চাবলৈ হ’লে নির্দিষ্ট সময়ৰ আধাঘণ্টা সময় পূর্বে মন্দিৰৰ কেম্প অফিচত নিজৰ পৰিচয়পত্ৰ লৈ উপস্থিত হ’ব লাগিব।
তাৰে পৰা প্ৰৱেশ পত্র সংগ্ৰহ কৰিলেহে আৰতি দৰ্শনৰ বাবে মন্দিৰত প্ৰৱেশ কৰিব পাৰিব ভক্তসকলে। উল্লেখ্য যে আজি ৰাম মন্দিৰ উদ্বোধনক কেন্দ্ৰ কৰি সমগ্র দেশজুৰি আৰম্ভ হৈছিল উৎসৱমুখৰ পৰিৱেশৰ। কেন্দ্ৰীয় চৰকাৰে আজি ৰাম মন্দিৰ উদ্বোধনৰ কাৰ্যসূচীৰ ডি ডি যোগে পোনপটীয়া সম্প্ৰচাৰ চোৱাৰ সুবিধাৰ্থে চৰকাৰী কাৰ্যালয়সমূহত দিনৰ ২-৩০ বজালৈ অৰ্ধছুটী ঘোষণা কৰিছিল ।
ইফালে, উত্তৰ প্ৰদেশ আৰু মহাৰাষ্ট্ৰত সোমবাৰৰ দিনটো বন্ধৰ দিন ঘোষণা কৰিছিল । মুঠতে ৰাম মন্দিৰৰ প্ৰাণ প্রতিষ্ঠাক লৈ এফালে যিদৰে অযোধ্যাত পূর্ণ প্রস্তুতি তুংগত উঠিছে, ঠিক তেনেদৰে দেশৰ সৰ্বত্ৰ চৰকাৰী বন্ধ, অর্ধছুটী, ড্রাই ডে, মাছ-মাংসৰ বিক্ৰী বন্ধ আদিকে ধৰি বিভিন্ন নির্দেশনা জাৰি কৰি ৰাজ্যসমূহত ৰাম মন্দিৰ উদ্বোধনৰ কাৰ্যসূচী উদ্যাপনৰ ব্যৱস্থা কৰা হৈছিল ৷