Thousands of colorful clay candles have come from abroad to challenge local pottery artists:
পোহৰৰ উৎসৱ দীপাৱলীলৈ মাজত মাথোঁ কেইটামান ঘণ্টা বাকী। দীপাৱলী উপলক্ষে ৰাজ্যজুৰি প্রস্তুতি চলাৰ সমান্তৰালভাবে মৃৎ শিল্পীসকলৰো ভীষণ ব্যস্ততা বৃদ্ধি পাইছে। মৃৎ শিল্পীসকলৰ হাতৰ পৰশত সৃষ্টি হোৱা হেজাৰ হেজাৰ মাটিৰ চাকিৰে ৰাজ্যৰ বজাৰসমূহ ভৰি পৰিছে। তাৰ মাজতে থলুৱা মৃৎ শিল্পীসকলক প্রত্যাহ্বান জনাই বহিঃৰাজ্যত উৎপাদিত ৰং বিৰঙী মাটিৰ চাকিৰে উভৈনদী হৈ পৰিছে ৰাজ্যৰ বজাৰসমূহ।
উল্লেখ্য যে ৰাজ্যৰ বিভিন্ন প্রান্তৰ লগতে গুৱাহাটীৰ বজাৰসমূহো থলুৱা মুৎ শিল্পীসকলে প্রস্তুত কৰা দীপাৱলীৰ সামগ্রীবে ভৰি পৰিছে। উত্তৰ-পূবৰ অন্যতম বাণিজ্যিক কেন্দ্রস্থল ফাঁচীবজাৰৰ পৰা আৰম্ভ কৰি গণেশগুৰি, খানাপাৰা, বেলতলা আদি প্রতিটো অঞ্চলৰ পথৰ কাষে কাষে থলুৱা উৎপাদিত দীপাৱলীৰ সামগ্রীবে ভৰি পৰিছে। সমান্তৰালভাৱে কলকাতাৰ পৰা আমদানিকৃত ৰং-বিৰঙি মাটিৰ চাকিৰেও ভৰি পৰিছে মহানগৰীৰ বজাৰসমূহ।
তাৰ মাজতে বহিঃৰাজ্যৰ পৰা অহা এই চাকিসমূহে থলুৱা চাকিৰ বজাৰখনত প্রভাৱ পেলাব বুলি সম্ভাৱনা ব্যক্ত কৰিছে ক্ষুব্ধ ব্যৱসায়ীসকলে। উল্লেখ্য যে মহানগৰীৰ মালিগাঁও, বিজয়নগৰ, কলংপাৰ আদি অঞ্চলৰ মৃৎ শিল্পীসকলে প্রস্তুত কৰি উলিওৱা হেজাৰ হেজাৰ মাটিৰ চাকিৰে ভৰি পৰিছে মহানগৰীৰ বজাৰসমূহ। কেৱল গণেশগুৰি উৰণীয়া সেতুৰ তলৰ পৰা গণেশমন্দিৰলৈ পথৰ দুয়োকাষে অর্ধশতাধিক বিপণীত থলুৱা মৃৎ শিল্পীৰে উৎপাদন কৰা প্রায় সাত-আঠ লাখ মাটি চাকিৰে ঠাহ খাই আছে।
কে’বাজনো ব্যৱসায়ীয়ে বিগত বৰ্ষৰ তুলনাত বর্তমানলৈ বজাৰ ভাল নহয় বুলি স্বীকাৰ কৰি অৱশ্যে মাজৰ দুদিনত বজাৰ ভাল হ’ব বুলি আশা প্রকাশ কৰিছে। অৱশ্যে মূল্যবৃদ্ধিৰ ফলত দীপাৱলীৰ বজাৰত কিছু প্ৰভাৱ পৰা পৰিলক্ষিত হৈছে বুলিও কে’বাজনো ব্যৱসায়ীয়ে মন্তব্য কৰে। গোপাল বড়ো উচ্চতৰ মাধ্যমিক বিদ্যালয়ৰ সন্মুখত দীপাৱলীৰ সময়ত বিগত প্রায় ২০ বছৰ ধৰি মাটিৰ চাকিৰ ব্যৱসায় চলাই অহা কৰুণা কলিতাই দীপাৱলীৰ বজাৰ যিদৰে হ’ব লাগিছিল, তেনেধৰণৰ হোৱা নাই বুলি মন্তব্য কৰি কয় যে এইবাৰ তেওঁ মালিগাঁৱৰ পৰা সৰু-বৰ প্রায় ৩০ হেজাৰ মাটি চাকি আনিছে।
এশটা সৰু তেল চাকি দুশ টকাৰ পৰা আৰম্ভ কৰি তেওঁ বিক্ৰী কৰিছে; কিন্তু ব্যবসায় বিগত বৰ্ষৰ দৰে নহয় বুলি তেওঁ উল্লেখ কৰি কয় যে হয়তো মাটিৰ চাকিৰ দোকান বৃদ্ধি পোৱাৰ বাবে বিক্রী হ্রাস পাইছে যেন অনুভৱ হৈছে; কিন্তু গ্রাহকসকলক দেখিলে মূল্যবৃদ্ধিয়ে প্রভাৱ পেলোৱা যেন লাগে। বিশেষকৈ তেল চাকি পূর্বতে যিদৰে শ হিচাপত বিক্ৰী হৈছিল, এইবাৰ এজন গ্রাহকে ৩০টা, ৪০টাহে ক্রয় কৰা দেখিবলৈ পোৱা গৈছে। কে’বাজনো গ্রাহকে আনকি তেলৰ যি দাম কি চাকি জ্বলাব বুলিও মন্তব্য কৰা দেখা গৈছে।
তথাপিও আৰু যিহেতু দুটা দিন আছে, সেয়ে বজাৰ ভাল হ’ব বুলি তেওঁ মনত আশা পুহি ৰাখিছে। আন এজন ব্যবসায়ী অতুল ডেকাই এইবাৰ প্রায় পাঁচ হেজাৰ চাকি বিক্ৰীৰ বাবে আনিছে যদিও পূৰ্বৰ দৰে বজাৰ নাই বুলি মন্তব্য কৰে। উল্লেখ্য যে মূল্যবৃদ্ধিৰ লগতে কলকাতাৰ পৰা অহা ৰং-বিৰঙৰ মাটিৰ চাকি, নানা ৰঙৰ বিজুলী বাতি আদিয়ে থলুৱা উৎপাদিত মাটিৰ চাকিৰ বজাৰখনত প্ৰভাৱ পেলোৱা বুলি একাংশ ব্যৱসায়ীয়ে দাবী কৰে।