কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ে ৰাষ্ট্ৰীয় মহিলা আয়োগ (NCW) পৃষ্ঠপোষকতাত ১২ আৰু ১৩ ডিচেম্বৰত আয়োজন কৰা ‘অসংগঠিত খণ্ডত মহিলা’ শীর্ষক দুদিনীয়া আলোচনা চক্ৰখনৰ সফলতাৰে সামৰণি মৰা হৈছে।
খানাপাৰাৰ ৰেছম নগৰস্থিত বিশ্ববিদ্যালয়ৰ প্রেক্ষাগৃহত আয়োজিত এই আলোচনা চক্ৰখনত অস্বীকৃতিপ্রাপ্ত খণ্ডত কাম কৰি থকা মহিলাসকলৰ সবলীকৰণ আৰু কল্যাণৰ সৈতে জড়িত বিভিন্ন গুৰুত্বপূর্ণ বিষয়ত মতৰ আদান-প্রদান ঘটে। সাম্প্রতিক সময়ত অসংগঠিত খণ্ডৰ ক্ৰমে বৃদ্ধি পোৱা প্রাধান্য আৰু ভাৰতৰ সৰ্বমুঠ ঘৰুৱা উৎপাদনৰ প্ৰায় অর্দ্ধেক অংশ এই খণ্ডটোৱে উৎপাদন কৰি থকা কথাটোৱে আলোচনাত স্থান লাভ কৰে।
বিশ্ববিদ্যালয় সংগীত পৰিৱেশনৰ পাচতেই অসমৰ শিক্ষাক্ষেত্ৰলৈ অমূল্য অৱদান আগবঢ়াই থৈ যোৱা মহান পণ্ডিত কৃষ্ণকান্ত সন্দিকৈৰ প্রতিকৃতিত মাল্যার্পণ কৰি আলোচনা চক্ৰখনৰ শুভাৰম্ভ কৰা হয়। আলোচনা চক্র আয়োজক সমিতিৰ অধ্যক্ষ অধ্যাপক জয়দীপ বৰৱাই আদৰণি ভাষাত সামাজিক লিংগভিত্তিক বৈষম্যত বিশেষ আলোকপাত কৰি ভাৰতৰ শ্রমশক্তিৰ গতিশীলতা সম্পর্কে সাৰুৱা বিশ্লেষণ আগবঢ়ায়। নির্দিষ্ট বক্তাৰ আসন শুৱনি কৰা অৰণাচল প্ৰদেশৰ ৰাজীৱ গান্ধী বিশ্ববিদ্যালয়ৰ অর্থনীতি বিজ্ঞান বিভাগৰ অধ্যাপিকা বন্দনা উপাধ্যায়ে তেওঁৰ ‘ভাৰতৰ অসংগঠিত শ্রম বজাৰত মহিলাঃ উত্তৰ-পূৱ ভাৰতৰ অন্তর্দৃষ্টি’ শীর্ষক বক্তৃতাত বহুতো চিন্তা উদ্রেককাৰী বিষয়ৰ অৱতাৰণা কৰে। শিলচৰৰ অসম বিশ্ববিদ্যালয়ৰ উপাচার্য অধ্যাপক ৰাজীৱ মোহন পন্তে দিয়া মুখ্য অতিথিৰ ভাষাত অসংগঠিত খণ্ডত কৰ্মৰত মহিলাৰ দুঃসহ জীৱনৰ বাস্তৱ ছবি এখন বর্ণনা কৰে। তেওঁ ভাৰতত কেতিয়াবা মহিলাসকলৰ সবলীকৰণ ঘটাব পৰা পাৰিপাৰ্শ্বপ্ৰণালী এটা আছিল জানো বুলিও প্রশ্ন উত্থাপন কৰে।
স্বর্ণকাল, বিষকাল আৰু অমৃতকালত বিভক্ত কৰি অধ্যাপক পন্তে ভাৰতৰ ক্রমবিকাশ কালৰ ঐতিহাসিক ৰেহৰৰূপৰ ব্যাখ্যা আগবঢ়ায়। কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ৰ উপাচার্য অধ্যাপক ৰাজেন্দ্ৰ প্ৰসাদ দাসে সভাপতিৰ আসনৰ পৰা দিয়া ভাষণত সামাজিক লিংগভিত্তিক সমতাৰ পৃষ্ঠপোষকতা কৰিবলৈ তথা মহিলা সবলীকৰণৰ প্ৰচেষ্ট চলাই যাবলৈ থকা বিশ্ববিদ্যালয়ৰ দায়বদ্ধতাৰ কথা দৃঢ়তাৰে দোহাৰে।
কেইবাটাও কাৰিকৰী অধিৱেশনত ভাগ কৰা আলোচনা চক্ৰখনত অংশগ্ৰহণ কৰা কেইগৰাকীমান বিশিষ্ট বিশেষজ্ঞ হ’ল অসমৰ প্ৰাক্তন মহাধিবত্তা অধ্যাপক ৰমেশ বৰপাত্র গোঁহাই, অমিয় কুমাৰ দাস সামাজিক পৰিৱৰ্তন আৰু উন্নয়ন প্ৰতিষ্ঠানৰ সহযোগী অধ্যাপিকা শাশ্বতী চৌধুৰী, তেজপুৰ বিশ্ববিদ্যালয়ৰ অধ্যাপক চন্দন কুমাৰ শৰ্মা, গুৱাহাটী বিশ্ববিদ্যালয়ৰ অধ্যাপিকা পলী ভক্লিন আৰু অসম নর্থ-ইষ্ট নেটৱ’ৰ্কৰ অনুৰীতা পি. হাজৰিকা। তেওঁলোক আটায়ে মজুৰিৰ তাৰতম্যৰ ক্ষেত্রত থকা প্রত্যাহবানসমূহ, সামাজিক সুৰক্ষাৰ অভাৱ, মহিলা অধিকাৰৰ পৃষ্ঠপোষকতাকাৰী নীতি গ্রহণ তথা প্রণয়নৰ বৰ্দ্ধিত আৱশ্যকতা আৰু মহিলাৰ আৰ্থিক স্বতন্ত্রতা আদিৰ দৰে অসংগঠিত খণ্ডত কৰ্মৰত মহিলাৰ সৈতে জড়িত নানা দিশৰ বিভিন্ন মাত্ৰাত আলোকপাত কৰে।
গুৱাহাটীৰ আৰক্ষী আয়ুক্ত দিগন্ত বৰুৱাই ১৩ ডিচেম্বৰত দিয়া স্বস্তিৱাচনিক ভাষণত ৰাষ্ট্ৰৰ সামাজিক তথা অর্থনৈতিক উন্নয়নত মহিলাৰ ভূমিকাৰ বিষয়ে উল্লেখ কৰি তেওঁলোকৰ অৱস্থা উন্নত কৰিবলৈ বিস্তৃত কার্যকৌশল প্রয়োগ কৰাৰ প্ৰয়োজনীয়তাত জোৰ দিয়ে। সামৰণি অধিৱেশনত উপস্থিত থকা অসম চৰকাৰৰ উচ্চশিক্ষা নিৰ্দেশালয়ৰ নিৰ্দেশক পলী বৰুৱাই নিজৰ ভাষণত কয় যে অসংগঠিত খণ্ডত কাম কৰা মহিলাসকলে আর্থিক নিৰ্ভৰশীলতা, ভাবুকি আৰু জীয়াই থকাৰ প্ৰয়োজনীয়তাৰ খাতিৰত প্ৰায়েই হিংসাত্মক ঘৰুৱা পৰিৱেশত জীৱন কটাবলৈ বাধ্য হৈ পৰা দেখা যায়।
আলোচনা চক্ৰখনৰ আহবায়ক ডঃ ৰীতিমণি বৰদলৈয়ে এই দুদিনীয়া আলোচনা চক্ৰখনত আলোচিত বিষয়বোৰৰ এক সাৰ টোকা প্রদান কৰে। সহ-আহবায়ক ডঃ ডোলা বৰকাকতিয়ে আলোচনা চক্ৰখনত ভাগ লোৱা আটাইৰে শলাগ লৈ এই দুদিনীয়া অনুষ্ঠানৰ সামৰণি মাৰে। আলোচনা চক্ৰখনত বিভিন্ন শিক্ষানুষ্ঠানৰ শিক্ষক-শিক্ষার্থীকে ধৰি সামাজিক কর্মকর্তা আৰু বিভিন্ন খণ্ডৰ বৃত্তিজীবিয়ে অংশগ্রহণ কৰে।
