Trump warns China and India over import tariffs on US goods:
আগ্রাসী মার্কিন ৰাষ্ট্ৰপতি ড’নাল্ড ট্রাম্পে এইবাৰ মার্কিন সামগ্রীত আমদানি শুল্ক বৃদ্ধিৰ অজুহাত দি চীন, ভাৰত আৰু ব্রাজিললৈ সকীয়নি জাৰি কৰিলে।
ভাৰতৰ প্ৰধানমন্ত্ৰী নৰেন্দ্ৰ মোদীয়ে ট্রাম্প প্রশাসনৰ স’তে সম্পৰ্ক দৃঢ় কৰি তোলাৰ প্ৰয়াস অব্যাহত ৰখাৰ সময়তে মঙলবাৰে মার্কিন ৰাষ্ট্ৰপতিজন চীন, ভাৰত আৰু ব্রাজিলৰ বিৰুদ্ধে সৰৱ হৈ উঠে। আনকি শেহতীয়া চর্চা অনুসৰি অহা মাহত ৱাশিংটনত ট্রাম্পৰ স’তে আলোচনাত মিলিত হ’ব প্রধানমন্ত্রী মোদী।
মোদী-ট্রাম্পৰ আগন্তুক এই আলোচনাক লৈ চৰ্চা আৰম্ভ হোৱাৰ সময়তে ফ্ল’ৰিডাত এক অনুষ্ঠানত ভাষণ দি নৱনিযুক্ত মার্কিন ৰাষ্ট্ৰপতিজনে লগতে কয়, ‘চীন-ভাৰত আৰু ব্রাজিলে শুল্ক বৃহৎ হাৰত বৃদ্ধি কৰিছে। মোৰ চৰকাৰে এয়া অব্যাহত থাকিবলৈ নিদিয়ে। আমি আমেৰিকাক প্রথম স্থানত উপনীত কৰিবলৈ গৈ আছো।’
লক্ষ্যণীয় যে শেহতীয়াভাৱে বিশ্বত পাঁচ দেশীয় সংস্থা ‘ব্রিকছ‘ৰ প্ৰভাৱ বৃদ্ধি পাইছে ব্রাজিল, ৰাছিয়া, ভাৰত, চীন আৰু দক্ষিণ আফ্ৰিকাৰে গঠিত সংস্থাটোৰ যে দৰাচলতে বিশ্বত গুৰুত্ব বৃদ্ধি পাইছে সেয়া মার্কিন ৰাষ্ট্ৰপতিজনৰ এনে মন্তব্যই প্রমাণ কৰে বুলি চর্চা হৈছে।
উল্লেখ্য যে যোৱা ২০ জানুৱাৰীত দ্বিতীয়বাৰৰ বাবে মার্কিন ৰাষ্ট্ৰপতিৰূপে শপত গ্ৰহণ কৰাৰ পাছতে ট্রাম্পে কেতবোৰ অত্যন্ত কঠোৰ কাৰ্যবাহী নির্দেশ জাৰি কৰে। ইয়াৰে অন্যতম হৈছে অনুপ্ৰৱেশকাৰীৰ বিৰুদ্ধে তেওঁ জাৰি কৰা নিৰ্দেশ। এই নির্দেশে সমগ্র বিশ্বতে জোঁকাৰণিৰ সৃষ্টি কৰি আছে। এনে অৱস্থাতে মার্কিন সামগ্ৰীত চীন, ভাৰত আৰু ব্রাজিলে অত্যধিক আমদানি শুল্ক আৰোপ কৰা বুলি সৰৱ হৈ উঠে ৰাষ্ট্ৰপতিজন।
অৱশ্যে তেওঁ যোৱা বছৰ ৰাষ্ট্ৰপতি নির্বাচনত বিজয়ী ঘোষিত হোৱাৰ পাছতো উক্ত তিনি দেশৰ বিৰুদ্ধে মার্কিন সামগ্রীত আমদানি শুল্ক বৃদ্ধিৰ অভিযোগ উত্থাপন কৰি সৰৱ হৈছিল। মঙলবাৰে তেওঁ কয়, ‘বিদেশী ৰাষ্ট্ৰসমূহ আৰু যিসমূহ দেশৰ লোকে আমাৰ ক্ষতি কৰে সেইসকলৰ দেশত উৎপাদিত তথা আমাৰ ইয়ালৈ ৰপ্তানি হোৱা সামগ্ৰীৰ ওপৰত আমি শুল্ক আৰোপ কৰিবলৈ গৈ আছো। এনে লোকে নিজৰ দেশক ভাল কৰিবলৈ বিচাৰে।
চীন, ভাৰত, ব্রাজিল আদি বহুসংখ্যক দেশে বৃহৎ হাৰত শুল্ক আৰোপ কৰিছে। এনে ঘটনা অধিক দিন অব্যাহত থাকিবলৈ আমি নিদিওঁ। কাৰণ আমি আমেৰিকাক প্ৰথম স্থানত উপনীত কৰিবলৈ গৈ আছো।’ তেওঁ চীন, ভাৰত আৰু ব্রাজিললৈ এই সকীয়নি জাৰি কৰাৰ লগে লগে অনুষ্ঠানত সমবেতসকলে উছাহ প্রদর্শন কৰে।
লক্ষ্যণীয়ভাৱে আমেৰিকা যুক্তৰাষ্ট্ৰৰ বৃহত্তম বাণিজ্যিক সহযোগী হৈছে ভাৰত। তৎসত্ত্বেও ট্রাম্পে বিগত ৰাষ্ট্ৰপতি নিৰ্বাচনৰ প্ৰচাৰৰ সময়ত ভাৰতক অতি ডাঙৰ উৎপীড়নকাৰী আখ্যা দিছিল। তদুপৰি তেওঁ হুংকাৰ দিছিল যে ভাৰতকে ধৰি ‘ব্ৰিকছ’ ৰাষ্ট্ৰসমূহৰ পৰা আমেৰিকালৈ ৰপ্তানি হোৱা সামগ্রীসমূহত এশ শতাংশ শুল্ক আৰোপ কৰিব।
🔷 কাৰ্যবাহী নির্দেশ ব্যর্থ কৰিব বিচৰা অর্ধশতাধিক জ্যেষ্ঠ চৰকাৰী বিষয়াক বাধ্যতামূলক ছুটী
ৰাষ্ট্ৰপতি ট্রাম্পৰ ৰোষত পৰি বাধ্যতামূলক ছুটীত যাবলগীয়া হ’ল মার্কিন প্রশাসনৰ ৫৬জন জ্যেষ্ঠ বিষয়া। আন্তর্জাতিক উন্নয়নৰ মার্কিন সংস্থা (ইউএছএইড) ত কৰ্মৰত একাংশ বিষয়াই ৰাষ্ট্ৰপতি ট্রাম্পৰ কাৰ্যবাহী নির্দেশ ব্যর্থ কৰাৰ ষড়যন্ত্রত লিপ্ত হোৱাৰ অভিযোগ উত্থাপিত হৈছে।
এই বিষয়াবৰ্গৰ এনে স্থিতিৰ কথা পোহৰলৈ অহাৰ পাছতে ইউএছ এইডৰ কমেও ৫৬জন বিষয়াক বাধ্যতামূলক ছুটী প্ৰদান কৰা হৈছে। এই ৫৬ বিষয়াৰ এনে অবাধ্য আচৰণ ধৰা পেলায় ইউএছএইডৰ প্রশাসক জেছন গ্রেই।
আনহাতে, এই বৃহৎসংখ্যক বিষয়াক ট্রাম্প প্রশাসনে বাধ্যতামূলক ছুটী দিয়াত ইউএছএইডৰ কাম-কাজত ব্যাঘাত জন্মোৱাৰ আশংকা প্রৱল হৈছে। ইতিমধ্যে ট্রাম্পে আন এক কার্যবাহী নির্দেশৰ জৰিয়তে ইউএছএইডলে পুঁজি যোগান ৯০ দিনৰ বাবে স্থগিত কৰিছে। ইউএছএইডে বিভিন্ন দেশক সাহায্য প্রদান কৰে। এই কাম সংস্থাটোরে মার্কিন বৈদেশিক দপ্তৰৰ জৰিয়তে কৰে।
এনেদৰে সংস্থাটোৱে বিশ্বৰ বিভিন্ন দেশত মানৱসেৱামূলক কাম-কাজ কৰে। আনহাতে, ইউএছএইডৰ অর্ধশতাধিক জ্যেষ্ঠ বিষয়াক বাধ্যতামূলক ছুটী দিয়া সম্পৰ্কত সংস্থাটোৰ প্ৰশাসক গ্রেই এক জাননীত কয়, ‘পৰৱৰ্তী জাননী জাৰি নকৰালৈকে সম্পূৰ্ণ দৰমহা আৰু অন্যান্য সা-সুবিধাসহ ইউএছএইডৰ একাংশ বিষয়াক বাধ্যতামূলক ছুটী দিয়া হৈছে।
অৱশ্যে সংস্থাটোৰ কোনসকল বিষয়াই ৰাষ্ট্ৰপতিৰ কাৰ্যবাহী নিৰ্দেশ ব্যর্থ কৰাৰ অপচেষ্টা চলায় সেইসকলৰ বিষয়ে সবিশেষ তথ্য প্রকাশৰ পৰা গ্ৰে বিৰত আছে।
আনহাতে, মার্কিন বৈদেশিক সচিব মার্ক’ ৰুবিঅ’ই সংবাদ মাধ্যমৰ আগত কয় যে সম্প্রতি মার্কিন প্রশাসনে কেৱল ইজৰাইল আৰু ইজিপ্তলৈহে জৰুৰী খাদ্য আৰু সামৰিক সাহায্য যোগান অব্যাহত ৰাখিছে। আন সকলো দেশলৈ মার্কিন প্রশাসনে আগবঢ়াই অহা সাহায্য বাতিল কৰিছে বুলি বৈদেশিক সচিব ৰুবিঅ’ই সদৰী কৰে।