Two youths killed in road accident abroad:
এইবেলি ব’হাগত ঘৰলৈ অহাৰ কথা আছিল দুয়ো । আপোনভূমিৰ ঘৰ দুখনতো কিছু উন্নয়নৰ পৰশ দিয়াৰ কথা আছিল । পৰিয়ালৰ জ্যেষ্ঠ সকলক ন-বস্ত্ৰ দান কৰি বিহুৰ সেৱা জনোৱাৰ পৰিকল্পনা আছিল দুয়োৰে । ভাবিছিল সাত বিহুৰ ভিতৰতে ঘৰৰ সকলোকে কথাষাৰ কাণচোৱাই পিছৰটো ব’হাগলৈ তহঁতৰ লগ এগৰাকী বাঢ়িব বুলি মনৰ সাঁচতীয়া কথাবোৰ দুয়োৱে পৃথককৈ প্ৰকাশ কৰিব । কিন্তু সেয়া নহ’ল ।
ভাৱনাৰ নাওখন আহি চ’তৰ ঘাট নৌপাওঁতেই মাঘৰ ঘাটতেই কাললৈ অন্তৰ্দ্ধান হ’ল । নিষ্ঠুৰ নিয়তিয়ে কাঢ়ি নিলে দুয়োৰে প্ৰাণ । ঘৰৰ পৰা ২,৩৮০ কিলোমিটাৰ (পথ দৈৰ্ঘ্য) নিলগৰ ৰাজস্থানৰ উদয়পুৰৰ এক ব্যস্ত পথত শিল হ’ল দুয়োৰে শৰীৰ । এক শোকাৱহ পথ দুৰ্ঘটনাত অতীত হ’ল একে গাঁৱৰে প্ৰায় সমবয়সীয়া দুই পৰিশ্ৰমী যুৱক । তেওঁলোক দুয়ো হৈছে বিদ্যুত বৰদলৈ (২৯) আৰু কণ্টক বৰদলৈ (৩১) ।
নগাঁও জিলাৰ জাজৰি আৰক্ষী থানাৰ অন্তৰ্গত গোঁসাইবৰি ডাকঘৰৰ এলেকাধীন ৰহঢলা গাঁৱৰ এই দুই যুৱকে দহ বছৰ পূৰ্বেই সংস্থাপনৰ বাবে ঢাপলি মেলিছিল ৰাজস্থানলৈ । এক ব্যক্তিগত প্ৰতিষ্ঠানত কৰ্মৰত আছিল দুয়ো । যোৱা ৩০ জানুৱাৰীত কৰ্মস্থলীৰ সমীপতে বন্ধু এগৰাকীৰ মটৰ চাইকেল লৈ দুয়ো বজাৰ কৰিবলৈ ওলাই গৈছিল । কিন্তু সেই যে গ’ল তেওঁলোক আৰু সোঁশৰীৰে ঘূৰি নাহিল ।
ইয়াৰ পৰিৱৰ্তে আজি পুৱা ঘটনাৰ পঞ্চমটো দিনত জন্মভূমিলৈ ঘূৰি আহিল দুয়োৰে নিথৰ দেহ । এখন পানীভৰ্ত্তি টেংকাৰত খুন্দা মৰাৰ ফলত থিতাতে নিহত হয় একে গাঁৱৰে দুই যুৱক । তেওঁলোকৰ কৰ্মৰত উদ্যোগ গোষ্ঠীৰ তৎপৰতাত আজি এখন বগা ৰঙৰ এম্বুলেন্সত লৈ অনা হয় দুয়োৰে অপাৰ্থিৱ দেহ ।
সেমেকা শোকাচ্ছন্ন পৰিৱেশত দাউ দাউকৈ জ্বলি উঠে দুখনকৈ চিতা । আজি পুৱা ৯ বজাত শতাধিক লোকৰ উপস্থিতিত ৰহঢলাৰ জনজাতি শ্মশানত শেষকৃত্য সম্পন্ন কৰা হয় দুয়োৰে । দহ ফুট ব্যৱধানৰ দুখনকৈ চিতাৰ জুয়ে গ্ৰাস কৰে তেওঁলোকৰ অৱয়ব । কাৰণ জুয়ে নুবুজে মৰম, দয়া । নকৰে কাকো ক্ষমা । দুখনকৈ চিতাৰ জুই একেলগে জ্বলিছিল যদিও আজি সমগ্ৰ দিনটো আন্ধাৰ সদৃশ হৈ আছিল গাঁওখনি । বহুতৰে আখলৰ পৰা ওলোৱা নাছিল ধোঁৱা । এয়াই হয়তো অনাকাংক্ষিত সেই ঘটনাৰ অন্য এক পৰিঘটনা …।