Manipur Political Crisis:কোন হ’ব মণিপুৰৰ নতুন মুখ্যমন্ত্রী? ৰাষ্ট্ৰপতিৰ শাসনৰো চৰ্চা
: দলৰ বাহিৰে-ভিতৰে সৃষ্টি হোৱা চাপত বাধ্য হৈ এন বীৰেন সিঙে পদত্যাগ কৰাৰ পাছত মণিপুৰৰ নতুন মুখ্যমন্ত্রী কোন হ’ব তাক লৈ ব্যাপক চর্চা আৰম্ভ হৈছে। এনে সময়তে চর্চালৈ আহিছে দুই জ্যেষ্ঠ নেতাৰ নাম।
উচ্চস্তৰীয় সূত্রই সংবাদ মাধ্যমক জনোৱা মতে, ৰাজ্যখনৰ পৰৱৰ্তী মুখ্যমন্ত্ৰীৰূপে ৰাজ্যিক বিজেপিৰ সভানেত্রী সাৰদা দেৱী আৰু বিধানসভাৰ অধ্যক্ষ টি সত্যব্রত সিঙৰ নাম নেতৃত্বৰ বিবেচনালৈ আহিছে। এই দুই নেতা-নেত্রী কোনোবা এজনক ৰাজ্যখনৰ পৰৱৰ্তী মুখ্যমন্ত্রী নিয়োগ কৰাৰ কথা দলৰ শীর্ষনেতৃত্বই আলচ কৰি থকা বুলিও সূত্রই প্রকাশ কৰিছে।
সূত্রই জনোৱা মতে, সোমবাৰে পুৱাই ৰাজ্যখনৰ নতুন মুখ্যমন্ত্ৰীৰ নাম ঘোষিত হোৱাৰো সম্ভাৱনা আছে। শীঘ্ৰে দলৰ শীর্ষ নেতৃত্ব পৰৱৰ্তী মুখ্যমন্ত্রী বাছনিৰ বাবে আলোচনাত মিলিত হোৱাৰ কথা।
আনহাতে, ৰাজ্যপাল অজয় সিং ভাল্লাই সোমবাৰৰ পৰা আহ্বান জনোৱা মণিপুৰ বিধানসভাৰ বাজেট অধিবেশন দেওবাৰে মুখ্যমন্ত্রী সিঙৰ পদত্যাগপত্র দাখিলৰ পাছত বাতিল কৰে। নতুন মুখ্যমন্ত্রী নিযুক্ত হোৱাৰ পাছতহে বিধানসভাৰ অধিবেশন অনুষ্ঠিত হ’ব বুলি সূত্রই প্রকাশ কৰিছে। আনহাতে, দলৰ মাজতে হোৱা এক চর্চা অনুসৰি ৰাজ্যখনত কেন্দ্ৰই ৰাষ্ট্ৰপতি শাসন বলবৎ কৰাৰো সম্ভাৱনা আছে। কেন্দ্রীয় মন্ত্রী পৰিষদৰ পৰামৰ্শ মর্মে এখন ৰাজ্যত ৰাষ্ট্রপতি শাসন বলবৎ হয়।
আনহাতে, বিজেপিৰ এক সূত্রই আশা প্রকাশ কৰে যে সিঙৰ পদত্যাগৰ ফলত মেইটেই আৰু কুকি-জ’ জনগোষ্ঠীৰ মাজত শান্তি স্থাপনৰ বাবে কেন্দ্ৰই গ্রহণ কৰা পদক্ষেপ শক্তিশালী হ’ব। দেওবাৰে মুখ্যমন্ত্রী সিঙৰ লগতে তেওঁৰ মন্ত্রী পৰিষদৰো পদত্যাগপত্র ৰাজ্যপালে গ্রহণ কৰে।
