Micro ‘finance loans:
মাইক্ৰ ‘ফাইনেন্সৰ ঋণ গ্রহণকাৰী ৰাজ্যৰ হেজাৰ হেজাৰ মহিলালৈ আহিছে আইনী জাননী। ৰাজ্যৰ বহু সংখ্যক মহিলালৈ সংশ্লিষ্ট জিলাৰ লোক আদালতৰ পৰা ঋণৰ কিস্তি আদায়ৰ জাননী অহাৰ পাছতে এতিয়া চৌদিশে হাহাকাৰ লাগিছে। বহুকেইগৰাকী ভুক্তভোগী মহিলাই সদৰী কৰা অনুসৰি, তেওঁলোকে ২০১৯ত বন্ধন বেংকৰ গৰা ঋণ গ্রহণ কৰিছিল যদিও ঋণৰ কিস্তি আদায় দিবলৈ সক্ষম হোৱা নাছিল। পাছত ২০২১ৰ বিধানসভা নির্বাচনত শাসকীয় বিজেপিয়ে মহিলাসকলৰ এই ঋণ ৰেহাই দিব বুলি প্রতিশ্রুতি প্রদান কৰিছিল।
সেই মর্মে পুনৰ ৰাজ্যৰ ক্ষমতা দখলৰ পাছত মুখ্যমন্ত্রী ড: হিমন্ত বিশ্ব শৰ্মাই মহিলাসকলৰ ঋণ ৰেহাইৰ বিষয়ে ঘোষণা কৰে। মুখ্যমন্ত্ৰীৰ সেই ঘোষণা অনুসৰি মহিলাসকলে ঋণৰ কিস্তি আদায়ৰ পৰা বিৰত থাকে। কিন্তু ঘোষণা কৰিলেও চৰকাৰে এই খণৰ ধন আদায় নিদিয়াত সম্প্রতি তেওঁলোকলৈ আইনী জনানী আহিছে বুলি ভুক্তভোগী মহিলাসকলে ক্ষোভ প্রকাশ কৰে। উল্লেখ্য যে মাইক্ৰ’ফাইনেন্সন ঋণ গ্রহণকাৰী মহিলাসকলক সকাহ প্রদান কৰাটো বিজেপিৰ অন্যতম প্রধান নির্বাচনী প্রতিশ্রুতি আছিল।
প্রতিখন নির্বাচনী সভাতে মহিলাসকলে লোৱা ঋণ চৰকাৰ গঠন কৰি সুতসহ মাৰি দিয়া হ’ব বুলি তদানীন্তন বিত্তমন্ত্রী ড: হিমন্ত বিশ্ব শর্মাই ঘোষণা কৰিছিল। চৰকাৰ গঠন কৰি মুখ্যমন্ত্রী পদত অধিষ্ঠিত হোৱাৰ পাছত অৱশ্যে তেওঁ কয় যে ২০২১ৰ ৩১ মাৰ্চৰ আগত লোৱা সকলো ঋণ চৰকাৰে মাৰি দিব। এই সন্দৰ্ভত কে’বাটাও চৰকাৰী কাৰ্যসূচীও ৰূপায়ণ কৰা হয়। ৰাজ্যৰ মহিলাসকলেও মুখ্যমন্ত্ৰীৰ এই ঘোষণাত কিছু সকাহ লাভ কৰে; কিন্তু হঠাৎ চলিত মাহত বিভিন্ন লোক আদালতৰ পৰা ৰাজ্যৰ বিভিন্ন প্ৰান্তৰ বহু মহিলাই আইনী জাননী লাভ কৰিছে। তিতাবৰৰ এগৰাকী ভুক্তভোগী মহিলাই সদৰী কৰা অনুসৰি, ‘তেওঁ ২০১৯ত বন্ধন বেংকৰ পৰা ৫৫ হেজাৰ টকাৰ ঋণ লৈছিল আৰু কিস্তিও কিছু আদায় দিছিল।
যেতিয়া মুখ্যমন্ত্ৰীয়ে ঋণৰ কিস্তি আদায় দিব নালাগে, সকলো চৰকাৰে মাৰি দিব বুলি ঘোষণা কৰিছিল, তেতিয়াৰ পৰা কিস্তি দিবলৈ বন্ধ কৰি দিছিল। কিন্তু এতিয়া আদালতৰ পৰা আইনী জাননী আহিছে আৰু ১৭ জুনত গোলাঘাট আদালত চৌহদত অনুষ্ঠিত হ’বলগীয়া লোক আদালতত হাজিৰ হ’বলৈ নির্দেশ দিছে।’ উল্লেখ্য যে মুখ্যমন্ত্ৰীৰ উপৰি বিজেপিৰ একাংশ নেতাই মাইক্র ‘ফাইনেন্সৰ ঋণৰ কিস্তি বিচাৰি আহিলে মহিলাসকলক সেয়া আদায় নিদিবলৈ আহ্বান জনাইছিল।
আনকি হাৰাশাস্তি কৰিলে কিস্তি বিচাৰি অহা বেংকৰ কৰ্মচাৰীৰ বিৰুদ্ধে থানাত এজাহাৰ দিবলৈও কৈছিল। এইবোৰ কথাক বিশ্বাসত লৈ মহিলাসকলে কিস্তি আদায় নিদিয়াত এতিয়া আইনী জাননী লাভ কৰাই নহয়, তেওঁলোকৰ বেংক একাউণ্ট অনুৎপাদনশীল সম্পদ (এনপিএ) ত পৰিণত হোৱাত তেওঁলোক বিপদত পৰিছে। আনকি ঠায়ে ঠায়ে ইয়াৰ বিৰুদ্ধে প্ৰতিবাদৰ বাবেও মহিলাসকল সাজু হৈছে।
