Bihar election: ✒️বিৰোধী শিবিৰে আশংকা কৰাৰ দৰেই দেশৰ নিৰ্বাচন আয়োগে এক বিতর্কিত পুনৰীক্ষণ ব্যৱস্থাৰ জৰিয়তে প্ৰস্তুত কৰা আগন্তুক বিহাৰ বিধানসভা নিৰ্বাচনৰ খচৰা ভোটাৰ তালিকাৰ পৰা ৬৫ লক্ষাধিক ভোটাৰৰ নাম বাদ পৰিল।
এইবাৰ ৰাজ্যখনত আয়োগে ভোটাৰ তালিকাৰ এক বিশেষ গভীৰ পুনৰীক্ষণ (এছআইআৰ) ৰ ব্যৱস্থা কৰে। এই পুনৰীক্ষণ প্ৰক্ৰিয়াৰে প্ৰস্তুত কৰা খচৰা ভোটাৰ তালিকা শুকুৰবাৰে আয়োগে ৰাজহুৱা কৰে।
এই খচৰা ভোটাৰ তালিকাত দেখা গৈছে যে ৬৫ লক্ষাধিক ভোটাৰৰ তালিকাত নাম অন্তর্ভুক্ত হোৱা নাই। ফলত এই খচৰা ভোটাৰ তালিকাত মুঠ ভোটাৰৰ সংখ্যা বৰ্তমানৰ ৭.৯ কোটিৰ পৰা ৭.২৪ কোটিলৈ হ্রাস পাইছে। এই খচৰা ভোটাৰ তালিকাৰ পৰা সর্বাধিক ৩.৯৫ লাখ ভোটাৰ বাদ পৰিছে ৰাজ্যখনৰ ৰাজধানী পাটনাত।
পাটনাৰ পাছতে মধুবানীত ৩.৫২ লাখ, পূব চম্পাৰনত ৩.১৬ লাখ আৰু গোপালগঞ্জত ৩.১০ লাখ ভোটাৰৰ নাম খচৰা ভোটাৰ তালিকাত অন্তর্ভুক্ত হোৱা নাই। এই খচৰা ভোটাৰ তালিকাক লৈ ইতিমধ্যে সৰৱ হৈ উঠিছে কংগ্ৰেছ আৰু ৰাষ্ট্ৰীয় জনতা দল (আৰজেডি) সহ একাংশ বিৰোধী দল। উল্লেখ্য যে নির্বাচন আয়োগে ভোটাৰ তালিকাৰ গভীৰ পুনৰীক্ষণ কৰিবলৈ লোৱাৰে পৰা বিৰোধী শিবিৰে অভিযোগ উত্থাপন কৰি আহিছে যে নির্বাচন আয়োগে শাসকীয় এনডিএক আগন্তুক বিধানসভা নির্বাচনত সহায় কৰাৰ উদ্দেশ্যে ভোটাৰ তালিকাৰ এই অভূতপূর্ব পুনৰীক্ষণৰ ব্যৱস্থা কৰিছে।
ভোটাৰ তালিকাৰ এই গভীৰ পুনৰীক্ষণৰ জৰিয়তে আয়োগে ৰাজ্যখনৰ প্ৰতিটো সমষ্টিৰ পৰা ৩৫-৩৬ হেজাৰকৈ ভোটাৰৰ ভোটাধিকাৰ হৰণৰ লক্ষ্য লোৱা বুলিও বিৰোধী শিবিৰ সৰৱ হৈ আছে। এনে অৱস্থাতে আজি আয়োগে খচৰা ভোটাৰ তালিকা ৰাজহুৱা কৰে।
অৱশ্যে আয়োগে দাবী কৰিছে যে ৰাজ্যখনৰ ভোটাৰ তালিকাত ২২.৩৪ লাখ মৃত ভোটাৰৰো নাম অন্তর্ভুক্ত হৈ আছে। একেদৰে ভোটাৰ তালিকাত নাম অন্তর্ভুক্ত হৈ থকা ৩৬.২৮ লাখ লোকে স্থায়ীভাৱে বসবাসৰ উদ্দেশ্যে ৰাজ্যৰ বাহিৰলৈ গুচি গৈছে বুলি আয়োগে দাবী কৰিছে।
আন ৭.০১ লাখ ভোটাৰৰ নাম একাধিক স্থানৰ ভোটাৰ তালিকাত আছে বুলি আয়োগে দাবী কৰি আহিছে। অৱশ্যে আয়োগৰ এনে তথ্যক ভোটাৰৰ নাম কৰ্তনৰ অজুহাত বুলিহে আখ্যা দিছে বিৰোধী শিবিৰে।
আনহাতে, কালি আয়োগে প্ৰকাশ কৰা অনুসৰি এই খচৰা ভোটাৰ তালিকাক লৈ দাবী আৰু আপত্তি দৰ্শোৱাৰ সুবিধা ভোটাৰৰ বাবে মুকলি কৰা হ’ব। ভুলবশতঃ কোনো ভোটাৰৰ নাম খচৰা তালিকাৰ পৰা যদি বাদ পৰিছে তেন্তে তেনে ভোটাৰে অহা পহিলা ছেপ্টেম্বৰলৈ আয়োগৰ ওচৰত দাবী-আপত্তি দর্শাব পাৰিব।