দেশৰ আধুনিক জাহাজ পৰিবহণ ব্যৱস্থা উন্নয়ন সাধনৰ উদ্দেশ্যে নিৰন্তৰ প্ৰচেষ্টা চলাই আছে বুলি মন্তব্য কৰিছে কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে। বুধবাৰে সংসদত সামুদ্রিক খণ্ডৰে জড়িত দুখন বিধেয়ক গৃহীত হয়।
একেদিনাই বন্দৰ, জাহাজ পৰিবহণ আৰু জলপথ মন্ত্রণালয়ৰ দুখনকৈ বিধেয়ক সংসদত গৃহীত হোৱাটো এই মন্ত্রণালয়ৰ বাবে ঐতিহাসিক ঘটনাৰূপে চিহ্নিত হৈছে। দেশৰ আধুনিক জাহাজ পৰিবহণ ব্যৱস্থাক লৈ মোদী চৰকাৰৰ নিৰন্তৰ প্ৰচেষ্টাৰ সফল প্রতিফলন এই দুখন বিধেয়ক বুলি মন্ত্রী সোণোৱালে মন্তব্য কৰিছে।
এই বিধেয়কৰ অন্যতম পণ্য পৰিবহণ বিধেয়ক-২০২৪ কালি লোকসভাই গৃহীত কৰে। আনখন বিধেয়ক সাগৰীয় পথৰে সামগ্ৰীৰ পৰিবহণ বিধেয়ক ২০২৫ ৰাজ্যসভাত গৃহীত হয়। ইয়াৰে প্ৰথমখন বিধেয়ক আধুনিক আৰু আন্তঃৰাষ্ট্ৰীয় সংহত নীতিৰ স’তে সংগতি ৰাখি প্ৰস্তুত কৰা।
আনহাতে, ব্যৱসায়-বাণিজ্যৰ সুবিধা দিয়া আৰু দেশৰ জাহাজ পৰিবহণ খণ্ডৰ ৰূপান্তৰৰ বাবে সাগৰীয় পথৰে সামগ্রিক পৰিবহণ বিধেয়ক গৃহীত কৰা হৈছে।
এই সম্পর্কত মন্ত্রী সোণোৱালে লগতে কয়, ‘আজিৰ দিনটো আমাৰ সকলোৰে বাবে ঐতিহাসিক দিন। সংসদে দুখনকৈ বিধেয়ক গৃহীত কৰি প্ৰধানমন্ত্ৰী নৰেন্দ্ৰ মোদীৰ বলিষ্ঠ নেতৃত্বত দেশৰ সামুদ্রিক খণ্ডৰ আধুনিকীকৰণৰ প্ৰচেষ্টাক এক নতুন গতি দিলে। পণ্য পৰিবহণ বিধেয়ক ২০২৪-এ ১৯৫৮ৰ পণ্য পৰিবহণ আইন প্ৰত্যাহাৰত এক গুৰুত্বপূৰ্ণ ভূমিকা পালন কৰিব। এই নতুন আইনে সামুদ্রিক আইনী পৰিকাঠামোক আন্তঃৰাষ্ট্ৰীয় মানৰ স’তে সংগতি ৰাখি নতুনত্ব প্রদান কৰিব। লগতে দেশক এক বিশ্বাসযোগ্য তথা আগশাৰীৰ সামুদ্রিক বাণিজ্যৰ প্ৰাণকেন্দ্ৰৰূপে প্ৰতিষ্ঠা কৰিব।’
বিধেয়কখন লোকসভাত উত্থাপন কৰি মন্ত্রীজনে লগতে কয়, ‘১৯৫৮ৰ পণ্য পৰিবহণ আইনৰ ৫৬১ ধাৰাটোৱে সাম্প্ৰতিক সময়ৰ প্ৰত্যাহ্বানসমূহ নিৰাময়ত সুদূৰ প্ৰসাৰী প্ৰভাৱ বিস্তাৰ কৰিব পৰা নাছিল আৰু বহু আন্তঃৰাষ্ট্ৰীয় চুক্তি সম্পূৰ্ণৰূপে বাস্তবায়িত কৰাত বাধাৰ সৃষ্টি কৰিছিল। এই নতুন পণ্য পৰিবহণ বিধেয়ক ২০২৫ত ১৬ টা ভাগ আৰু ৩২৫ টা ধাৰা আছে। এই আইনে সামুদ্রিক সুৰক্ষা, দুর্যোগ প্ৰতিৰোধ, পৰিৱেশ সুৰক্ষা, নাৱিকৰ কল্যাণ আৰু জাহাজৰ সুৰক্ষা উন্নতি কৰিব। লগতে সামুদ্রিক বিনিয়োগ উদ্ভাৱন আৰু বহনক্ষম বৃদ্ধিৰ পথ মুকলি কৰিব।’
আনহাতে, সাগৰৰে সামগ্ৰী পৰিবহণ বিধেয়ক ২০২৫-এ ঔপনিৱেশিক যুগৰ বিধানৰ অৱসান ঘটাই বিশ্বমানৰ স’তে সংগতি ৰাখি ব্যৱসায় সহজসাধ্য কৰাৰ পথ মুকলি কৰা বুলি আলোচিত হৈছে। এই বিধেয়ক যোৱা ২৮ মার্চত লোকসভাই গৃহীত কৰে।