Guwahati Durga Puja:
সমাগত দুর্গা পূজা। অহা ২৮ ছেপ্টেম্বৰৰ পৰা আৰম্ভ হ’বলগীয়া শাৰদীয় দুর্গোৎসৱক কেন্দ্ৰ কৰি ৰাজ্যজুৰি আৰম্ভ হৈছে প্রস্তুতি পর্ব। বিগত বৰ্ষসমূহৰ দৰেই এইবাৰো প্ৰকৃতি সুৰক্ষা, প্লাস্টিক বর্জনকে ধৰি বিভিন্ন বিষয়বস্তুক লৈ পূজা মণ্ডপে মণ্ডপে চলিছে চমক সৃষ্টিৰ বাবে তৎপৰ হৈছে পূজা সমিতিসমূহে।
উল্লেখ্য যে দুর্গা পূজা বুলি ক’লে গুৱাহাটী মহানগৰীৰ পৰিৱেশ সুকীয়া। মহানগৰীত সৰু-বৰ ছয় শতাধিক দুর্গা পূজা অনুষ্ঠিত হয় আৰু ইয়াৰে গৰিষ্ঠ সংখ্যক পূজা মণ্ডপৰ সাজ-সজ্জাই সকলোৰে দৃষ্টি আকৰ্ষণ কৰি আহিছে। এইবাৰো ইয়াৰ ব্যতিক্রম নহয়। বিগত বৰ্ষসমূহৰ দৰে এইবাৰো দেশ-বিদেশৰ মন্দিৰ, পৌৰাণিক কীৰ্তিচিহ্ন আদিৰ আর্হিত বহুকেইটা পূজা মণ্ডপ নিৰ্মাণৰ প্ৰস্তুতি দ্রুতগতিত চলিছে। বিশেষকৈ থাইলেণ্ডৰ ৰাজধানী বেংককৰ বিখ্যাত ‘বাট অৰুণ’ বৌদ্ধ মন্দিৰৰ আৰ্হিত এইবাৰ নিৰ্মাণ হৈছে সোণালী জয়ন্তী বৰ্ষৰ গীতানগৰ সাৰ্বজনীন দুর্গা পূজা মণ্ডপ।
একেদৰে এনিমেছন ছবি ‘দ্য লায়ন কিং’ৰ আৰ্হিত আৰ্যনগৰ নতুন বস্তি সাৰ্বজনীন দুর্গা পূজা মণ্ডপ, ‘বেবিলন ‘ৰ আর্হিত বিষ্ণুপুৰ বিমলা নগৰ সাৰ্বজনীন দুর্গা পূজা মণ্ডপ, প্লাষ্টিক বর্জন-প্ৰদূষণমুক্ত সমাজৰ আহ্বানবে মৃৎ শিল্পক বিশেষ গুৰুত্ব দি বৃহত্তৰ কাহিলীপাৰা সাৰ্বজনীন দুর্গা পূজা মণ্ডপৰ নিৰ্মাণ কাৰ্য আৰম্ভ হৈছে। প্রায় এক কোটি টকা পর্যন্ত বাজেট লৈ বিভিন্ন সমকালীন বিষয়বস্তুৰে মহানগৰীৰ পূজা মণ্ডপসমূহৰ নিৰ্মাণৰ কাম আৰম্ভ কৰা হৈছে।
উল্লেখ্য যে পূজাৰ সময়ছোৱাত দেৱী বন্দনাৰ সমানে বিভিন্ন বিষয়বস্তুক লৈ প্ৰযুক্তিৰ পয়োভৰৰে সজ্জিত পূজাৰ মণ্ডপসমূহে ৰাইজক এক উছাহভৰা আনন্দৰ পৰিৱেশ দি আহিছে। এইবাৰো পূজা সমিতিসমূহে এক সুকীয়া পৰিৱেশ দিবলৈ চেষ্টা অব্যাহত ৰাখিছে। উল্লেখ্য যে প্ৰতিবছৰে মহানগৰীৰ অন্যতম আকৰ্ষণৰ কেন্দ্ৰৰূপে চিহ্নিত হৈ অহা গীতানগৰ সার্বজনীন দুর্গা পূজা সমিতিৰ এইবাৰৰ বাজেট হৈছে প্রায় এক কোটি। বেংককস্থিত বিখ্যাত বৌদ্ধ মন্দিৰ ‘ৱাট অৰুণ’ৰ আর্হিত ইতিমধ্যে গীতানগৰ হাইস্কুল খেলপথাৰত পূজাৰ মণ্ডপ নিৰ্মাণৰ কাম অব্যাহত ৰাখিছে সমিতিয়ে।
একেদৰে আৰ্য নগৰ নতুন বস্তি সার্বজনীন দুর্গা পূজা সমিতিৰ এইবাৰৰ বাজেট হৈছে ২২ লাখ টকা। বিখ্যাত এনিমেছন ছবি ‘দ্য লায়ন কিং’ৰ আৰ্হিত পূজাৰ মণ্ডপ নিৰ্মাণৰ কাম ইতিমধ্যে আৰম্ভ হৈছে আৰু এই মণ্ডপে দৰ্শকৰ মন জয় কৰিবলৈ সক্ষম হ’ব বুলি সমিতিয়ে আশা প্রকাশ কৰিছে। একেদৰে দুর্গা পূজা বুলি ক’লেই মহানগৰীৰ আন এক অন্যতম আকৰ্ষণৰ কেন্দ্র বিষ্ণুপুৰ বিমলা নগৰ সাৰ্বজনীন দুর্গা পূজা সমিতিৰ এইবাৰৰ বাজেট হৈছে প্রায় ২৫ লাখ টকা।
‘বেবিলন’ৰ আৰ্হিত ইয়াৰ পূজাৰ মণ্ডপ নিৰ্মাণ হ’ব। উল্লেখ্য যে বিগত বৰ্ষৰ দৰে এইবাৰো প্ৰদূষণমুক্ত সমাজ আৰু প্লাষ্টিক বৰ্জনত গুৰুত্ব প্ৰদান কৰি পূজা মণ্ডপ সাজি উলিয়াব বৃহত্তৰ কাহিলীপাৰা সাৰ্বজনীন দুর্গা পূজা সমিতিয়ে। সমিতিৰ এইবাৰৰ বাজেট হৈছে প্রায় ১০ লাখ টকা আৰু বিশেষকৈ মৃৎ শিল্পক প্রাধান্য দি পূজা মণ্ডপ নিৰ্মাণ কৰিবলৈ লোৱা হৈছে। একেদৰে গণেশগুৰিৰ গণেশ মন্দিৰৰ সন্মুখৰ গণেশ উদ্যানৰ দুর্গা পূজাৰ এইবাৰৰ বাজেট হৈছে ১২ লাখ আৰু মণ্ডপৰ সন্মুখত বিশালাকাৰ এটি হনুমানৰ প্ৰতিমূর্তি স্থাপন কৰা হ’ব বুলি উদ্যোক্তাসকলে জানিবলৈ দিছে।
এই পূজা সমিতিসমূহৰ উপৰি ভক্তৰ অন্যতম আকৰ্ষণৰ কেন্দ্ৰবিন্দু মৈদাম বেলতলা লক্ষ্মীমন্দিৰ দুর্গা পূজা সমিতি, লতাশিলৰ গুৱাহাটী সার্বজনীন দুর্গা পূজা সমিতি, পাণ্ডুৰ আজাদ হিন্দ ক্লাব দুর্গা পূজা সমিতি, মালিগাঁৱৰ সুভাষ নগৰ সাৰ্বজনীন দুর্গা পূজা সমিতি, বিষ্ণুপুৰ সাৰ্বজনীন দুর্গা পূজা সমিতি, ভাস্কৰনগৰ সাৰ্বজনীন দুর্গা পূজা সমিতি, কালীবাড়ী কল’নী দুর্গা পূজা সমিতি, বৃহত্তৰ নাৰেংগী সমিতি, সদৌ জাপৰিগোগ সার্বজনীন পূজা সমিতি, ছাত্রীবাৰী পূজা সমিতি আদিয়েও বিভিন্ন বিষয়বস্তুক লৈ অব্যাহত ৰাখিছে।