শীঘ্রেই শৰতৰ আকাশত এক অনিন্দ্য সুন্দৰ মুহূৰ্তৰ সাক্ষী হ’ব মহাকাশ প্রেমীসকল। অহা সপ্তাহতে আকাশজুৰি পোহৰ বিলাব বিশাল আকাৰৰ চন্দ্ৰই, যাক বিজ্ঞানৰ ভাষাত কোৱা হয় ‘হাৰভেষ্ট মুন’। এনে ঘটনা মহাকাশ জগতত বিৰল তথা বিশেষৰূপে বিবেচিত হয়। অহা সপ্তাহতে সেই বিশেষ ঘটনা ঘটিব।
কাৰণ পৃথিৱীৰ বহু ওচৰলৈ গুচি আহিব আমাৰ গ্ৰহৰ একমাত্ৰ উপগ্রহটো। ফলত চন্দ্রটোক আন সময়ৰ তুলনাত অনেক ডাঙৰ আৰু অধিক উজ্জ্বল দেখা যাব। মহাকাশ বিজ্ঞানৰ ইতিহাসত এই চন্দ্রোদয়ৰ বিশেষ গুৰুত্বৰ উপৰি ‘হাৰভেষ্ট মুন’ক লৈ পৃথক লোককথাও আছে। নামতে লুকাই আছে তাৰ ইংগিত।
প্রচলিত বিশ্বাস অনুসৰি, এই সময়ৰ পৰাই ফচল ভালদৰে ফলনৰ সময় আৰম্ভ হয়। অহা ছয় আৰু সাত অক্টোবৰত আকাশ উজ্জ্বল কৰি উদয় হ’ব বিশাল আকাৰৰ চন্দ্ৰ। ঘূর্ণনৰ ফলত পৃথিৱীৰ দিশৰ পৰা চন্দ্ৰটোৰ অৱস্থান এনেকুৱা হ’ব যে দেখিলেই ধাৰণা হ’ব যেন হাত আগবঢ়ালেই চন্দ্ৰটো স্পৰ্শ কৰিব পৰা যাব। আচলতে এই বিশেষ সময়খিনিত চন্দ্ৰটো পৃথিৱীৰ একেবাৰে ওচৰলৈ গুচি আহিব। ইয়াক ‘ছুপাৰ মুন’ বুলিও কোৱা হয়।
এই সময়ত অন্ততঃ ছয় শতাংশ ডাঙৰকৈ চন্দ্ৰটোৱে দেখা দিয়ে আৰু তাৰ উজ্জ্বলতা বৃদ্ধি পায় ১৩ শতাংশ। বিজ্ঞানীসকলে জনাইছে যে অহা ছয় অক্টোবৰৰ পৰা চন্দ্ৰটো লাহে লাহে পৃথিৱীৰ নিকটৱৰ্তী হৈ থাকিব। সাত অক্টোবৰত সূর্যাস্তৰ পাছতে আকাশত স্নিগ্ধ পোহৰ বিলাই দিব চন্দ্রই। সেই সময়ত চন্দ্ৰৰ ৰঙো হ’ব সামান্য পৃথক।
ক’ৰ পৰা দেখা যাব এই মহাজাগতিক বিৰল ঘটনা? জনা গৈছে যে আকাশ পৰিষ্কাৰ থাকিলে তথা বৰষুণ নিদিলে উত্তৰ গোলাৰ্ধৰ পৰা ‘হাৰভেষ্ট মুন’ সবাতোকৈ ভালদৰে দৃশ্যমান হ’ব। ভাৰতৰ পৰাও সাত অক্টোবৰত সন্ধিয়া নমাৰ পাছতে খালী চকুৰে দেখা যাব এখন থালীৰ দৰে চন্দ্রটো।
য’ত বায়ু প্রদূষণ কম, তেনে স্থানৰ পৰা বৰ ভালকৈ এই দৃশ্য চাব পৰা যাব।বিজ্ঞানীসকলে জনাইছে যে বিগত ২০২০ত এই বিশেষ চন্দ্রটো দেখা গৈছিল। অংকৰ হিচাপ অনুসৰি, পুনৰ ২০২৮ত এই বিশেষ চন্দ্ৰৰ উদয় হ’ব। অর্থাৎ এইবাৰ ‘হাৰভেষ্ট মুন’ দেখা নাপালে আকৌ তিনি বছৰলৈ অপেক্ষা কৰিব লাগিব।
