Insurance:✒️মানুহৰ জীৱনটো অনিশ্চয়তাৰে ভৰা। যিকোনো সময়তে যিকোনো দুর্ঘটনা ঘটি যাব পাৰে। গতিকে আগতীয়াকৈ দুর্ঘটনা বীমা ক্ৰয় কৰি অপ্রত্যাশিত খৰচ নিয়ন্ত্ৰণৰ ক্ষেত্ৰত আজিকালি প্রতিজন সচেতন ব্যক্তিয়েই গুৰুত্ব দিয়ে।
দেশৰ এক বৃহৎ অংশ নাগৰিকে ডাকঘৰত বিনিয়োগ কৰে। কাৰণ ইয়াত বিনিয়োগ কৰিলে নিশ্চিত ৰিটাৰ্ণ পোৱা যায়। কেৱল এয়াই নহয়, একাধিক বিত্তীয় প্রতিষ্ঠানৰ তুলনাত ডাকঘৰৰ আঁচনিসমূহে আকর্ষণীয় সুতৰ হাৰো প্ৰদান কৰে। ডাকঘৰৰে অধীনৰ ইণ্ডিয়া পোষ্ট পেমেন্টছ বেংকে আকস্মিক দুর্ঘটনাজনিত মৃত্যু বা শাৰীৰিক অক্ষমতাৰ ক্ষেত্ৰত গ্রাহকক আর্থিক সুৰক্ষা প্ৰদান কৰাৰ বাবে এক বিশেষ আঁচনি মুকলি কৰিছে। বেংকটোৱে মাত্র ৩৯৯ টকা আৰু ২৯৯ টকাত দুর্ঘটনা বীমা পলিচী লৈ আহিছে।
আইপিপিবিয়ে জানিবলৈ দিয়া মতে, বছৰি ৩৯৯ টকাৰ প্লেন প্রিমিয়াম আৰু ২৯৯ টকাৰ বেচিক প্লেন ক্ৰয় কৰি যিকোনো ব্যক্তিয়ে এই সুবিধা গ্রহণ কৰিব পাৰে। এই বীমা পলিচীত ১০ লাখ টকা পর্যন্ত বীমা ক’ভাৰেজ পোৱা যায়। ১৮ৰ পৰা ৬৫ বছৰ বয়সৰ আইপিপিবিৰ গ্রাহকে ৩৯৯ টকা বা ২৯৯ টকাৰ বীমা পলিচী ক্ৰয় কৰি এই সুবিধা লাভ কৰিব পাৰে। এই পৰিকল্পনাই গ্রাহকক এবছৰৰ বাবে সুৰক্ষা প্ৰদান কৰিব।
এই বীমা পৰিকল্পনাত আকস্মিক দুর্ঘটনাজনিত মৃত্যু, সম্পূর্ণ বা আংশিক শাৰীৰিক অক্ষমতা আৰু পক্ষাঘাতৰ ক্ষেত্ৰত পলিচীধাৰী বা তেওঁৰ পৰিয়ালৰ সদস্যই লাভ কৰিব ১০ লাখ টকা। কিন্তু এই পৰিকল্পনাৰ ক্ষেত্ৰত চিকিৎসালয়ত চিকিৎসাৰ সময়ত প্রতিদিনে ১০০০ টকা পোৱাৰ সুবিধা পোৱা নাযায়। লগতে ৩৯৯ টকাৰ এই পৰিকল্পনাত পৰিয়ালৰ সদস্যসকলৰ বাবে পৰিবহণ আৰু শেষকৃত্যৰ ৰীতি-নীতিৰ সময়ত সহায়ৰ দৰে কোনো ধৰণৰ সুবিধা প্রদান কৰা হোৱা নাই।
অৱশ্যে আইপিডিত আকস্মিক দুর্ঘটনাজনিত চিকিৎসা ব্যয়ৰ বাবেও ৬০,০০০ টকা এই প্লেনত উপলব্ধ। তদুপৰি অ’পিডিত আকস্মিক দুর্ঘটনাজনিত চিকিৎসাৰ ক্ষেত্ৰত ৩০,০০০ টকা পর্যন্ত এই পৰিকল্পনাত সামৰি লোৱা হৈছে।
