Adhar card:✒️প্রধানমন্ত্রী নৰেন্দ্ৰ মোদী নেতৃত্বাধীন চৰকাৰখনে ডিজিটেল ভাৰতৰ সপোন পূৰণ কৰাৰ স্বাৰ্থত বিভিন্ন পদক্ষেপ গ্রহণ কৰি আহিছে। ইয়াৰ বাবে মোদী চৰকাৰে আধাৰ কাৰ্ডৰ পৰা আৰম্ভ কৰি পেন কার্ডলৈকে সকলো এতিয়া ডিজিটেল ৰূপত উপলব্ধ কৰিছে।
এই উপলব্ধতা বৃদ্ধি কৰাৰ উদ্দেশ্যেই আধাৰ কাৰ্ডৰ স’তে পেন কার্ড সংযোগ কৰাটোও বাধ্যতামূলক কৰা হৈছে চৰকাৰৰ তৰফৰ পৰা। আধাৰ কাৰ্ডৰ স’তে পেন কার্ড সংযোগ কৰাৰ সন্দৰ্ভত আয়কৰ বিভাগে দীর্ঘদিন ধৰি ৰাইজক সকীয়াই আহিছে যদিও অদ্যাপি বহু ভাৰতীয়ই এই নির্দেশনা পালন কৰা নাই।
ইয়াৰ পূৰ্বে মোদী চৰকাৰে কে’বাবাৰো আধাৰ আৰু পেন কার্ড সংযোগৰ সময়সীমা বৃদ্ধি কৰিছে যদিও এইবাৰ এই সময়সীমা বৃদ্ধি কৰা নহ’ব বুলি আয়কৰ বিভাগে অৱগত কৰিছে। কেন্দ্ৰীয় চৰকাৰে শেহতীয়াকৈ এই সন্দর্ভত এক নতুন নির্দেশনা জাৰি কৰিছে। এই নির্দেশনা মতে কিছুমান বিশেষ শ্ৰেণীৰ পেন কার্ডধাৰী লোকে চলিত এই ২০২৫ৰ অন্তিম দিন, অর্থাৎ ৩১ ডিচেম্বৰৰ ভিতৰত নিজৰ পেন আধাৰৰ স’তে সংযোগ কৰিব লাগিব।
যদি এই প্রক্রিয়াটো সময়সীমাৰ ভিতৰত সম্পূর্ণ নহয়, তেতিয়া ২০২৬ৰ পহিলা জানুৱাৰীৰ পৰা পেন নিষ্ক্রিয় হৈ পৰিব।বৃহৎ পৰিসৰৰ বিত্তীয় লেনদেন বা কেৱাইচি সম্পর্কীয় লেনদেন কৰা লোকসকল যেনে আয়কৰ ৰিটার্ণ দাখিল কৰা, বেংকিং বা বিনিয়োগৰ লেনদেন, ষ্টক মার্কেটৰ লেনদেন, মিউচুৱেল ফাণ্ড বা বৃহৎ মূল্যৰ লেনদেন কৰা কৰদাতা, বিনিয়োগকাৰী আৰু যিকোনো ব্যক্তিৰ ক্ষেত্ৰত এই নিয়ম প্রযোজ্য হ’ব।
আধাৰৰ স’তে পেন কেনেদৰে সংযুক্ত কৰিব? প্রথমে আপুনি আয়কৰ বিভাগৰ ই-ফাইলিং প’র্টেললৈ যাব লাগিব। তাৰ পাছত স্ক্রীণৰ বাঁওফালে থকা লিংক আধাৰ অপছনত ক্লিক কৰক। যদি পুনঃনির্দেশিত হয়, আপুনি আপোনাৰ পেন নম্বৰ, আধাৰ নম্বৰ আৰু নাম জমা কৰিব লাগিব।
এতিয়া আপুনি কেপচা কোড ইনষ্টল কৰিব লাগিব। তাৰ পাছত লিংক আধাৰ বিকল্পত ক্লিক কৰিলে পেন-আধাৰ লিংক পদ্ধতি সম্পূর্ণ হ’ব।
প্রসংগক্রমে উল্লেখ কৰিব পাৰি, চলিত বৰ্ষৰে এপ্ৰিলত এক অধিসূচনা যোগে চিবিডিটিয়ে উল্লেখ কৰিছিল যে আধাৰ নম্বৰৰ পৰিৱৰ্তে আধাৰ নামভর্তি আইডি ব্যৱহাৰ কৰি পেন লাভ কৰাসকলে এতিয়া ২০২৫ৰ ৩১ ডিচেম্বৰৰ ভিতৰত মূল আধাৰ নম্বৰৰ স’তে পেন সংযোগ কৰিব লাগিব।
এই সময়সীমাৰ ভিতৰত লিংক কৰিলে কোনো অতিৰিক্ত জৰিমনা নাথাকিব। অৱশ্যে ধাৰা ২৩৪ এইছৰ অধীনত আন পেন ধাৰীসকলৰ বাবে ১০০০ টকাৰ মাচুল এতিয়াও প্রযোজ্য হ’ব। বিশেষকৈ যিসকলৰ পেন ২০১৭ৰ পহিলা জুলাইৰ পূৰ্বে জাৰি কৰা হৈছিল আৰু এতিয়াও আধাৰিৰ স’তে সংযোগ কৰা হোৱা নাই, তেওঁলোকৰ ক্ষেত্ৰত এই মাচুল প্রযোজ্য হ’ব।
পেন কিদৰে সক্ৰিয় কৰিব?
নিষ্ক্রিয় পেন পুনৰ সক্রিয় কৰিবলৈ ১০০০ টকা জৰিমনা আৰু আধাৰৰ স’তে সংযোগ কৰিব লাগিব। সাধাৰণতে ৩০ দিনৰ ভিতৰত পেন পুনৰ সক্রিয় হয়।
