Victoria and Albert Museum:✒️১৮৬০ৰ সময়ৰ কথা। তেতিয়া ভাৰতবৰ্ষ ব্ৰিটিছ শাসনৰ অধীনত আছিল। দক্ষিণ ভাৰতত বর্তমান প্রযুক্তিবিদৰ অন্যতম লক্ষ্যস্থলী হৈ পৰা বাংগালুৰুৰ পৰা এঘণ্টাৰ বাট দূৰত্বৰ ৰামনগৰা অঞ্চলত ৰেছমৰ সূতাৰে শাৰী বনোৱাত ব্যস্ত এজন ৰেছম শিল্পী। কাঠৰ মেচিনত কোমল ৰেছমৰ কাপোৰ তৈয়াৰ কৰা হৈছে। ইয়াক উজ্জ্বল ৰঙেৰে ৰঙীন কৰা হ’ব। বোধহয় মহীশূৰৰ ৰাদিয়া ৰাজবংশৰ কোনো ৰাজবোৱাৰী বা ৰাজকুমাৰীৰ বাবে শাৰী বনোৱাত ব্যস্ত আছিল ৰেছম শিল্পীজন।
কোনে জানিছিল যে সেই শাৰীৰ উজ্জ্বলতাই ২০২৫তো ইউৰোপৰ জনসাধাৰণক মোহিত কৰিব। লণ্ডনস্থিত বিশ্বৰ সৰ্ববৃহৎ প্রয়োগ কলা সংগ্রহালয় ভিক্টোৰিয়া এণ্ড এলবার্ট মিউজিয়ামত সংৰক্ষিত হৈ আছে এই শাৰীখন।
আমোদজনক কথাটো হ’ল যে সেই সংগ্ৰহালয় আৰু শাৰীখন প্রায় একে বয়সৰ। সংগ্ৰহালয়টো ১৭৩ বছৰ পুৰণি আৰু শাৰীখনো ১৫০ বছৰৰ অলপ বেছি পুৰণি। কিন্তু কিয় হঠাৎ ব্রিটিছ মিউজিয়ামে ভাৰতৰ বিভিন্ন পৰম্পৰাগত শাৰীবোৰ বাদ দি ১৫০ বছৰীয়া মহীশূৰৰ ৰেছম শাৰীখন সংৰক্ষণ কৰিলে।
ইয়াৰ উত্তৰ দিলে ব্রিটেইনৰ ভাৰতীয় মূলৰ প্ৰাক্তন প্ৰধানমন্ত্ৰী ঋষি সুনকৰ পত্নী অক্ষতা মূর্তিয়ে। তেওঁ হৈছে ইনফ ‘ছিছৰ প্রতিষ্ঠাপক নাৰায়ণ মূর্তি আৰু ভাৰতীয় সাংসদ সুধা মূৰ্তিৰ কন্যা। অক্ষতাই কয় যে এই শাৰীখন কেৱল ধুনীয়াই নহয় ইয়াৰ ইতিহাসো বিৰল বিষয়।
শাৰীখনৰ গাটো হালধীয়া ৰঙৰ। আচলৰ ৰং উজ্জ্বল ৰাণী গুলপীয়া। তাৰ ওপৰত আছে সোণ বৰণীয়া আৰু হালধীয়া ৰঙৰ ৰেখা। চাৰে তিনি ইঞ্চি বহল পাৰিৰ ওপৰ আৰু তলত গুলপীয়া-সেউজীয়া-বগা সূতাৰ ডেৰ ইঞ্চি আঁচটনা আছে আৰু পাৰিত সৰু সৰু ৰাণী গুলপীয়া সূতাৰ চেক চেক ডিজাইন আছে।
এক দৃষ্টিত ইয়াৰ বিশেষত্ব অনুমান কৰাটো টান। কিন্তু মহীশূৰৰ ৰেছম শাৰীৰ জনপ্ৰিয়তা হ্রাস পোৱা সময়ত এই শাৰীখন নিৰ্মাণ কৰা হৈছিল।
ভাৰতত উপলব্ধ ৰেছমৰ বিভিন্ন প্ৰকাৰৰ ভিতৰত মহীশূৰৰ বেছম অলপ বেলেগ। এই শাৰীখন আন ৰেছমতকৈ বহুত কোমল। আৰু আন ৰেছমতকৈও ইয়াৰ জিলিকনি বেছি। এই ৰেছমৰ শাৰীখন পাতল আৰু সেই সময়ত এনে শাৰীবোৰত কেৱল সোণ বা ৰূপৰ সূতাৰ ডিজাইনহে কৰা হৈছিল। কিয়নো এইবোৰ শাৰী ৰজাঘৰীয়া বা সমাজৰ উচ্চ শ্ৰেণীৰ লোকে পৰিধান কৰিছিল।
কিন্তু কৰ্ণাটকত টিপু চুলতানৰ পতনৰ পাছত মহীশূৰ ৰেছমৰ জনপ্রিয়তা কিছু হ্রাস পাইছিল। সেয়েহে মহীশূৰ ৰেছমক অধিক আকর্ষণীয় কৰি তুলিবলৈ উজ্জ্বল ৰঙৰ ব্যৱহাৰ কৰা হৈছিল। লণ্ডনত সংৰক্ষিত এই শাৰীখন প্রাকৃতিক ৰঙৰ পৰিৱৰ্তে কৃত্ৰিম ৰং ব্যৱহাৰ কৰা প্ৰথম শাৰীসমূহৰ ভিতৰত অন্যতম।
বর্তমান অক্ষতা লণ্ডন সংগ্ৰহালয়ৰ ব’ৰ্ড অৱ ট্রাষ্টীৰ সদস্য। তেওঁৰ প্ৰশ্নৰ উত্তৰত কিউৰেটৰে শাৰীখনৰ গাৰ ৰং কেঁচা হালধীয়া ব্যৱহাৰ কৰি ৰং কৰা বুলি কোৱা শুনা গ’ল। অৱশ্যে উজ্জ্বল গুলপীয়া ৰঙৰ বাবে কৃত্ৰিম ৰং ব্যৱহাৰ কৰা হৈছিল। সেই সময়ত ভাৰতত প্ৰধানকৈ প্রাকৃতিক ৰঙেৰে শাৰী তৈয়াৰ কৰা হৈছিল।
বিশেষকৈ ৰেছমৰ দৰে কোমল শাৰীত ৰাসায়নিক ৰং ব্যৱহাৰ কৰা হোৱা নাছিল। সেই প্ৰথমবাৰৰ বাবে কৃত্ৰিম ৰং ব্যৱহাৰ কৰা হৈছিল। সেইবাবেই এই শাৰীৰ এক বিশেষ তাৎপর্য আছে। এতিয়া ৰেছমৰ শাৰীত বিভিন্ন ধৰণৰ কৃত্ৰিম ৰং ব্যৱহাৰ কৰা হয়, এই শাৰীখন এই ক্ষেত্রত অগ্রণী।
১৮ শতিকাৰ শেষৰ ফালে ভাৰতীয় ৰেছম শিল্পীৰ পৰা এই শাৰীখন পেৰিছৰ ফেশ্বন জগতৰ বিশিষ্ট ব্যক্তিসকলে সংগ্ৰহ কৰে। ফেশ্বন আৰু শিল্পৰ তীৰ্থস্থান পেৰিছত প্রদর্শিত হৈছিল এই শাৰীখন। লণ্ডনৰ সংগ্ৰহালয়ে তাৰ পৰাই শাৰীখন সংগ্ৰহ কৰিছিল।