Education Minister Dr Ranoj Pegu:
ৰাজ্যৰ ছয় জনগোষ্ঠীৰ জনজাতিকৰণ বিষয়ক মন্ত্রী গোটে অলপতে বিধানসভাত দাখিল কৰা প্ৰতিবেদনত মটক জনগোষ্ঠীৰ এটা সংশোধনী গ্রহণ কৰা হৈছে বুলি সদৰী কৰে মন্ত্ৰী ডাঃ ৰণোজ পেগুৱে। মন্ত্রীগোটৰ অধ্যক্ষ ডাঃ পেগুৱে জনোৱা মতে, প্ৰতিবেদনত মটকসকলৰ ঐতিহ্যৰ এটা বিষয় বাদ পৰিছে। সেইটো হ’ল মটক ৰজা সৰ্বানন্দ সিংহই বেংমৰা ৰাজ্য প্ৰতিষ্ঠা কৰাটো। ডাঃ পেগুরে কয়, ‘মটক সংগঠন সমূহৰ পৰা এটা সংশোধনী আহিছে, আমি এই সংশোধনী গ্রহণ কৰিছো। সেই সংশোধনী কৰাৰ পাছত মুখ্যমন্ত্রী ড° হিমন্ত বিশ্ব শৰ্মাৰ অনুমোদন মর্মে প্রতিবেদন দিল্লীলৈ প্ৰেৰণ কৰা হ’ব।’ তেওঁ লগতে কয় যে প্রতিবেদনখনক সকলোৱে যোগাত্মক দৃষ্টিৰে গ্ৰহণ কৰিছে। ইয়াৰ পূৰ্বে জনজাতিকৰণ হ’ব লাগে বুলি কেবল দাবীটোহে উত্থাপন হৈ আহিছে। দাবীটোৰ উল্লেখেৰে কেইটামান শাৰীহে লিখা হৈছিল। তাৰ বিপৰীতে দাবীটো পূৰণৰ কৌশল কি হ’ব পাৰে, সেয়া নাছিল। ডাঃ পেগুৱে পুনৰ কয়, ‘এই প্রতিবেদন দাবীটো পূৰণৰ এটা ফ্রেম ৱৰ্ক। ইয়াৰ পূৰ্বে এনে ফ্রেম বর্ক নাছিল। আমি এই ফ্রেম ৱর্ক দিল্লীক দাখিল কৰিম। ইতিমধ্যে তালিকাভুক্ত জনজাতিসকলৰ অধিকাৰক ৰক্ষা কৰি বাকীসকলৰ স্বাৰ্থ ৰক্ষা কৰিব পাৰি, তাৰ উল্লেখ এই প্রতিবেদনত আছে।’
ইপিনে, এই প্রতিবেদনক লৈ জনজাতিকৰণৰ দাবী উত্থাপন কৰি অহা জনগোষ্ঠী কেইটাই নিজৰ নিজৰ জনগোষ্ঠীৰ বিশেষজ্ঞৰ দ্বাৰা প্ৰতিবেদনখন আলোচনা কৰি সেই বিষয়ে অৱগত কৰিব আৰু ইয়াৰ বাবে এমাহ সময় লোৱা বুলিও মন্ত্রী ডাঃ পেণ্ডৱে সদৰী কৰে। উল্লেখ্য যে মন্ত্রীগোটে প্রতিবেদন দাখিলৰ ১০ দিন মানৰ ভিতৰতে প্রতিবেদনখন দিল্লীলৈ প্রেৰণ কৰা হ’ব বুলি মুখ্যমন্ত্রী ড° শর্মাই ইতিপূর্বে সদৰী কৰিছিল।
সেই অনুসৰি, যোৱা ২৯ নৱেম্বৰত অসম বিধানসভাৰ শীতকালীন অধিবেশনৰ অন্তিম দিনৰ অন্তিম মুহূর্তত এই প্রতিবেদন দাখিল কৰা হৈছিল। প্রতিবেদন দাখিলৰ দেওবাৰে সাতদিন উকলি যায়। দিছপুৰৰ তথ্য অনুসৰি, প্ৰতিবেদন কেন্দ্ৰীয় চৰকাৰলৈ প্ৰেৰণ কৰিবলৈ আৰু কিছুদিন সময় লাগিব। বিশেষকৈ জনজাতি আৰু জনগোষ্ঠীবোৰে প্ৰতিবেদনখন বিশ্লেষণ কৰিবলৈ এমাহ সময় লোৱাত কেন্দ্ৰীয় চৰকাৰলৈ ইয়াক প্ৰেৰণ কৰিবলৈ অধিক দিনৰ প্রয়োজন হ’ব বুলি প্রশাসনীয় স্তৰত ধাৰণা কৰা হৈছে।
# বিৰোধীৰ প্ৰতিক্রিয়া
মন্ত্রী পেণ্ডবে আজি উল্লেখ কৰা সংশোধনী সন্দৰ্ভত অসম বিধানসভাৰ বিৰোধী দলপতি দেবব্রত শইকীয়াই কয় যে ৰাজ্য চৰকাৰে কি সংশোধনী গ্রহণ কৰিছে সেই বিষয়ে তেওঁ’ জ্ঞাত নহয়। শইকীয়াই কয় যে ৩০ বছৰ পূৰ্বেই জনজাতিকৰণৰ ক্ষেত্রত লোকসভা বাছনি সমিতিয়ে ইতিমধ্যে জনজাতিৰ মৰ্যাদা লাভ কৰা সকলৰ সুবিধা কর্তন নকৰাকৈ জনগোষ্ঠীক জনজাতিকৰণৰ বাবে দিয়া পৰামৰ্শৱলী গ্ৰহণ কৰি ৰাজ্য চৰকাৰে প্ৰচেষ্ট আগবঢ়াব লাগিছিল। তাকে নকৰি জোলোঙাৰ মেকুৰী উলিয়াই লৈ এক বিশ্বাসহীনতা আৰু সন্দেহৰ পৰিবেশত মন্ত্ৰীগোটৰ বৈঠকৰ জৰিয়তে কৰিলে। এনে কাৰ্যৰ দ্বাৰা বিজেপিয়ে এক বিভ্রান্তিৰ সৃষ্টি কৰিছে।
ছয় জনগোষ্ঠীৰ জনজাতিকৰণৰ প্ৰতিবেদন সদ্যসমাপ্ত অসম বিধানসভাৰ শীতকালীন অধিবেশনৰ অন্তিম দিনা দাখিল কৰিলে বুলি উল্লেখ কৰি শইকীয়াই কয়, ‘এই বিষয়টোক লৈ এই মুহূর্তত বিধানসভাৰ কোনো প্রতিক্রিয়া থাকিবই নোৱাৰে। কিয়নো এই বিষয়ক লৈ বিধানসভাত কোনো আলোচনাই নহ’ল।’ তেওঁ কয় যে ১৯৯৬ত লোকসভাৰ বাছনি সমিতিয়ে দিয়া পৰামৰ্শবলী আৰু ২০১৪ত অসম বিধানসভাৰ অধ্যক্ষৰ নেতৃত্বত দিল্লীলে যোৱা প্রতিনিধি দলৰ স্মাৰকপত্ৰৰ বিষয়ে ঘুণাক্ষৰেও উল্লেখ নকৰি চৰকাৰে বিষয়টোৰ পৰা মুনাফা আদায় কৰি ইয়াক ৰাজনৈতিক হাতিাৰৰূপে ব্যৱহাৰ কৰিব বিচৰাটো স্পষ্ট হৈছে।
# মটক ৰজা সর্বানন্দ সিংহৰ নাম মৰাণৰে যুক্ত হৈছে
আনহাতে, মটক যুৱ-ছাত্ৰ সম্মিলনৰ সভাপতি উদয় শংকৰ মোহনে কয় যে মটক ৰাজ্যৰ প্ৰতিষ্ঠাপক ৰজা সর্বানন্দ সিংহৰ নাম মৰাণৰ স’তে যুক্ত হৈছিল। ইয়াৰ সংশোধনী দাবী কৰি মন্ত্রীগোটৰ অন্যতম সদস্য পীযূষ হাজৰিকাক যুৱ-ছাত্র সম্মিলনে সাক্ষাৎ কৰে। জনজাতিকৰণৰ ক্ষেত্ৰত মুখ্যমন্ত্রী ড° হিমন্ত বিশ্ব শর্মাক শক্তিশালী স্থিতি গ্রহণ কৰিবলৈও মটক যুৱ-ছাত্ৰ সম্মিলনৰ নেতাজনে দাবী জনায়। তেওঁ কয়, ‘প্রক্রিয়াটোত ৰাজ্য চৰকাৰে সবল স্থিতি ল’ব লাগিব। মুখ্যমন্ত্ৰীৰ শক্তিশালী স্থিতিৰ কথাও আছে। ২০১৯ত ৰাজ্যসভা পর্যন্ত বিধেয়ক গৈছিল।’
