hydropower project:✒️নামনি সোৱণশিৰিৰ দৈত্যকায় বৃহৎ জলবিদ্যুৎ প্রকল্পটোৰ পাছত অসমক আন এক বিপদৰ মুখলৈ ঠেলি দিবলৈ উঠিপৰি লাগিছে এনএইছপিচি। বিশ্বৰ সৰ্বাধিক ভূকম্পন প্ৰৱণ অঞ্চলটোত সকলো বিৰোধ-প্রতিবাদক অংগুষ্ঠ দেখুৱাই ভাৰত চৰকাৰৰ জলবিদ্যুৎ উৎপাদন প্রতিষ্ঠানটোৱে এইবাৰ আগন্তুক ২০৩২ত বিদ্যুৎ উৎপাদন কাৰ্য আৰম্ভ কৰিবলৈ ২,৮৮০ মেগাৱাট শক্তিসম্পন্ন দিবাং প্রকল্পটোত জঁপিয়াই পৰিছে।
ইয়াৰ বিৰুদ্ধে অসমৰ লগতে অৰুণাচলতো তীব্র প্রতিবাদ অব্যাহত আছে। অৰুণাচলৰ লৱাৰ দিবাং ভেলীত নিৰ্মাণ কৰি থকা প্রকল্পটো সম্পূৰ্ণ হৈ উঠিলে ভাৰতৰ সৰ্ববৃহৎ জলবিদ্যুৎ প্রকল্পৰূপে পৰিগণিত হোৱাই নহয়, বিশ্বৰ বৃহৎ বিদ্যুৎ উৎপাদন প্রকল্পবোৰৰ অন্যতম ৰূপেও পৰিচিত হ’ব। এই স্বীকৃতিয়ে ভাৰতক এফালে তথাকথিত গৌৰৱৰ অধিকাৰী কৰিব আৰু আনফালে জীৱটো হাতৰ মুঠিত লৈ সময় পাৰ কৰিব লাগিব প্ৰকল্পৰ নামনিৰ অসমৰ জনগণে।
অসমক এনে দুর্ভাগ্য জাপি দি সম্প্রতি এনএইছপিচিয়ে পানীৰ সোঁত পৰিৱৰ্তন কৰিবলগীয়া পাঁচটা সুৰংগৰ নিৰ্মাণ সম্পূর্ণ কৰে। এই কাম সম্পূর্ণ কৰিবলৈ সক্ষম হৈ উল্লসিত হৈ পৰিছে নির্মাণ প্রতিষ্ঠানটো। সোমবাৰে প্রতিষ্ঠানটোৰ কৰ্তৃপক্ষই জানিবলৈ দিয়ে যে প্রতিটো সুৰংগৰ ব্যাসার্ধ ১২ মিটাৰ। পাঁচটা সুৰংগৰ মুঠ দৈর্ঘ্য ৬.৩ কিলোমিটাৰ।
প্রতিষ্ঠানটোৰ মতে পৃথক পৃথক জটিল ভূতাত্ত্বিক অৱস্থাক অতিক্রম কৰি এই সুৰংগ নির্মাণ সম্পূৰ্ণ কৰা হয়। হেজাৰ হেজাৰ গছ কাটি, প্রাকৃতিক পৰিৱেশৰ ওপৰত নিৰ্মম অত্যাচাৰ চলাই নিৰ্মাণ কাৰ্য অব্যাহত ৰখা দিবাং জলবিদ্যুৎ প্রকল্পটো নির্ধাৰিত সময়সীমাৰ ভিতৰত সম্পূর্ণ কৰিবলৈ কেন্দ্ৰীয় চৰকাৰে এনএইচপিচিক কঠোৰভাৱে নির্দেশ দিছে।
একেদৰে এনএইছপিচিও সময়ৰ ভিতৰতে প্রকল্পটো শেষ কৰিবলৈ বদ্ধপৰিকৰ হৈছে। কাৰণ অসমত হোৱা প্রবল প্রতিবাদ, নিকৃষ্ট ৰাজনীতি আদিৰ বাবে গেৰুকামুখ তথা নামনি সোৱণশিৰিৰ প্ৰকল্পটোত বৃহৎ লোকচানৰ সন্মুখীন হয়। প্রায় আঠ বছৰ কাম বন্ধ হৈ থকাত প্রস্তাৱিত নির্মাণ ব্যয় কে’বাগুণো বৃদ্ধি হয়।
ইতিমধ্যে নামনি সোৱণশিৰি প্রকল্পত বিদ্যুৎ উৎপাদন আৰম্ভ হৈছে যদিও ইতিপূর্বে হোৱা লোকচান পূৰোৱাটো সহজসাধ্য নহয়। সেয়েহে দিবাং প্রকল্প নির্মাণৰ ক্ষেত্ৰত কোনো ধৰণৰ আপোচ নচলিব বুলি কেন্দ্ৰীয় চৰকাৰে এনএইছপিচিক সকীয়নি প্রদান কৰিছে।
ফলস্বৰূপে প্রতিষ্ঠানটোৱে পাৰিলে লক্ষ্য নির্ধাৰিত সময়ৰ পূৰ্বেই কাম সম্পূৰ্ণ কৰাৰো চিন্তা কৰিছে। সেই কাৰণে অৰণাচলত হোৱা প্রতিবাদক অংগুষ্ঠ প্রদর্শন কৰি নিৰ্মাণ কাৰ্য আগবঢ়াইছে। লক্ষ্যণীয়ভাবে অসমত প্রকল্পটোৰ বিৰোধিতা প্রথমে কৰা হৈছিল যদিও বহস্যজনকভাবে সেই সকলোবে যেন ক’ৰবাত মুখ বন্ধ ৰাখিবলৈ বাধ্য হৈছে।
ইয়াৰ বিপৰীতে অৰুণাচলত প্রতিবাদ অব্যাহত আছে। বিশেষকৈ লৱাৰ দিবাং ভেলী জিলাত স্থানীয় লোকৰ প্রতিবাদ চলি আহিছে। তাৰ বাবে নির্মাণ কার্যত সময়ে সময়ে যতি পৰিলেও সেই ক্ষতিক যুদ্ধংদেহী ৰূপত আগুৱাই নিছে এনএইছপিচিয়ে। প্রকল্পটোৰ নিৰ্মাণ ব্যয় ধাৰ্য কৰা হৈছে প্রায় ১৭ হেজাৰ কোটি টকা।