Bijni :
ডি ভোটাৰ, ডিটেনছন কেম্প, বৈদেশিক ন্যায়াধিকৰণত চলি থকা গোচৰ, প্ৰকৃত ভাৰতীয়ক বিদেশীৰ নামত অত্যাচাৰ, বাঙালী সকলৰ সমস্যা সন্দৰ্ভত সদৌ বিটিচি বাঙালী যুৱ ছাত্ৰ ফেডাৰেছনৰ কেন্দ্ৰীয় কমিটিৰ সাধাৰণ সম্পাদক শুভ মজুমদাৰে সংবাদমেল সম্বোধন কৰে।বিজনীৰ সম্পৰ্ক হোটেলত আয়োজন কৰা সংবাদমেলত চৰকাৰে হিন্দু বেংগলিক বাদ দি কোচৰাজবংশী আৰু গৰ্খা সকলক বিনা স্বৰ্তত নাগৰইকত্ব দিয়া হ’ব আৰু বিদেশী ন্যায়াধীকৰণৰ গোচৰ প্ৰত্যাহাৰ কৰা হ’ব বুলি কৰা মন্তব্যৰ ওপৰত প্ৰতিক্ৰিয়া প্ৰকাশ কৰে।অসমৰ এটা বৈদ্যুতিন মাধ্যমত প্ৰচাৰিত এই বাতৰিৰ পাছত সংগঠনটোৱে ধাৰাবাহিক প্ৰতিবাদী কাৰ্যসূচী ৰূপায়ণ কৰাৰ অন্তত এই সন্দৰ্ভত মন্ত্ৰী পীযুষ হাজৰিকা আৰু মুখ্যমন্ত্ৰীৰে পৃথকে পৃথকে হোৱা বৈঠকত আইনী অধিবক্তাৰ মাধ্যমেদি গোচৰ সমূহ যাতে খাৰিজ কৰা যায় তাৰ বাবে আশ্বাস প্ৰদান কৰিছিল।কিন্তু মুখ্যমন্ত্ৰীয়ে প্ৰতিশ্ৰুতি দি প্ৰতিশ্ৰুতি নাৰাখিলে।
আজিলৈ আইনী অধিবক্তা প্ৰদান নকৰিলে সংবাদমেলত অভিযোগ উত্থাপন কৰে।মুখ্যমন্ত্ৰীয়ে কথা দি কথা নৰখাটো দুখৰ বিষয়, আমি গৰিহণা জনাইছোঁ বুলি কয় নেতা গৰাকীয়ে।তেওঁ লগতে কয় যে মুখ্যমন্ত্ৰীয়ে হিন্দু বাঙালীৰ বাবে আজিলৈ কি কৰিছে শ্বেতপত্ৰ বিচাৰিছোঁ।মুখ্যমন্ত্ৰীলৈ বাঙালী সমাজৰ বহুতো প্ৰশ্ন আছে বুলি মন্তব্য কৰি কেতবোৰ প্ৰশ্ন উত্থাপন কৰে।তেওঁ কয় যে ধলা শদিয়াত উগ্ৰপন্থীয়ে বাঙালী লোকক হত্যা কৰাৰ তদন্ত হলনে নাই?বসুন্ধৰা আঁচনিৰ জৰিয়তে কেইজন হিন্দু বাঙালীক মাটিৰ পট্টা দিয়া হ’ল?উগ্ৰপন্থী কেডাৰক পুনৰসংস্থাপনৰ জৰিয়তে পাঁচ লাখকৈ টকা দিলে, চাকৰি দিলে।
কিন্তু আমাৰ প্ৰাক্তন বিটিএফ, এনএলএফবি কেডাৰক পুনৰ সংস্থাপনৰ নামত কি দিছে?বডোলেণ্ড আন্দোলনত শ্বহীদ হোৱা বিভিন্ন জাতি জনগোষ্ঠীৰ পৰিয়ালক পাঁচ লাখকৈ টকা দিছে কিন্তু আমাৰ হিন্দু বাঙালী কোনজন শ্বহীদক টকা দিছে?বিভিন্ন জাতিৰ সংগঠনক ছাত্ৰাবাস আৰু কমিউনিটি হো’ল বনোৱাৰ নামত টকা দিছে কিন্তু আমাৰ হিন্দু বাঙালীৰ কোনটো সংগঠনক কমিউনিটি হো’ল বা ছাত্ৰাবাস বনোৱাৰ বাবে টকা দিছে?ব্ৰহ্মপুত্ৰ ভেলীত বাঙালী সম্প্ৰদায়ৰ পৰা এজনো মন্ত্ৰী দিয়া নাই।আনহাতে বিজেপিৰ সভাপতি আৰু মুখ্যমন্ত্ৰীয়ে জাতিয়তাবাদ দেখুওৱাৰ বাবে প্ৰতিযোগিতাত নামিছে আন এক অভিযোগ উত্থাপন কৰে।
কোনে কিমান জাতিয়তাবাদ দেখুৱাব পাৰে তাৰহে প্ৰতিযোগিতাত নামিছে। অসমত থকা বিজেপি দল ৰাষ্ট্ৰীয়তাবাদী বিজেপি দল নহয় জাতিয়তাবাদী বিজেপি দল হৈ পৰিছে বুলি ভাবিছোঁ।মুখ্যমন্ত্ৰীয়ে হিন্দুত্বৰ নামলৈ ৰাজনীতি কৰি আছে কিন্তু আমাৰ হিন্দু বাঙালী সকলৰ বিষয়ে কেতিয়াবা মাত মাতিছে নে?তেওঁ লগতে আগন্তুক বিধানসভা নিৰ্বাচনৰ বাবে বিজনী, টংলা আৰু গৰেশ্বৰ সমষ্টিত বাঙালী প্ৰাৰ্থী প্ৰক্ষেপ কৰিবলৈ প্ৰতিটো ৰাজনৈতিক দলক আহ্বান জনায়। যদি আমাৰ দাবী নামানে সদৌ বিটিচি বাঙালী যুৱ ছাত্র ফেডাৰেছনে তিনিওটা সমষ্টিত প্ৰাৰ্থীত্ব ঠিয় কৰিবলৈ বাধ্য হ’ব বুলি মন্তব্য কৰে।
পৰৱৰ্তী কাৰ্যপন্থা সন্দৰ্ভত অহা ১৪ ডিচেম্বৰত বিজনীত বিটিচি বাঙালী ফেডাৰেছনৰ প্ৰাক্তন সদস্য আৰু বাঙালী সমাজৰ বুদ্ধিজীৱীৰ লগত এখন বৈঠক বহা হ’ব বুলি মন্তব্য কৰে। বিজনী চহৰৰ সম্পৰ্ক হোটেলত আয়োজন কৰা সংবাদমেলত কাৰ্যকৰী সভাপতি ব্ৰজগোপাল সৰকাৰ, উপসভাপতি সঞ্জয় মল্লিক, সহকাৰী সাধাৰণ সম্পাদক সজল আচাৰ্য, চিৰাং জিলা কমিটিৰ সাধাৰণ সম্পাদক ৰাজু সাহা মণ্ডল, ক্ৰীড়া সম্পাদক ৰাজীৱ সাহা উপস্থিত থাকে।
