সাধাৰণতে বিশ্বৰ তাপমাত্রা বৃদ্ধি, অতিবৃষ্টি বা খৰাঙৰ দৰে চৰম বতৰৰ ঘটনাসমূহৰ বাবে এল নিনোক দায়ী কৰা হয়। যদিও নতুন বছৰত এক ব্যতিক্রমী বাস্তৱ সম্মুখলৈ আহিছে যে এল নিনো সক্রিয় হৈ নাথাকিলেও পৃথিৱীৰ বিভিন্ন প্রান্তত জলবায়ু বিপর্যয় আৰু মাৰাত্মক হৈ উঠিছে।
বিজ্ঞানীসকলৰ মতে, ইয়াৰ অন্তৰালত প্ৰধান কাৰণ প্ৰাকৃতিক কোনো চক্ৰ নহয়, বৰঞ্চ মানুহৰ দীর্ঘদিনৰ জীৱাশ্ম ইন্ধনৰ নিৰ্ভৰতা।
এল নিনোৱে সততে প্রশান্ত মহাসাগৰৰ উষ্ণতা বৃদ্ধি কৰি বিশ্বৰ বতৰৰ ধৰণ সলনি কৰি পেলায়। তাপমাত্রা বাঢ়ে, বৰষুণ অস্বাভাৱিক হয় আৰু খৰ বা বানৰ আশংকা বৃদ্ধি পায়। যদিও ২০২৬ত এল নিনোৰ অনুপস্থিতিতো যি তীব্র তাপপ্রবাহ, ভয়াৱহ দাবানল, আকস্মিক বান আৰু দীর্ঘস্থায়ী খৰাঙৰ উমান পোৱা গৈছে, সিয়েই ইংগিত দিছে এক গভীৰতৰ সংকটৰ দিশে।
একাংশ জলবায়ু বিজ্ঞানীয়ে মন্তব্য কৰিছে যে ই প্রধানকৈ ‘বেকগ্রাউণ্ড বার্মিং’, অর্থাৎ মানুহে সৃষ্টি কৰা গোলকীয় উষ্ণতাৰ ফল।কয়লা, তেল আৰু প্রাকৃতিক গেছ জ্বলোৱাৰ ফলত কার্বন ডাই-অক্সাইড আৰু মিথেনৰ দৰে গ্ৰীণহাউছ গেছ বায়ুমণ্ডলত প্ৰচুৰ জমা হৈছে। এই গেছবোৰে সূৰ্যৰ তাপক আবদ্ধ কৰি ৰাখি পৃথিৱীৰ গড় তাপমাত্রা স্থায়ীভাৱে বৃদ্ধি কৰি তুলিছে। ফলত এতিয়া আৰু চৰম বতৰৰ বাবে এল নিনোৰ দৰে প্রাকৃতিক ট্রিগাৰৰ বাবে অপেক্ষা কৰাৰ প্ৰয়োজন নোহোৱা হৈছে।
বায়ুমণ্ডল আৰু মহাসাগৰত জমা হৈ থকা অতিৰিক্ত তাপে নিজেই চৰম ঘটনাক আৰু তীব্র আৰু প্রাণঘাতী কৰি তুলিছে।২০২৬ত ইয়াৰ প্ৰভাৱ বিশেষভাৱে স্পষ্ট। দক্ষিণ এছিয়াত অভিলেখ ভংগ কৰা গৰম মানুহৰ স্বাস্থ্যৰ পক্ষে ডাঙৰ সমস্যা হৈ উঠিছে।
ইউৰোপ আৰু উত্তৰ আমেৰিকাত দাবানল দ্রুত বিয়পি পৰিছে, ইয়াৰ কাৰণৰূপে শুষ্কতা আৰু তাপে একেলগে কাম কৰিছে। আনহাতে, উষ্ণ বায়ুমণ্ডলে বেছি জলীয় বাষ্প ধৰি ৰাখিব পৰাত হঠাৎ অতিবৃষ্টিত চহৰাঞ্চলত বান আৰু ভূমিস্খলন বাঢ়িছে।
বিশেষজ্ঞসকলৰ মতে, এই প্ৰৱণতা ভৱিষ্যতে আৰু ভয়াৱহ হ’ব পাৰে যদি জীৱাশ্ম ইন্ধনৰ ব্যৱহাৰ দ্রুততাৰে হ্ৰাস কৰা নহয়। নবীকৰণযুক্ত শক্তিত বিনিয়োগ, শক্তি দক্ষতা বৃদ্ধি তথা কার্বন নিঃসৰণ হ্রাস কৰাটো এতিয়া আৰু কেৱল পৰিৱেশ ৰক্ষাৰ প্ৰশ্ন নহয়, ই মানুহৰ জীৱন আৰু অৰ্থনীতিক ৰক্ষাৰ সংগ্ৰাম।
এল নিনো উপস্থিত নাথাকিলেও যে জলবায়ু সংকট স্তব্ধ হোৱা নাই, সিয়েই স্পষ্ট কৰি দিছে যে মূল দোষ প্রাকৃতিক চক্ৰৰ নহয়, বৰঞ্চ মানুহৰ ইন্ধন ব্যৱহাৰৰ।