Expressions Of Condolence:
বৰ্ষীয়ান সংগীত শিল্পী গৰাকীৰ মৃত্যুত গভীৰ শোক প্ৰকাশ কৰে মুখ্যমন্ত্ৰী ড:হিমন্ত বিশ্ব শৰ্মাই ৷ এক শোকবাৰ্তাত মুখ্যমন্ত্ৰী গৰাকীয়ে কয় ,’আজি উৰুকাৰ দিনটোতে অসমৰ সাংস্কৃতিক জগতৰ প্ৰসিদ্ধ ব্যক্তিসত্তা, শিল্পী সমৰ হাজৰিকা ডাঙৰীয়াৰ দেহাৱসানৰ খবৰটি পাই মর্মাহত হৈছোঁ। সুধাকণ্ঠ ড: ভূপেন হাজৰিকাদেৱৰ কণিষ্ঠ ভাতৃ হাজৰিকাই অনাতাঁৰ কেন্দ্ৰ আৰু এলবামৰ বাবে গীত গোৱাৰ উপৰি বহুকেইখন অসমীয়া চলচ্চিত্ৰৰ নেপথ্য কণ্ঠশিল্পী হিচাপে খ্যাতি অর্জন কৰিছিল। তেখেতৰ কণ্ঠত প্রাণ পাই উঠা ‘প্রথম মৰমে যদি, ই যে ৰণাংগনৰ কাহিনী আদি কালজয়ী জনপ্রিয় গীত আজিও অসমৰ শ্ৰোতাৰ হৃদয়ত সজীৱ হৈ আছে। তেখেতৰ বিয়োগ আমাৰ বাবে এক বুজাব নোৱৰা ক্ষতি। এই শোকার্ত মুহূৰ্তত মহান শিল্পীগৰাকী স্বৰ্গগামী আত্মাৰ চিৰশান্তি কামনাৰ লগতে পৰিয়ালবৰ্গলৈ গভীৰ সমবেদনা জ্ঞাপন কৰিছোঁ।
আনহাতে প্ৰাক্তন মুখ্যমন্ত্ৰী তথা কেন্দ্ৰীয় মন্ত্ৰী সৰ্বানন্দ সোনোৱালেই বিশিষ্ট শিল্পী গৰাকী বিয়োগত শোক প্ৰকাশ কৰি কয় ,উৰুকাৰ দিনা পুৱাই যশস্বী কণ্ঠশিল্পী সমৰ হাজৰিকাদেৱৰ বিয়োগৰ খবৰটো পাই অত্যন্ত মর্মাহত হৈছোঁ। হৃদয়স্পর্শী কণ্ঠেৰে অগণন শ্রোতা-দর্শকৰ হৃদয়ত গভীৰ সাঁচ বহুৱাই থৈ যোৱা সমৰদাৰ বৰ্ণিল সাংস্কৃতিক অৰিহণা স্মৰণীয় হৈ থাকিব। তেখেতৰ বিদেহ আত্মাৰ সদগতি কামনাৰে শ্ৰদ্ধাঞ্জলি জ্ঞাপন কৰিলোঁ আৰু শোকসন্তপ্ত পৰিয়ালবৰ্গলৈ মোৰ তৰফৰপৰা সমবেদনা জনালোঁ।
