OPS:
পুৰণি পেন্সন ব্যৱস্থা পুনৰ প্ৰৱৰ্তনৰ দাবীত ঐক্যবদ্ধ আন্দোলন আগুৱাই নিব উত্তৰ-পূৱৰ কৰ্মচাৰী সমাজে। এই উপলক্ষে অহা পহিলা ফেব্ৰুৱাৰীত উত্তৰ-পূৱৰ কেওখন ৰাজ্যৰ কৰ্মচাৰী সংগঠনৰ উপস্থিতিত গুৱাহাটীত এখন গুৰুত্বপূর্ণ বৈঠক আহ্বান কৰা হৈছে। এই বৈঠকত নতুন পেন্সন ব্যৱস্থাৰ বিৰোধী সংগ্রাম তথা পুৰণি পেন্সন ব্যৱস্থা পুনৰ প্ৰৱৰ্তনৰ দাবীত আগন্তুক বৃহৎ আন্দোলনৰ কাৰ্যসূচী ঘোষণা কৰিব বুলি সদৰী কৰিছে সদৌ অসম চৰকাৰী এনপিএছ কৰ্মচাৰী সংস্থাৰ সভাপতি অচ্যুতানন্দ হাজৰিকাই।
উল্লেখ্য যে কনফেডাৰেছন অৱ ছার্ভিচ এছ’চিয়েছন অৱ অৰুণাচল প্ৰদেশৰ সপ্তম ত্রিবার্ষিক কেন্দ্রীয় অধিবেশনৰ মুকলি সভা শুক্ৰবাৰে পাছিঘাটত অনুষ্ঠিত হয়। এই সভাত অংশগ্ৰহণ কৰি সদৌ অসম চৰকাৰী এনপিএছ কৰ্মচাৰী সংস্থাৰ সভাপতি হাজৰিকাই কয় যে অসমত ইতিমধ্যে ২০ হেজাৰৰো অধিক কৰ্মচাৰীয়ে এনপিএছৰ অধীনত অৱসৰ গ্ৰহণ কৰি ন্যূনতম পেন্সনৰে অতি কষ্টৰে জীৱন নির্বাহ কৰি আছে। এজন অৱসৰপ্ৰাপ্ত কৰ্মচাৰীয়ে অনিশ্চয়তাৰ মাজত জীয়াই থাকিব নোৱাৰে, অৱসৰৰ পাছত এজন কৰ্মচাৰীক স্থিৰতা আৰু মৰ্যাদা লাগিবই বুলি হাজৰিকাই মন্তব্য কৰি এইক্ষেত্ৰত পুৰণি পেন্সন ব্যৱস্থাৰ বিকল্প নাই বুলি কয়।
লগতে তেওঁ কয় যে সংবিধানৰ ৩০৯ নম্বৰ অনুচ্ছেদে ৰাজ্য চৰকাৰক নিজৰ কৰ্মচাৰীৰ বাবে সিদ্ধান্ত লোৱাৰ ক্ষমতা প্রদান কৰিছে। গতিকে কেৱল ৰাজনৈতিক সদিচ্ছাইহে পুৰণি পেন্সন ব্যবস্থা পুনৰ বলবৎ কৰাতো সম্ভৱ বুলি তেওঁ মন্তব্য কৰি কেৱল পুৰণি পেলন ব্যৱস্থাইহে কৰ্মচাৰীৰ প্ৰকৃত সামাজিক সুৰক্ষা দিব পাৰিব বুলি কয়। লগতে তেওঁ কয় যে এই সভাত অৰুণাচলৰ মুখ্যমন্ত্রী পেমা খাণ্ডুৱে অংশগ্রহণ কৰি কৰ্মচাৰীসকলৰ এই দীর্ঘদিনীয়া সমস্যা সমাধানৰ পোষকতা কৰে।
নতুন পেন্সন আঁচনিৰ শংকা নিবাৰণৰ বাবে মুখ্যমন্ত্রী খাণ্ডুৱে কেন্দ্ৰীয় চৰকাৰৰ স’তে আলোচনা কৰাৰ কথা ঘোষণা কৰে। লগতে মুখ্যমন্ত্রীজনে এনপিএছ ব্যবস্থাই কৰ্মচাৰী সমাজৰ মনত এক অনিশ্চয়তাৰ সৃষ্টি কৰিছে বুলি মন্তব্য কৰে। উল্লেখ্য যে অসম চৰকাৰকো এইক্ষেত্রত পদক্ষেপ ল’বলৈ হাজৰিকাই দাবী জনাইছে।
