বয়স বঢ়াৰ লগে লগে ছালত বলিৰেখা, দাগ, ঢিলা ভাব আৰু কেতিয়াবা গুটিৰ দৰে সমস্যাও দেখা যায়। মুখৰ ছালৰ উজ্জ্বলতা কমে। এই সকলো পৰিৱৰ্তনৰ মূল কাৰণসমূহৰ ভিতৰত ক’লাজেনৰ হ্রাস এটা গুৰুত্বপূর্ণ কাৰণ। ক’লাজেন হৈছে এক প্রাকৃতিক প্র’টিন, যিয়ে ছাল টান আৰু উজ্জ্বল কৰি ৰাখে। কিন্তু বয়স বঢ়াৰ লগে লগে ক’লাজেন উৎপাদন স্বাভাবিকভাবে হ্রাস পায়। লগতে। সূৰ্যৰ ক্ষতিকাৰক ৰশ্মি, ধোঁৱা-ধূলি আৰু প্ৰদূষণেও এই প্রক্রিয়াক অধিক ক্ষতিগ্রস্ত কৰে।
ছালৰ উজ্জ্বলতা ঘূৰাই আনিবলৈ কেবল প্রসাধন ব্যৱহাৰেই
যথেষ্ট নহয়। দেহৰ ভিতৰৰ পৰা পুষ্টি যোগান ধৰিলেহে দীর্ঘদিনীয়া সুফল পোৱা যায়। কিছুমান প্রাকৃতিক পানীয় নিয়মিত গ্রহণ কৰিলে ক’লাজেন উৎপাদনত সহায় হয় আৰু ছালৰ স্বাস্থ্য উন্নত হয়।
১) আমলখি আৰু ছালকুঁৱৰী (এল’ভেৰা) :দুটা আমলখিৰ ৰসলৈ তাত চাৰি চামুচ এল’ভেৰা ৰস আৰু এক চামুচ মৌ মিহলাই ল’ব। পুৱা খালী পেটত এই পানীয় খালে দেহত পুষ্টি যোগান বাঢ়ে আৰু ছালৰ উজ্জ্বলতা বৃদ্ধি পায়। আমলখিত প্ৰচুৰ ভিটামিন থাকে, যিয়ে ক’লাজেন গঠনত সহায় কৰে।
২) ৰঙালাওৰ গুটি আৰু ৰঙালাওৰ নাৰিকলৰ পানীয়ঃ গুটিত ক’লাজেন গঠনত সহায় কৰা খনিজ উপাদান থাকে। এক গিলাচ পানীত এক চামুচ ৰঙালাওৰ গুটি পিচি লোৱা, এক চামুচ নাৰিকলৰ পানী, দুটা খেজুৰ আৰু এক চামুচ সূর্যমুখী গুটিৰ পিচি লোৱা অংশ। এই আটাইবোৰ ভালদৰে মিশ্রণ কৰি পান কৰক। এই পানীয়ে ছাল সুৰক্ষিত ৰখাত সহায় কৰে আৰু শুকান ভাব কমায়।
৩) আনাৰস আৰু পদিনাৰ সতেজ পানীয়: এটা কাচৰ পাত্ৰত আনাৰসৰ সৰু টুকুৰা আৰু কেইখনমান পদিনাৰ পাত কেইঘণ্টামান তিয়াই থওক। পাছত সেই পানী খালে দেহ সতেজ থাকে, বিষাক্ত পদার্থ বাহিৰ হয় আৰু ছালৰ স্বাভাৱিক উজ্জ্বলতা বৃদ্ধি পায়।
সাৱধানতাঃ এই পানীয়সমূহ সহায়ক হ’লেও কোনো ধৰণৰ এলার্জি বা দীর্ঘদিনীয়া ছালৰ সমস্যাত ভুগি থাকিলে চিকিৎসকৰ পৰামৰ্শ লোৱাটো দৰকাৰ। লগতে পর্যাপ্ত পানী খাওক, পুষ্টিকৰ আহাৰ গ্রহণ আৰু নিয়মিত বিশ্রামে ছালৰ যত্নত সমানেই গুৰুত্বপূর্ণ ভূমিকা গ্রহণ কৰে।