উনবিংশ শতিকাতে তৈয়াৰী তথা তামিলনাডুৰ তিৰুনেলভেলীৰ এটা কেথেড্ৰেলত স্থাপন কৰা এটা ঘড়ীয়ে পুনৰ গুঞ্জন তুলিবলৈ সাজু হৈছে। ১৮৫৪তে এই ঘড়ী তৈয়াৰ কৰে তেতিয়াৰ লণ্ডনৰ বিখ্যাত ঘড়ী নির্মাতা প্রতিষ্ঠান ক্লার্কেন বেলৰ জন মুৰ আৰু ছলে।
উল্লেখ্য যে লণ্ডনৰ এলিজাবেথ টাৱাৰৰ বিগ বেনকে সবাতোকৈ পুৰণা ঘড়ী বুলি বহুতে আখ্যা দিয়ে। ১৮৫৯৩ বিগ বেনক এলিজাবেথ টাৱাৰত স্থাপন কৰা হয়। ইয়াৰ বিপৰীতে মুৰ এণ্ড ছন্সে ১৮৫৪ত তৈয়াৰ কৰা ঘড়ীটো ইয়াৰ পাছৰ বছৰতে তিৰুনেলভেলী জিলাৰ ঐতিহাসিক হ’লী ত্রিনিটী কেথেড্রেলত স্থাপন কৰা হয়।
১৮২৬ত হ’লী ত্রিনিটী কেথেড্রেল নিৰ্মাণ কৰা হয়। চলিত বর্ষত এই কেথেড্রেলে দুশ বছৰ পূৰ্ণ কৰে। এই উপলক্ষে কেথেড্রেলটোৰ পুনৰ উজ্জীৱিতকৰণৰ কামো সম্পন্ন কৰা হৈছে। আনহাতে, কেথেড্ৰেলৰ প্রাচীন ঘড়ীটো বহুযুগ পূর্বে অচল হৈ পৰে।
কেথেড্রেল কর্তৃপক্ষই দুশ বছৰ পূৰ্তি উপলক্ষে ঘড়ীটো পুনৰ চলোৱাৰ সিদ্ধান্ত গ্রহণ কৰে। সেই অনুসৰি তেওঁলোকে ঘড়ীটোক ‘পুনৰ জীৱন’ দিয়াৰ বাবে প্ৰাচীন ঘড়ী সংগ্ৰাহক ৰ’বাট কেনেডী আৰু দক্ষ ঘড়ী মেকানিক নাগৰাজৰ দ্বাৰস্থ হয়। বিষয়টোক লৈ দুয়োপক্ষৰ মাজত দুমাহজোৰা আলোচনা অনুষ্ঠিত হয়।
এই আলোচনাৰ অন্তত কেনেডীয়ে নাগৰাজৰ সহায়ত ঘড়ীটো পুনৰ জীৱনদানৰ সিদ্ধান্ত লয়। ঘড়ীটোত এটা বেটাৰী স্থাপন কৰি পুনৰ জীৱনদান দিয়াৰ ব্যৱস্থা কৰা হৈছে বুলি কেনেডীয়ে সদৰী কৰিছে। এই সম্পৰ্কত আৰু তেওঁ কয়, ‘ঘড়ীত সুন্দৰ অভিযান্ত্রিক যান্ত্রিক ব্যৱস্থা থাকে। আটোমটোকাৰিকৈ গঢ়ি তোলা যান্ত্রিক ব্যৱস্থা আঁতৰ কৰা কার্যক একোটা ঘড়ীক হত্যাসম। মই তেওঁলোক (কেথেড্রেল) কর্তৃপক্ষক অৱগত কৰিলো যে যদি ঘড়ীটোত এটা বেটাৰী স্থাপন কৰা হয় তেন্তে পুনৰ সচল হ’ব।’
তেওঁৰ এই প্ৰস্তাৱ কেথেড্রেল কর্তৃপক্ষই মানি লয়। অৱশ্যে ঘড়ীটোক পুনৰ জীৱনদান দিয়াৰ বাবদ কেথেড্রেল কর্তৃপক্ষৰ মেকানিক নাগৰাজক ১.২ লাখ টকা দিব লাগিব বুলি কেনেডীয়ে সদৰী কৰে। উল্লেখ্য যে প্ৰথম অৱস্থাত কেথেড্রেল কর্তৃপক্ষই নিজাববীয়াকৈ ঘড়ীটো পুনৰ সচল কৰাৰ চেষ্টা কৰে যদিও সফল নহ’ল।
গতিকে তেওঁলোক কেনেডী আৰু নাগৰাজৰ দ্বাৰস্থ হয়। ঘড়ীটো পুনৰ ‘সজীৱ’ হৈ উঠিলে তাত ইয়াৰ তৈয়াৰী বৰ্ষ উল্লেখ কৰি ঘড়ীটোক পুনৰ কেথেড্ৰেলৰ দেৱালত ওলমাৰৰ সিদ্ধান্ত লৈছে কর্তৃপক্ষই।