কেন্দ্ৰীয় চৰকাৰে ক’লা ধন নিয়ন্ত্ৰণ কৰিবলৈ সময়ে সময়ে নগদ লেনদেনৰ ওপৰত একাধিক সীমা নির্ধাৰণ কৰি আহিছে। এই সীমা পাৰ কৰিলেই আয়কৰ বিভাগৰ তৰফৰ পৰা যিকোনো ব্যক্তি বা সংস্থালৈ যিকোনো মুহূৰ্ততে কাৰণ দর্শোৱাৰ জাননী জাৰি কৰা হ’ব পাৰে।
যদি কোনো ভাৰতীয় নাগৰিকে এই সীমাৰ বাহিৰত নগদ ধন দিয়ে বা লয়, পৰিশোধ কৰা বা প্রাপ্ত কৰা পৰিমাণৰ ওপৰত এশ শতাংশ পর্যন্ত জৰিমনা আৰোপ কৰা হ’ব পাৰে। আহকচোন এই বিষয়ে জানো…
আয়কৰ আইন অনুসৰি, আমাৰ দেশত এজন ব্যক্তিয়ে এদিনত বা এবাৰত দুই লাখ টকাৰ অধিক নগদ লেনদেন কৰিব নোৱাৰে। উদাহৰণ স্বৰূপে, যদি কোনোবাই একেলগে তিনি লাখ টকাৰ গহনা ক্রয় কৰে, তেন্তে তেওঁ চেক, ক্রেডিট কার্ড, ডেবিট কার্ড বা বেংক স্থানান্তৰৰ জৰিয়তেহে বিল পৰিশোধ কৰিব পাৰে।
পৰিয়ালৰ সদস্য এজনৰ পৰা টকা লোৱাৰ সময়তো এই একেই নিয়ম অনুসৰণ কৰিব লাগে। উচ্চ মূল্যৰ লেনদেনৰ বাবে নগদ ধনৰ ব্যৱহাৰ হ্ৰাস কৰিবলৈ, চৰকাৰে ধাৰা ২৬৯ এছটিৰ অধীনত দুই লাখ টকাৰ অধিক নগদ ধন গ্রহণ নিষিদ্ধ কৰিছে।
ইয়াৰ অৰ্থ হৈছে যে ব্যক্তি এজনে এদিনত নিজৰ নিকট আত্মীয়ৰ পৰাও আনকি দুই লাখ টকাতকৈ অধিক নগদ ধন ল’ব নোৱাৰিব।
যদি কোনোবাই এই নিয়ম ভংগ কৰি দুই লাখতকৈ অধিক নগদ ধন লয়, তেনেহ’লে প্রাপ্ত পৰিমাণৰ সমান জৰিমনা পৰিশোধ কৰিব লাগিব।
ইয়াৰ বাহিৰেও, আন কে’বা প্ৰকাৰৰো বিত্তীয় লেনদেন আছে, য’ত নিয়ম ভংগ কৰিলে আয়কৰ বিভাগৰ জাননীৰ সন্মুখীন হ’ব লাগে। তাৰে ভিতৰত প্ৰথমটো হৈছে ক্রেডিট কার্ডৰ বিল পৰিশোধৰ নিয়ম। যদি কোনো ব্যক্তিয়ে এক লাখ বা তাতকৈ অধিক, অথবা ১০ লাখ বা তাতকৈ অধিক ক্রেডিট কার্ডৰ বিলৰ নগদ ধন পৰিশোধ কৰে তেন্তে কেন্দ্রীয় প্রত্যক্ষ কৰ ব’ৰ্ডক অৱগত কৰিব লাগিব। অন্যথা নিয়ম ভংগৰ জৰিমনা ভৰিব লাগিব।
এটা নির্দিষ্ট বিত্তীয় বৰ্ষৰ ভিতৰত বেংক একাউণ্টত জমা থ’ব পৰা ধনৰ সীমাও ১০ লাখ টকা। এই পৰিমাণতকৈ অধিক নগদ ধন জমা হ’লেও আয়কৰ বিভাগে জাননী দিব পাৰে।
কোনোবাই যদি কোনো মাটি বা ঘৰ ক্ৰয় বা বিক্ৰী কৰে আৰু সেই ক্ষেত্ৰত টকাৰ পৰিমাণ নগদ ৩০ লাখতকৈ অধিক হয়, তেন্তে আয়কৰ বিভাগক অৱগত কৰিব লাগিব। অন্যথা নিয়ম ভংগৰ জৰিমনা ভৰিব লাগিব।
শ্বেয়াৰ, বণ্ড, মিউচুৱেল ফাণ্ড আৰু ডিবেঞ্চাৰত বিনিয়োগ কৰাযদি কোনো কৰদাতাই কোনো এটা বিত্তীয় বৰ্ষৰ ভিতৰত দুই লাখ টকাতকৈ অধিক নগদ লেনদেন কৰে, তেন্তে সেইক্ষেত্ৰতো আয়কৰ কর্তৃপক্ষক জনোৱা উচিত।