Balendra Shah takes oath as Nepal’s PM:
দৈনিক অগ্ৰদূত ডিজিটেল ডেক্স:-নেপালত এক বৃহৎ ৰাজনৈতিক পৰিৱৰ্তন ৷ ৰাম নৱমীৰ দিনাই নেপালত তৰুণ প্ৰজন্মৰ বলেন্দ্ৰ শ্বাহৰ ৰাজ অভিষেক ৷ ৩৫ বছৰীয়া বলেন্দ্ৰ শ্বাহ হিমালয়ান দেশ খনৰ আটাইতকৈ কম বয়সীয়া প্ৰধানমন্ত্ৰী হিচাপে শপত গ্ৰহণ কৰে। ৰাষ্ট্ৰপতি ৰামচন্দ্ৰ পৌডেলে ৰাষ্ট্ৰপতি ভৱন শীতল নিৱাছত অনুষ্ঠিত শপত গ্ৰহণ অনুষ্ঠানত শ্বাহ আৰু মন্ত্ৰীসভাৰ আন আন সদস্য সকলক শপতবাক্য পাঠ কৰায় ৷
উল্লেখ্য যে কেইবছৰমান আগলৈকে তেওঁ ৰেপাৰ হিচাপে পৰিচিত আছিল। তাৰ পিছত তেওঁ কাঠমাণ্ডুৰ মেয়ৰ হৈ কামৰ জৰিয়তে ইমানেই জনপ্ৰিয়তা লাভ কৰে যে তেওঁৰ দল ৰাষ্ট্ৰীয় স্বতন্ত্ৰ পাৰ্টিয়ে তেওঁক প্ৰধানমন্ত্ৰী পদৰ প্ৰাৰ্থী হিচাপে মনোনীত কৰে। বলেন্দ্ৰ শ্বাহ নেতৃত্বাধীন ৰাষ্ট্ৰীয় স্বতন্ত্ৰ পাৰ্টি চমুকৈ আৰ এছ পিয়ে সদ্য সমাপ্ত সাধাৰণ নিৰ্বাচনত ২৭৫খন আসনৰ ভিতৰত ১৮২খন আসন লাভ কৰি স্পষ্ট সংখ্যাগৰিষ্ঠতা লাভ কৰে।
মনকৰিবলগীয়া যে শপত গ্ৰহণ অনুষ্ঠানত হিন্দু আৰু বৌদ্ধ উভয় পৰম্পৰাৰ সংমিশ্ৰণ ঘটিছিল। সাতজন ব্ৰাহ্মণৰ শংখনাদ, ১০৮জন ডেকা ব্ৰাহ্মণে বৈদিক মন্ত্ৰ পাঠ কৰিছিল আৰু ১০৭ জন লামাই বৌদ্ধ শাস্ত্ৰ পাঠ কৰিছিল।